မောင်တော နခခ ၅ မှ ထွက်ပြေးနေသော အမှတ် ၂၂ တပ်မမှူး ဗိုလ်မှူးကြီးအောင်နေမျိုးကို အခေါက်ရွှေ၊ ရွှေထည်တချို့ အပါအဝင် ငွေကျပ် သိန်း ၈၀၀ ခန့်နှင့်အတူ အသေဖမ်းဆီးရရှိ

ဘင်္ဂလားဒေ့ရှ်သို့ ထွက်ပြေးရန် ကြိုးစားစဉ် စစ်တပ်၏မိုင်းကို ပြန်နင်းမိ၍ သွေးထွက်လွန်ကာ သေဆုံးခဲ့

ရန်ကုန်၊ ဒီဇင်ဘာ ၁၉

ရခိုင်ပြည်၊ မောင်တောမြို့နယ် အမှတ် ၅ နယ်ခြားစောင့်တပ်ဖွဲ့ခွဲ(နခခ-၅) မှ ထွက်ပြေးနေသော အမှတ် ၂၂ တပ်မမှူး ဗိုလ်မှူးကြီးအောင်နေမျိုးကို အခေါက်ရွှေ၊ ရွှေထည်တချို့ အပါအဝင် ငွေကျပ် သိန်း ၈၀၀ ခန့်နှင့်အတူ အသေဖမ်းဆီးရရှိကြောင်း AA က သတင်းထုတ်ပြန်သည်။

ဒီဇင်ဘာလ ၁၇ ရက်နေ့ မွန်းတည့် ၁၂ နာရီအချိန် နခခ-၅ မှ လက်နက်ချအညံ့မခံဘဲ ထွက်ပြေးလွတ်မြောက်နေသော အမှတ် ၂၂ ခြေမြန်တပ်မဌာနချုပ် (တမခ-၂၂) တပ်မမှူး ဗိုလ်မှူးကြီး အောင်နေမျိုးကို အခေါက်ရွှေတုံး၊ ရွှေထည်တချို့ အပါအဝင် ငွေကျပ် သိန်း ၈၀၀ ခန့်နှင့်အတူ မောင်တောမြိုနယ်၊ ရွှေဇားကပ္ပကောင်းချောင်းနား ပုစွန်ကန် တဲထဲ၌ အသေဖမ်းဆီးရမိခဲ့ကြောင်း၊ စစ်တပ်နှင့် အဆက်အသွယ်ရှိနေသော မွတ်စလင်များ၏ အကူအညီဖြင့် ဘင်္ဂလားဒေ့ရှ်သို့ ထွက်ပြေးရန် ကြိုးစားစဉ် မိုင်းနင်းမိ၍ သေဆုံးခြင်းဖြစ်ကြောင်း သိရှိရသည်။

AA က ဒီဇင်ဘာလ ၈ ရက်နေ့၊ နံနက် ၉ နာရီ ၃၀ မိနစ်အချိန် မောင်တောမြို့တွင် တစ်ခုတည်းကျန်ရှိနေခဲ့သော နခခ ၅ စခန်းကြီးကို အပြီးသတ်ချေမှုန်း တိုက်ခိုက်သိမ်းပိုက်နိုင်ခဲ့ရာတွင် အဆိုပါစခန်းမှ လက်နက်ချအညံ့မခံဘဲ ကစဉ့်ကလျား ထွက်ပြေးနေကြသော အကြမ်းဖက် ဖက်ဆစ် စစ်ကောင်စီ တပ်ဖွဲဝင်များတွင် ဗိုလ်မှူးကြီး အောင်နေမျိုးပါဝင်ခဲ့ကြောင်း၊ ဒီဇင်ဘာလ ၈ ရက်နေ့ ညနေပိုင်း ဘူးသီးတောင်မြို၊ အမှတ် ၁၅ စစ်ဆင်ရေးကွပ်ကဲမှုဌာနချုပ် (စကခ-၁၅) စကခမှူး ဗိုလ်မှူးချုပ် သူရိန်ထွန်းနှင့်အဖွဲ့ကို မောင်တော၊ ရွှေတောင်ကျေးရွာ အနောက်ဘက်တွင် အရှင် လက်ရဖမ်းဆီးရမိခဲ့ကြောင်း သိရှိရသည်။

ဗိုလ်မှူးကြီး အောင်နေမျိုးသည် စစ်တပ်ဘက်တော်သား မွတ်စလင်များ၏ ဘင်္ဂလားဒေ့ရှ်နိုင်ငံအတွင်းသို့ ထွက် ပြေးလွတ်မြောက်ရန် ကြိုးစားခဲ့သော်လည်း အာရက္ခတပ်တော် လုံခြုံရေးတပ်ဖွဲ့ဝင်များနှင့် ကမ်းခြေ စောင့်တပ်များ၏ အချိန်ပြည့် ဝိုင်းရံပိတ်ဆို ရှာဖွေမှုများအောက်တွင် လွတ်မြောက်ရန် အခွင့် အရေးမရခဲ့ဘဲ ၎င်းတို့ထောင်ထားသော မိုင်းကိုနင်းပြီးနောက် သွေးထွက်လွန်ကာ သေဆုံးခဲ့ရခြင်းဖြစ်ကြောင်း သိရှိရသည်။

ဗိုလ်မှူးကြီး အောင်နေမျိုးသည် စစ်တက္ကသိုလ် အပတ်စဉ် ၄၁ ကျောင်းဆင်းဖြစ်ကာ ကရင်ပြည်နယ်၊ ဘားအံမြို့နယ်အခြေစိုက် အမှတ် ၂၂ ခြေမြန်တပ်မ ဌာနချုပ်၏ တပ်မမှူးအဖြစ် တာဝန်ထမ်းဆောင်စဉ် မောင်တောမြို့သို့ တာဝန် ချထားခြင်းခံရသူဖြစ်ကြောင်း၊ သေဆုံးချိန်တွင် အသက် ၅၀ ကျော်န်းကျင်ရှိပြီး စစ်ခေါင်းဆောင် မင်းအောင်လှိုင်က ၂၀၂၄ ခုနှစ် ဇန်နဝါရီလ ၄ ရက်နေ့တွင် တပ်မတော်ဆိုင်ရာ စွမ်းဆောင်ရည် ဂုဏ်ထူးဆောင်တံဆိပ်ဖြစ်သော စစ်မှု ထမ်း ကောင်းတံဆိပ်ကို ချီးမြှင့်ခံထားရသူဖြစ်ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar