စစ်ကိုင်းတွင် “PDF တွေ ငါ့ကို သတ်ချင်ရင် ၁၀ နှစ်ကြိုးစား” ဟု ကြွေးကြော်ထားသည့် ရဲတပ်ကြပ်ဟောင်း၊ ပျူစောထီး ခေါင်းဆောင် လွှမ်းမိုးနိုင် ပစ်ခတ်ခံရပြီး သေဆုံး၊ အလောင်းနှင့်အတူ မူးယစ်ဆေးဝါးများပါ သိမ်းဆည်းရရှိ
ရန်ကုန်၊ ဇန်နဝါရီ ၅
စစ်ကိုင်းတိုင်း၊ စစ်ကိုင်းမြို့နယ်တွင် “PDF တွေ ငါ့ကို သတ်ချင်ရင် ၁၀ နှစ်ကြိုးစား” ဟု ကြွေးကြော်ထားသည့် ရဲတပ်ကြပ်ဟောင်း၊ ပျူစောထီး ခေါင်းဆောင် လွှမ်းမိုးနိုင် ပစ်ခတ်ခံရပြီး ပွဲချင်းပြီး သေဆုံးခဲ့ကာ အလောင်းနှင့်အတူ မူးယစ်ဆေးဝါးများကိုပါ သိမ်းဆည်းရရှိခဲ့ကြောင်း လင်းယုန်ညီနောင် ပြောက်ကျားတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇန်နဝါရီလ ၃ ရက်နေ့ နံနက် ၁၀ နာရီခန့်အချိန် စစ်ကိုင်းမြို့နယ်၊ မြင်းမွေးရွာတွင် နေထိုင်သော ပျူစောထီး ခေါင်းဆောင်လည်းဖြစ်၊ ရဲတပ်ကြပ်ဟောင်းနှင့် ကျေးရွာ အုပ်ချုပ်ရေးမှူးဖြစ်သူ လွှမ်းမိုးနိုင် သည် ၎င်းနေအိမ်မှ ကားဖြင့် ထွက်လာစဉ် တော်လှန်ရေး တပ်ဖွဲ့များက လမ်း တစ်နေရာ၌ ဝိုင်းဝန်း ပိတ်ဆို့ ဖမ်းဆီးခဲ့ကြောင်း၊ သို့ရာတွင် လွှမ်းမိုးနိုင်က ခုခံထွက်ပြေးသွားကြောင့် ပစ်ခတ်ဖမ်းဆီးရာမှ ပွဲချင်းပြီး သေဆုံးခဲ့ကြောင်း သိရသည်။
သေဆုံးသွားသော ပျူစောထီး ခေါင်းဆောင် လွှမ်းမိုးနိုင်၏ ကား အတွင်းမှလည်း မူးယစ်ဆေးဝါးများ နှင့် ဆက်စပ် ပစ္စည်းများလည်း သိမ်းဆည်းရရှိခဲ့ကြောင်း၊ ၎င်းသေဆုံးသွားသော သတင်းကြောင့် ပြည်သူများလည်း အားရကျေနပ် ဝမ်းသာနေကြောင်း သိရှိရသည်။
ပျူစောထီး ခေါင်းဆောင် လွှမ်းမိုးနိုင်သည် ဆင်တပ်ကျးရွာရှိ ပျူစောထီးများကို ဦးဆောင်၍ အုန်းတောမြို့တွင် အထိုင်ချကာ စစ်ကိုင်းမြို့နယ်အတွင်း ပြည်သူများကို ဖမ်းဆီး၊ နှိပ်စက်၊ ငွေညှစ်၊ သတ်ဖြတ်နေသူဖြစ်ကြောင်း၊ ပြည်သူများ၏ အိုးအိမ်များကိုလည်း မီးရှို့ဖျက်ဆီးနေသူဖြစ်ပြီး မူးယစ်ဆးဝါးများ ရောင်းဝယ် ဖောက်ကားနေသူများ၊ လောင်းကစားဝိုင်းနှင့် 2D/3D များတွင် လိုင်းကြေးကောက်ခံကာ စစ်တပ်ကို ထောက်ပို့လုပ်နေကြောင်း၊ ထို့ပြင် တော်လှန်ရေး ရဲဘော်များ၏ သတင်းများကို လိုက်လံစုံစမ်းကာ စစ်ကောင်စီထံသို့ သတင်းပေး၍ တော်လှန်ရေးရဲဘော်များကို ဖမ်းဆီး သတ်ဖြတ်ရာတွင် ကိုယ်တိုင် ပါဝင်နေသူဖြစ်ကြောင်း သိရှိရသည်။
“သူက ခဏခဏ အပစ်ခံရတာ မသေဘူး ဆိုပြီး သူ့ကို သတ်ချင်ရင် PDF တွေ ၁၀ နှစ် ကြိုးစားလို့ကြွေးကြော်ထားတာ သူက စစ်ကိုင်းမြို့နယ်မှာ အမည်ကြီးဆုံး ပျူစောထီးခေါင်းဆောင်ပဲ သူ့ဇာတိကတော့ ရွာသစ်ကြီးရွာပါ။ မြင်းမွေးရွာမှာ အိမ်ထောင် ကျပြီး လာနေ နေတာ သူသေဆုံးလို့ ပြည်သူတွေ ပျော်နေကြတယ်” ဟု လင်းယုန်ညီနောင် ပြောက်ကျားတပ်ဖွဲ့မှ တာဝန်ရှိသူတစ်ဦးက ပြောဆိုသည်။
အဆိုပါ တိုက်ခိုက်မှုကို လင်းယုန်ညီနောင် ပြောက်ကျားတပ်ဖွဲ့မှ တော်လှန်ရေး ရဲဘော်များက လုပ်ဆောင်ခဲ့ခြင်းဖြစ်ပြီး အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
