ယင်းမာပင်မြို့နယ်၊ မြို့သစ်ရွာကို စစ်တပ်က မီးရှို့ဖျက်ဆီးမှု နေအိမ်များ ပျက်စီး၊ ကျောက်မှော်ရွာကိုလည်း စစ်တပ် ပစ်ခတ်သော လက်နက်ကြီး ကျရောက် ပေါက်ကွဲမှု ပြည်သူ ၄ ဦး ဒဏ်ရာရ
ရန်ကုန်၊ ဇန်နဝါရီ ၆
စစ်ကိုင်းတိုင်း၊ ယင်းမာပင်မြို့နယ်၊ မြို့သစ်ရွာကို အကြမ်းဖက် စစ်တပ်က မီးရှို့ဖျက်ဆီးခြင်းကြောင့် နေအိမ်များ မီးလောင် ပျက်စီးခဲ့ကြောင်း တပ်ရင်း ၂၇ သတင်းဆက်သွယ်ရေးနှင့် ပြန်ကြားရေး ဌာနမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇန်နဝါရီ ၅ ရက်နေ့ နံနက် ၁၁ နာရီခန့်တွင် ယင်းမာပင်မြို့ စိုက်ပျိုးရေးရုံးအတွင်း တပ်ဆွဲထားသော အကြမ်းဖက် စစ်ကောင်စီ တပ်သားများသည် ယင်းမာပင်မြို့နယ် မြို့သစ်ကျေးရွာကို ဝင်ရောက်စီးနင်းပြီး ပြည်သူပိုင် နေအိမ်များကို မီးရှို့ ဖျက်ဆီးခဲ့ခြင်းဖြစ်ကြောင်း သိရသည်။
အကြမ်းဖက် စစ်ကောင်စီ တပ်သားများ မီးရှို့ဖျက်ဆီးခြင်းကြောင့် ပြည်သူပိုင်နေအိမ် ၂ လုံး၊ ဆန်စပါးနှင့် နွားစာများ သိုလှောင်ထားသည့် အဆောက်အဦး ၄ လုံး၊ ထွန်စက် ၁ စီး၊ နွားစာစင်းစက် ၁ ခုံ ၊ ဆိုင်ကယ် ၁ စီးနှင့် စက်ဘီး ၂ စီးတို့ မီးလောင် ပျက်စီးခဲ့ကြောင်း သိရှိရသည်။
အဆိုပါ အကြမ်းဖက် စစ်တပ် စစ်ကြောင်းသည် ယင်းနေ့ မွန်းလွဲ ၂ နာရီ ၅၀ မိနစ်ခန့်တွင် ယင်းမာပင်မြို့အတွင်းကို ပြန်လည်ရောက်ရှိသွားကြောင်း၊ ယင်း အကြမ်းဖက် စစ်ကောင်စီ တပ်သားများသည် ယင်းမာပင်မြို့တွင်းမှ ခရီးသွားပြည်သူများ၏ ကားများကို စစ်ဆေးမှုများ နေ့စဉ် ပြုလုပ်ပြီး ငွေကြေးတောင်းခံမှုများလည်း ပြုလုပ်ကြောင်း သိရသည်။
ထို့ပြင် ယင်းမာပင်မြို့နယ်၊ ကျောက်မှော်ရွာကို ဇန်နဝါရီလ ၃ ရက်နေ့ ည ၁၀ နာရီခန့်တွင် အောင်ဇေယျ မြို့သစ်မှ အကြမ်းဖက်စစ်ကောင်စီ တပ်သားများက ၁၂၀ မမ လက်နက်ကြီးများဖြင့် ပစ်ခတ်ခြင်းကြောင့် ပြည်သူ ၄ ဦး ထိခိုက်ဒဏ်ရာရရှိခဲ့ကြောင်း သိရှိရသည်။
အကြမ်းဖက် စစ်ကောင်စီ တပ်သားများ ပစ်ခတ်သော လက်နက်ကြီးထိမှန်ပြီး ကျောက်မှော်ကျေးရွာမှ အသက် ၈၉ နှစ် အရွယ်အမျိုးသမီး ၁ ဦး ဘယ်လက် ပြတ်တောက်သွားပြီး အသက် ၉၀ နှစ် အရွယ် အမျိုးသား ၁ ဦး ၊အသက် ၃၈ နှစ် အရွယ် အမျိုးသမီး ၁ ဦးနှင့် အသက် ၃၀ နှစ် အရွယ် အမျိုးသမီး ၁ ဦးလည်း ထိခိုက်ဒဏ်ရာရရှိခဲ့ကြောင်း သိရသည်။
