ရန်ကုန်၊ ဩဂုတ် ၁၄
စစ်ကိုင်းတိုင်း၊ တမူးမြို့၊ စန္ဒကူးရပ်ကွက်ရှိ ကုန်သည် ဂေါ်ရခါးလူမျိုးတစ်ဦး၏ နေအိမ် ယမန်နေ့ညပိုင်းက ဓားပြတိုက်ခံရပြီး သိန်း ၈၀၀ နှင့် ရွှေ ၁၀ ကျပ်သား ပါသွားကြောင်း ဒေသသတင်းရင်းမြစ် Central Intelligence Agency Tamuက ရန်ကုန်ခေတ်သစ်သတင်းဌာနသို့ ပြောဆိုသည်။
ဩဂုတ်လ ၁၃ ရက်နေ့ ည ၈နာရီကျော်အချိန် တမူးမြို့၊ စန္ဒကူးရပ်ကွက် ဝင်းဝင်းရေခဲစက်လမ်းကြားရှိဂေါ်ရခါးလူမျိုးအိမ်ကို လူ ၅ ဦးက ဓားမြှောင်များဖြင့် ဝင်ရောက်လာပြီး အိမ်ပိုင်ရှင်ကို ဓားဖြင့် ထောက်ကြောင်း၊ ၄၅ မိနစ်ခန့် တစ်အိမ်လုံးရှိ ပစ္စည်းများကို ရှာဖွော ဓားပြတိုက်ရာတွင် ငွေကျပ်သိန်း၈၀၀ခန့်နှင့်ရွှေ၁၀ကျပ်သားခန့်ပါသွားကြောင်း သိရှိရသည်။
“လူတွေကိုတော့ ဘာမှ မလုပ်သွားဘူး။ ပစ္စည်းတွေပဲ ယူသွားတာ” ဟု ဒေသသတင်းရင်းမြစ် Central Intelligence Agency Tamuက ရန်ကုန်ခေတ်သစ်သတင်းဌာနသို့ ပြောဆိုသည်။
တမူးမြို့သည် အိန္ဒိယ-မြန်မာနယ်စပ်မြို့ဖြစ်ပြီး မြို့နယ်ပတ်ဝန်းကျင်တွင် PDF များနှင့် စစ်ကောင်စီတပ်များ တိုက်ပွဲများ အပြန် အလှန်ဖြစ်ပွားမှုများရှိနေသည့် မြို့နယ်လည်းဖြစ်ကာ တမူးမြို့ပေါ်ကိုမူ စစ်ကောင်စီတပ်များ က အဓိက ထိန်းချုပ်ထားကြောင်း သိရှိရသည်။
ဓာတ်ပုံ- ယမန်နေ့ညပိုင်း ဓားပြတိုက်ခံရသော နေအိမ်။
