ရန်ကုန်၊ ဇူလိုင် ၁၇
မန္တလေးရှိ စစ်တပ်ပိုင်မြ၀တီဘဏ်ကို ယမန်နေ့ညပိုင်း မိုင်းခွဲတိုက်ခိုက်ခဲ့ပြီး စစ်သားသေဆုံးမှုရှိနိုင်ကြောင်း၊ စစ်တပ်သတင်းပေးနှင့်ပျူစောထီးများ အခြေပြုနေသော ပြည်ကြီးတံခွန်အရန်မီးသတ်စခန်းကိုလည်း ဗုံးခွဲခဲ့ကြောင်း K.C.G.F မှ ဗိုလ်မြွေပွေးက ရန်ကုန်ခေတ်သစ်သတင်းဌာနထံ ပြောဆိုသည်။
ဇူလိုင်လ ၁၆ ရက်နေ့ ည ၇ နာရီခွဲအချိန်တွင်တွင် မန္တလေးမြို့ ပြည်ကြီးတံခွန်မြို့နယ် ၇၈လမ်း ၁၁၄ ၁၁၅လမ်း၊ မြဝတီမင်းကြီးလမ်း နှင့် သာယာဝတီလမ်းကြားရှိ စစ်ကောင်စီ ပိုင် မြဝတီဘဏ် အစောင့် လုံခြုံရေးဘန်ကာကို မန္တလေးမြို့ပြ မဟာမိတ် ၃ ဖွဲ့က ရှေ့ထွက်မိုင်းဖြင့် ပစ်ပေါက် တိုက်ခိုက်ရာ ဘဏ်အစောင့် စစ်သား ၂ ဦး သေဆုံးသွားကြောင်း သိရှိရသည်။
အလားတူ မန္တလေးမြို့ ပြည်ကြီးတံခွန်မြို့နယ်(ဃ)ရပ်ကွက် ၅၉ D လမ်းနှင့် ၁၁၇ ကျန်စစ်သားလမ်းထောင့်ရှိ (ဃ) ရပ်ကွက်ရှိ စစ်တပ်သတင်းပေးများနှင့် ပျူစောထီးများ အခြေပြုစခန်းဖြစ်သော အရန်မီးသတ်စခန်းကို တတိယအကြိမ် အဖြစု လက်ပစ်ဗုံးဖြင့် ပစ်ခတ်ရာ မီးသတ်ရုံး အဆောက်ဦးနှင့် စစ် တပ်သတင်းပေး တစ်ဦး၏ အိမ်စီးကားတို့ ထိခိုက်ပျက်စီးခဲ့ကြောင်း၊ ဗုံးပေါက်ပြီး အဆိုပါရုံးအတွင်းမှ ပျုစောထီးနှင့် စစ်တပ်သတင်းပေးများက တုတ် ၊ ဓါးများ ကိုင်စွဲ၍ လိုက်လံဖမ်းဆီးသော်လည်း အထိအခိုက်မရှိဟု ဗိုလ်မြွေပွေးက ဆိုသည်။
အဆိုပါတိုက်ခိုက်မှုကို K.C.G.F-MRRF-MSMF-(MDY-UGတပ်ပေါင်းစု)က ဆောင်ရွက်ခြင်းဖြစ်ကြောင်း သိရှိရသည်။
“ပြည်သူနဲ့ဆန့်ကျင်ဖက်မှာရှိတဲ့မည်သည့်အဖွဲ့စည်းလူပုဂ္ဂိုလ်ကို မဆို ထိရောက် စွာအပြစ်ပေးမယ်ဆိုတာ အရန် မီးသတ်စခန်းဟာ နမူနာပါ။ စစ်ကောင်စီနဲ့ပူးပေါင်းပြီး ပြည်သူကို ဖိနှိပ်နေသူမှန်သမျှ ကျနော်တို့က တိုက်ခိုက်မှာပါ” ဟု ဗိုလ်မြွေပွေးက ဆိုသည်။
ဓာတ်ပုံ- အကြမ်းဖက် စစ်ကောင်စီလုံခြုံရေးများ စောင့်ကြပ်နေသည့် မန္တလေး မြ၀တီဘဏ်။ (ပုံအဟောင်းဖြစ်သည်)
