ရေဦး၊ ဖလံဂုဏ်ရွာမှ လူငယ်နှင့် ပြည်သူ ၆ ဦးကို စစ်တပ်က ပစ်သတ်ပြီး လူငယ် ၁၅ ဦးကို ဖမ်းဆီးသွားမှု သတင်းအစအနမရတော့ဘဲ ဖမ်းဆီးခံလူငယ်များ ပျောက်ဆုံးနေ
ရန်ကုန်၊ မတ် ၁၆
စစ်ကိုင်းတိုင်း၊ ရေဦးဦးမြို့နယ်၊ ဖလံဂုဏ်ရွာမှ ပြည်သူနှင့် လူငယ် ၆ ဦးကို စစ်တပ်က ပစ်သတ်ပြီး လူ ငယ် ၁၅ ဦးကို ဖမ်းဆီးသွားခဲ့ရာ ၁၂ ရက်ကြာသည်အထိ သတင်း အစအနမရတော့ဘဲ ဖမ်းဆီးခံလူငယ်များ ပျောက်ဆုံးနေကြောင်း ဒေသပြည်သူများက ရန်ကုန်ခေတ်သစ် သတင်း ဌာနထံ သို့ ပြောကြားသည်။
မတ်လ ၄ ရက်နေ့ ရေဦးမြို့မှ စစ်ကားကြီး ၂ စီးဖြင့် ထွက်လာသော စစ်ကြောင်းက သံသည်ကျေးရွာမှ တဆင့် ဖလံဂုဏ်ကျေး ရွာသို့ ဝင်ရောက်စီးနင်းခဲ့ကြောင်း၊ ကျေးရွာလုံခြုံရေးစောင့်ပေးနေသူ ပြည်သူ့ကာကွယ်ရေးတပ်ဖွဲ့ဝင် ၅ ဦးကို ဝင်ရောက်ပစ်ခတ်သတ်ဖြတ်ခဲ့ပြီး နေအိမ်တစ်လုံးကို မီးရှို့ဖျက်ဆီးခဲ့ကြောင်း၊ ကျေးရွာသား ၁ ဦးမှာလည်း စစ်တပ်က ပစ်ခတ်မှုကြောင့် သေဆုံးခဲ့ကြောင်း၊ ရွာသူ၊ ရွာသားများမှာ ထွက်ပြေးတိမ်းရှောင်ခဲ့ရကြောင်း သိရသည်။
ယင်းနောက် မတ်လ ၄ ရက်နေ့တွင်ပင် စစ်တပ်က ကျေး ရွာမှ လူငယ် ၁၅ ဦးကို ဖမ်းဆီးခဲ့ကြောင်း၊ ဖမ်းဆီးထားသူများကို စစ်ကြောင်း နှင့်အတူ ခေါ်ဆောင်သွားခဲ့ကြောင်း သိရှိရသည်။
“အဲဒီနေ့က စစ်ခွေး တွေဝင်တော့ ရွာထဲကနေ အားလုံး ထွက် ပြေးကြတာ၊ ပြေးရင်းနဲ့ စစ်ခွေးက ပစ်လို့ သေတဲ့ လူတစ်ယောက်ရှိတယ်၊ ပြည်သူထဲက ရွာသားထဲကပေါ့၊ စာသင်ကျောင်းမှာ ပစ်တာမျိုးမဟုတ်ဘူး၊ စာသင်ကျောင်းမှာက ရွာလုံခြုံရေး လူငယ် ၅ ဦးအသတ်ခံရတယ်။ နောက်ထပ် သေတဲ့သူက ရွာထဲကို စစ်ခွေးဝင်လာတော့ ဆိုင်ကယ်နဲ့ ရွာအပြင်ကို ပြေးရင်း အဲဒါကို အပစ်ခံရတာ၊ ပစ်ခံလိုက်ရပြီး အဲဒီလူက ဒဏ်ရာရပြီး ၃ ရက်မြောက်နေ့မှာ သေသွားတယ်၊ နာမည်က ကိုသိန်းဦး၊ အသက်က ၄၀ ဝန်း ကျင် လောက်ရှိမယ်။ နောက်ပြီးတော့ စစ်ခွေးတွေဖမ်းသွားတာ ယောက်ျားလေးတွေ အရွယ် ကောင်းတွေ ချည်းပဲ၊ ၁၅ ယောက်ရှိတယ်၊ အခုထိဘာမှ အဆက်အသွယ်မရဘူး၊ ဘယ်ရောက် နေမှန်းလဲမသိဘူး။ တော်တော် စိတ်ပူနေရတယ်၊ ဓားစာခံသဘောမျိုးဖမ်းသွားတာပါ၊ ယောက်ျားလေး ၁၅ ယောက်ပါသွား တာ၊ မိန်းကလေးတွေတော့ ပါမသွားဘူး” ဟု ဒေသနေပြည်သူတစ်ဦးက ရန်ကုန်ခေတ်သစ် သတင်းဌာန ထံသို့ ပြောကြားသည်။
စစ်တပ်၏ ဖမ်းဆီးမှု ခံရသူများမှာ ကိုစိုးထွန်း၊ ကိုမောင်နိုင်၊ ကိုကျော်ဆွေ၊ ကိုကျော်သူနှင့် ၎င်း၏ ညီ၊ ကိုဖိုးထိုက် တို့အပါအဝင် လူငယ် ၁၅ ဦးဖြစ်ကြောင်း သိရသည်။
