ဂျပန်နိုင်ငံ လွှတ်တော်နှစ်ရပ်၏ ဒုတိယဥက္ကဋ္ဌများ၊ လွှတ်တော်အမတ်သမဂ္ဂဥက္ကဋ္ဌ တို့ နှင့် NUG နိုင်ငံခြားရေး ဝန်ကြီး ဒေါ်ဇင်မာအောင်တို့ တွေ့ဆုံ ဆွေးနွေး
ရန်ကုန်၊ နိုဝင်ဘာ ၂၂
ဂျပန်နိုင်ငံ လွှတ်တော်အမတ်များသမဂ္ဂ ဥက္ကဋ္ဌ၊ အထက် လွှတ်တော်နှင့် အောက်လွှတ်တော်တို့၏ ဒုတိယဥက္ကဋ္ဌများနှင့် အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင်တို့ တွေ့ဆုံ ဆွေးနွေးခဲ့ကြောင်း သိရသည်။
နိုဝင်ဘာလ ၂၁ ရက်နေ့ နံနက်ပိုင်း အမျိုးသားညီညွတ်ရေးအစိုးရ၊ နိုင်ငံခြား ရေးဝန်ကြီးဌာန၊ ပြည်ထောင်စုဝန်ကြီး ဒေါ်ဇင်မာအောင်သည် မြန်မာ့ဒီမိုကရေစီအရေး ထောက်ခံအားပေးသော လွှတ်တော်အမတ်များသမဂ္ဂ ဥက္ကဋ္ဌနှင့် အတွင်းရေးမှူးတို့ကို Mr.Nakagawa Masharu ၏ ရုံးခန်းသို့ သွားရောက် တွေ့ဆုံခဲ့ကြောင်း သိရသည်။
မြန်မာ့ဒီမိုကရေစီ အသွင်ကူးပြောင်းရေးအတွက် အစဉ်တစိုက်ကြိုးပမ်းဆောင်ရွက်ပေးမှုများအား ကျေးဇူးတင်ကြောင်းနှင့် ဆက်လက်ပြီး ဖက်ဒရယ်ဒီမိုကရေစီပြည်ထောင်စု ပေါ်ပေါက်ရေးအတွက် အမျိုးသားညီညွတ်ရေးအစိုးရနှင့် လက်တွဲကာ ကူညီဆောင်ရွက်ပေးစေလိုကြောင်း တိုက်တွန်းပြောကြားခဲ့ကြောင်း သိရှိရသည်။
အလားတူ ယင်းနေ့ မွန်းလွဲပိုင်းတွင် အမျိုးသားညီညွတ်ရေးအစိုးရ ၊နိုင်ငံခြား ရေးဝန်ကြီး ဒေါ်ဇင်မာအောင်က ဂျပန်အထက်လွှတ်တော်မှ ဒုတိယဥက္ကဋ္ဌ Mr.Kaieda Banri ၊ အောက်လွှတ်တော် ဒုတိယဥက္ကဋ္ဌ Mr.Nakahama Hiroyuki တို့ကို အထက်လွှတ်တော် အဆောက်အအုံတွင် သွားရောက်တွေ့ဆုံခဲ့ကြောင်းသိရသည်။
ဝန်ကြီး ဒေါ်ဇင်မာအောင်က မြန်မာနိုင်ငံတွင် စစ်တပ်က မတရားသဖြင့် တိုင်းပြည်အာဏာလုယူထားမှုအပေါ် ကန့်ကွက်ကြောင်း၊စစ်အာဏာသိမ်းမှုအား လက်မခံကြောင်း တညီတညွတ်တည်း ဆုံးဖြတ်ချက်များချမှတ်ခဲ့ကြသည့် လွှတ်တော်နှစ်ရပ်လုံးမှ တာဝန်ရှိသူများကို ကျေးဇူးတင်ကြောင်း၊ မြန်မာ့ဒီမိုကရေစီအရေး ကြိုးပမ်းမှုများတွင် အမျိုးသားညီညွတ်ရေးအစိုးရနှင့် လက်တွဲကာ မြန်မာပြည်သူလူထုအား လိုအပ်သောကူညီထောက်ပံ့မှုများအား ဆောင်ရွက်ပေးစေလိုကြောင်း တိုက်တွန်းပြောကြားကာ ရင်းရင်းနှီးနှီး တွေ့ဆုံဆွေးနွေးခဲ့ကြောင်း သိရှိရသည်။
