ဖားကန့် မရှီကတောင်ရပ်ကွက်ရှိ Happy KTV တွင် ပျော်ပါးနေသည့် စစ်ကောင်စီ တပ်ဖွဲ့ဝင်များကို KIA နှင့် PDF တပ်များက ပစ်ခတ်တိုက်ခိုက်၊ ကား ၁ စီး သိမ်းဆည်းရရှိ
ရန်ကုန်၊ ဧပြီ ၃
ကချင်ပြည်နယ်၊ ဖားကန့်မြို့နယ်၊ မရှီကတောင်ရပ်ကွက်ရှိ Happy KTV တွင် ညလုံးပေါက် ပျော်ပါးနေသည့် စစ်ကောင်စီတပ်ဖွဲ့ဝင်များကို KIA နှင့် PDF ပူးပေါင်းတပ်များက ပစ်ခတ်တိုက်ခိုက်ရာ စစ်ကောင်စီတပ်ဘက်မှ ထိခိုက်သေဆုံးမှုများရှိနိုင်ကြောင်း KIA နှင့် နီးစပ်သော သတင်းရင်းမြစ်က ပြောဆိုသည်။
ဧပြီလ ၃ ရက်နေ့ နံနက် ၆ နာရီအချိန် ဖားကန့် ၊ မရှီကတောင်ရပ်ကွက်ရှိ Happy KTV တွင် ညလုံးပေါက် ပျော်ပါးပြီး ပြန်လည် ထွက်လာသည့် စစ်ကောင်စီတပ်ဖွဲ့ဝင်များကို အသင့်စောင့်ဆိုင်းနေသည့် KIAနှင့် PDF တပ်များက ဝင်ရောက်တိုက်ခိုက်ခဲ့ကြောင်း၊ အပြန်အလှန် ပစ်ခတ်မှုဖြစ်ပွားခဲ့ပြီး လက်နက်ကြီး လက်နက်ငယ်များဖြင့် ပစ်ခတ်ခဲ့ကြောင်း၊ စစ်ကောင်စီတပ်ဘက်မှ ကား ၁ စီးကျန်ရစ်ခဲ့ပြီး သိမ်းဆည်းရရှိခဲ့ကြောင်း သိရှိရသည်။
“အဲဒီ Happy KTV မှာ မနှစ်ကလည်း စစ်ကောင်စီဘက်က လူတွေ အပစ်ခံရပြီးသေခဲ့တာရှိတယ်။ ဒီမနက်လည်း ညလုံး ပေါက် ပျော်ပါးပြီး ပြန်ထွက်လာချိန်မှာ ပစ်ခတ်ကြတာ။ အပြန်အလှန်ပစ်ခတ်မှုဖြစ်တယ်။ ဖောဝီးကားတစ်စီး ကျန်ရစ်တယ်။ စစ်တပ်ဘက်က သေဆုံးထိခိုက်မှုရှိနိုင်တယ်။ အတိအကျတော့မသိဘူး” ဟု KIA နှင့်နီးစပ်သော သတင်းရင်းမြစ်ကဆိုသည်။
ဖားကန့်ဒေသပြည်သူများကလည်း ယနေ့ နံနက် ၆ နာရီအချိန် မရှီကတောင်ရပ်ကွက်တွင် ပစ်ခတ်သံများ ထွက်ပေါ်လာခဲ့ကြောင်း အတည်ပြုပြောဆိုကြပြီး နှစ်ဖက် ထိခိုက်သေဆုံးမှု အခြေအနေ မသိရှိရဟု ပြောဆိုကြသည်။
![Pinterest](https://pinterest.com/pin/create/button/?url=https://yktnews.com/2024/04/154852/&media=https://yktnews.com/wp-content/uploads/2024/04/434472041_780672910826984_8584662329587042386_n.jpg&description="အဲဒီ Happy KTV မှာ မနှစ်ကလည်း စစ်ကောင်စီဘက်က လူတွေ အပစ်ခံရပြီးသေခဲ့တာရှိတယ်။ ဒီမနက်လည်း ညလုံး ပေါက် ပျော်ပါးပြီး){kind=link}