ရန်ကုန်၊ ဇူလိုင် ၁၇
ကချင်ပြည်နယ် ဖားကန့်မြို့နယ် ဆယ်ဇင်းဒေသတွင် KIA တပ်ဖွဲ့နှင့် အကြမ်း ဖက် စစ်တပ်တို့ ဇူလိုင်လ ၁၆ ရက်နေ့ နံနက် ၇ နာရီခန့်က စတင်ကာ ယနေ့ ဇူလိုင်လ ၁၇ ရက်နေ့အထိ တိုက်ပွဲ ပြင်းထန်နေပြီး စစ်တပ်ဘက်က ၂၅ ဦးထက်မနည်း ထိခိုက်သေဆုံးမှုရှိကြောင်း ဒေသခံ ပြည်သူများထံမှ သိရသည်။
တိုက်ပွဲအတွင်း အကြမ်းဖက် စစ်တပ် တပ်ဖွဲ့ဝင်များ ဆယ်ဇင်းဒေသအတွင်း ပိတ်မိနေပြီး ထိခိုက်သေဆုံးမှု များပြားသောကြောင့် ယနေ့ ဇူလိုင်လ ၁၇ ရက်နေ့ နံနက် ၈ နာရီခန့်တွင် စစ်တပ်က တိုက်လေယာဥ်ဖြင့်ပါ လာရောက်တိုက် ခိုက်နေကြောင်း၊ ဆယ်ဇင်းဒေသရှိ ရွှေမှော်နှင့် ရပ်ကွက်များအနီးကို လေယာဉ်ဖြင့် ဗုံး ၃ လုံးကျဲချခဲ့ကြောင်း သိရသည်။
” တိုက်ပွဲက မနေ့က နံနက် ၇ နာရီလောက်တည်းက ဆယ်ဇင်းရွာနဲ့ ၁ မိုင်လောက်ဝေးတဲ့နားမှာ စစ်ကောင်စီ တပ်နဲ့ KIA တိုက်ပွဲ ဖြစ်တာပေါ့။ မနေ့တည်းက စစ်ကောင်စီဘက်က အကျအဆုံးများတယ်။ ထွက်ပေါက်လည်း မရှိတဲ့ အခါကျတော့ ညပိုင်း ဆယ်ဇင်းနဲ့ အရမ်းနီးလာတဲ့ နေရာအထိ ရောက်လာတယ်။ ဖိုးစည်ကုန်း အထိ ရောက်လာတယ်။ ရောက်လာပြီး မနေ့က ည ၇ နာရီလောက်ကထိ စဖြစ်လိုက်တာ ဒီနေ့ နံနက် ၆ နာရီလောက်ထိ ပစ်သံတွေ ကြားရတယ်။ ၈ နာရီလောက်က လေယာဥ်လာသွားတယ်။ ဗုံး ၃ လုံးလောက်ကျဲသွားတယ်။ တိုက်လေယာဥ် ကတော့ ပြန်သွားပြီ တိုက်ပွဲကတော့ မငြိမ်သေးဘူး ပစ်သံတွေ ကြားနေရတုန်းပဲ တိုက်လေယာဥ်နဲ့ ဗုံးကျဲသွားတာက ဆယ်ဇင်းရွာအထွက်က ရွှေမှော်တွေ ရပ်ကွက်တွေနားကိုကျဲသွားတာ စစ်ကောင်စီဘက်က ဒီနေ့နံနက်လောက်အထိ ၂၅ ယောက်လောက်ကျတယ်ပြောတယ်” ဟု ဒေသခံ ပြည်သူ တစ်ဦးကပြောဆိုသည်။
အကြမ်းဖက် စစ်တပ် စစ်ကြောင်းသည် ဆယ်ဇင်းရွာ ဒေသကို ဟောင်ပါးရွာဘက်မှ ဇူလိုင်လ ၁၆ ရက်နေ့ နံနက်ပိုင်းက စတင်ကာ စစ်ကြောင်းထိုး နေခြင်းဖြစ်ပြီး KIA တပ်ဖွဲ့များက ပိတ်ဆို့ တိုက်ခိုက်နေကြောင်း၊ အကြမ်းဖက် စစ်တပ် စစ်ကြောင်းကို စစ်ကူရန် ဟောင်ပါးရွာဘက်မှ ထပ်မံ အင်အား ဖြည့်တင်းနေခြင်းကြောင့် ယနေ့ နံနက်ပိုင်းထိ တိုက်ပွဲ ပြင်းထန်နေခြင်းဖြစ်ကြောင်း သိရသည်။
ဓာတ်ပုံ- အကြမ်းဖက်စစ်ကောင်စီ၏ တိုက်လေယာဉ်တချို့။ (ပုံအဟောင်းဖြစ်သည်)
