ရန်ကုန်၊ ဧပြီ ၁၁
ကချင်ပြည်နယ်၊ ဖားကန့်မြို့နယ်၊ နန့်ယားစစ်ကောင်စီတပ်စခန်းကို KIA ဦးဆောင်သော တော်လှန်ရေးတပ်များက တိုက်ခိုက်သိမ်းပိုက်ရာတွင် စစ်ကောင်စီတပ်ဘက်မှ စစ်သုံ့ပန်း ၃၀ ဦး ဖမ်းဆီးရရှိပြီး တချို့မှာ ထွက်ပြေးသွားကြောင်း KIA သတင်းရင်းမြစ်က ပြောဆိုသည်။
ဧပြီလ ၉ ရက်နေ့ နံနက် ၆ နာရီ အချိန်မှစတင်ပြီး KIA ဦးဆောင်သော မဟာမိတ်တပ်များက မြစ်ကြီးနား-ဖားကန့်လမ်းပေါ်ရှိ အကြမ်းဖက်စစ်ကောင်စီ၏ နန့်ယားစစ်တပ် ဂိတ်စခန်းကို ဝင်ရောက်တိုက်ခိုက်ခဲ့ကြောင်း၊ တိုက်ပွဲ ပြင်းထန်စွာဖြစ်ပွားခဲ့ပြီး စစ်တပ်က လေကြောင်းတိုက်ခိုက်ခြင်း၊ လက်နက်ကြီးများ ပစ်ခတ်ခြင်းဖြင့် အသည်းအသန် ခုခံခဲ့သော်လည်း ဧပြီလ ၁၀ ရက်နေ့ ညပိုင်းနှင့် ဧပြီလ ၁၁ ရက်နေ့ နံနက်ပိုင်းတွင် အပြီး သတ် တိုက်ခိုက် သိမ်းပိုက်နိုင်ခဲ့ကြောင်း သိရှိရသည်။
“အမျိုးသမီးစစ်သည် ၅ ဦးနဲ့ အမျိုးသားစစ်သည် ၂၅ ဦးကို စစ်သုံ့ပန်းအဖြစ် ဖမ်းဆီးရရှိပါတယ်။ လက်နက်မချဘဲ ထွက်ပြေးကြတာကို ပြန်လည် ဖမ်းဆီးရရှိတာပါ။ တချို့လည်း ထွက်ပြေးလွတ်မြောက်သွားတယ်။ သူတို့ဘက်က စစ်တပ်အရာရှိတချို့နဲ့ ပြည်သူ့စစ်တွေက ဖမ်းဆီးထားတဲ့ ယမ်းကားထဲ ဗုံးကျ ပေါက်ကွဲပြီး ဒဏ်ရာ အပြင်းအထန်ရသွားကြတယ်။ စခန်းကိုလည်း ရှင်းလင်းနိုင်ခဲ့ပြီဖြစ်ပါတယ်။ လမ်းကိုလည်းထိန်းချုပ်ထားပါတယ်” ဟု KIA သတင်းရင်းမြစ်က ပြောဆိုသည်။
ဖမ်းဆီးရရှိထားသော စစ်သုံ့ပန်းများကို ကောင်းမွန်စွာ ထိန်းသိမ်းထားပြီး ထွက်ပြေးလွတ်မြောက်သွားသော စစ်ကောင်စီတပ်ဖွဲ့ဝင်များကိုလည်း နယ်မြေရှင်းလင်းရေးဖြင့် ရှင်းလင်းမည်ဖြစ်ကြောင်း KIA သတင်းရင်းမြစ်၏ အဆိုအရ သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
