ကရင်ပြည်နယ်၊ ကြာအင်းဆိပ်ကြီးမြို့နယ်၊ ထိုင်း-မြန်မာနယ်စပ် ဘုရားသုံးဆူ နယ်စပ်ကုန်သွယ်ရေးဂိတ် ယာယီပိတ်
ရန်ကုန်| ဇွန် ၂၂
ကရင်ပြည်နယ် ကြာအင်းဆိပ်ကြီးမြို့နယ်ရှိ ထိုင်း-မြန်မာ နပ်စပ်ကုန်သွယ်ရေးဂိတ်တစ်ခုဖြစ်သော ဘုရားသုံးဆူဂိတ်ကို ပြီးခဲ့သည့် ဇွန် ၁၇ ရက်နေ့က နှစ်ဖက်စလုံးက ယာယီပိတ်လိုက်ခြင်းကြောင့် ကုန်ပစ္စည်းတင်ပို့/ တင်သွင်းမှုများ ရပ်တန့်သွားကြောင်း ဒေသခံများနှင့် ကုန်သွယ်ရေး လုပ်ကိုင်နေသူများထံမှ သိရသည်။
အဆိုပါ ဘုရားသုံးဆူနယ်စပ်ဂိတ်ကို ဇွန် ၁၇ ရက်နေ့ နံနက်ပိုင်းမှ စတင်ကာ မြန်မာဘက်ခြမ်းမှ ယာယီပိတ်လိုက်ပြီးနောက် အလာတူ ထိုင်းဘက်ကပါ ထပ်မံပိတ်လိုက်ခြင်းကြောင့် နှစ်နိုင်ငံကုန်သွယ်မှုများ ရပ်တန့်သွားကြောင်း ဘုရားသုံးဆူမြို့ခံများနှင့် ကုန်သည်များထံမှ သိရသည်။
” မြန်မာဘက်က ပိတ်လိုက်တာပါ။ ဘာကြောင့် ပိတ်တာကိုတော့ ထုတ်ပြန်ကြေညာတာ မရှိပါဘူး။ နောက်ပြီး သိပ်မကြာဘူး။ ထိုင်းဘက်ကပါ ထပ်ပိတ်လိုက်တာ ဖြစ်တယ်” ဟု ဒေသခံကုန်သည်တစ်ဦးက ပြောသည်။
လက်ရှိတွင် မြန်မာဘက်က ဘုရားသုံးဆူ ဂိတ်ပိတ်ထားခြင်းကြောင့် ကုန်တင်ယာဉ်များ ဖြတ်သန်းသွားလာ၍ မရတော့သဖြင့် ကုန်စည်စီးဆင်းမှုများ ရပ်တန့်သွားကာ ထိုင်းနိုင်ငံဘက်မှ မြန်မာနိုင်ငံဘက်သို့ တင်သွင်းသည့် ကုန်ပစ္စည်းများမှာ ဈေးနှုန်းမြင့်တက်လာသဖြင့် ဒေသခံပြည်သူများ အခက်အခဲများနှင့် ကြုံတွေ့နေကြောင်း သိရသည်။
လတ်တလော မြ၀တီမြို့နယ်ဘက်တွင် မိုးရွာသွန်းမှုများနေ၍ ကုန်တင်ကားများ သွားလာရခက်ခဲမှုများကြောင့် ဘုရားသုံးဆူဂိတ်ကို ဝင်ထွက်သွားလာမှု ပိုများနေကြောင်း ဒေသခံများက ပြောသည်။
” အခုဆိုရင် မြ၀တီဘက်ကလည်း သွားလာလို့ မရသလို ဒီဘက်မှာလည်း ပိတ်လိုက်တော့ အိမ်သုံးကုန်နဲ့ စားသောက်ကုန်တွေ စျေးတက်သွားတာ ရှိနေတယ်”ဟု ဒေသခံနောက်တစ်ဦးက ပြောသည်။
လက်ရှိတွင် ထိုင်း- မြန်မာနယ်စပ် ကုန်သွယ်ရေးဖြစ်သည့် မြဝတီနယ်စပ်ဂိတ်အပါအဝင် တာချီလိတ်၊ မယ်ဆိုင်၊ မြဝတီ- မဲဆောက်၊ ထီးခီး-နမ့်ဖုရော်၊ မြိတ်-မောတောင်နှင့် ကော့သောင်း-ရနောင်းစသည့် နယ်စပ်ဂိတ်တို့တွင် တိုက်ပွဲ အခြေအနေနှင့် လမ်းပန်းဆက်သွယ်ရေးအခက်ခဲကြောင့် ကုန်စည်စီးဆင်းမှုများ နှောင့်နှေးလျက်ရှိကြောင်း ဒေသခအခြေစိုက် ပြည်သူများထံမှ သိရသည်။
