အထက်မင်းလှမြို့နယ်၊ ရှမ်းတပ် ရဲစခန်းကို လက်နက်ကြီးများဖြင့် ပစ်ခတ်တိုက်ခိုက်မှု စစ်ကောင်စီ တပ်သား ၇ ဦး အပြင်းအထန် ဒဏ်ရာရ
မကွေးတိုင်း၊ အထက်မင်းလှမြို့နယ်၊ ရှမ်းတပ်ရဲစခန်းကို လက်နက်ကြီးများဖြင့် ပစ်ခတ် တိုက်ခိုက်ခဲ့ရာ အကြမ်းဖက် စစ်ကောင်စီတပ်သား ၇ ဦးခန့် အပြင်းအထန် ဒဏ်ရာရရှိခဲ့ကြောင်း မကွေး တိုင်း ပကဖ အထူးလှုပ်ရှားတပ်ဖွဲ့- USBA တာဝန်ခံ ကိုဗဟိန်းက ရန်ကုန်ခေတ်သစ်သတင်းဌာနထံ သို့ပြောကြားသည်။
ဇန်နဝါရီလ ၂၉ ရက်နေ့ ညနေ ၅ နာရီ ၁၇ မိနစ်ခန့်တွင် အထက်မင်းလှမြို့နယ် ၊ ရှမ်းတပ် ရဲစခန်း အတွင်းကို ၄၀ မမ လက်နက်ကြီး ၅ လုံးပစ်ခတ်တိုက်ခိုက်ခဲ့ရာ ၄ လုံး ရဲစခန်းဝင်းအတွင်း ကျရောက် ပေါက်ကွဲခဲ့ပြီး အကြမ်းဖက် စစ်သား ၇ ဦး အပြင်းအထန် ဒဏ်ရာရရှိခဲ့ကြောင်းသိရသည်။
“ပစ်ခတ်မှုဖြစ်ပြီးတော့ ဆေးတပ်သားတစ်ယောက်ရှိတယ်လို့တော့ ကြားတယ်။ အဲဒါနဲ့ စခန်းတွင်း မှာ ကြိတ်ပြီးတော့ ကုနေကြတာ၊ စခန်းကို လူဝင်လူထွက်မရှိအောင် လုံးဝပိတ်ချလိုက်တာ၊ တိုက်ပွဲ ဖြစ်နေတဲ့ ပုံစံမျိုး အသင့်ပြင်ထားပြီးတော့ အတွင်းထဲမှာပဲ ကုနေတာ။ အဲလိုမပိတ်ချခင် အတွင်းထဲ ကနေ ‘ဘယ်နှစ်ယောက်လောက်ထိသွားလဲ ၇ ယောက်ထိထားတယ်။ ဆေးဆေး ဆိုပြီး အလောတ ကြီးဖြစ်ပျက်နေတဲ့ အသံလောက်ပဲကြားလိုက်ရတာ အတွင်းထဲထိ သတင်းရဖို့တော့ ခက်ခဲတယ်” ဟု မကွေး တိုင်း ပကဖ အထူးလှုပ်ရှားတပ်ဖွဲ့- USBA တာဝန်ခံ ကိုဗဟိန်းက ပြောဆိုသည်။
ထိုသို့ ပစ်ခတ်တိုက်ခိုက်ခံရပြီးနောက် အကြမ်းဖက်စစ်တပ်က လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်ခဲ့ကြောင်း၊ တိုက်ခိုက်မခံရမီအချိန်ကလည်း ပြည်သူလူထုနေထိုင်ရာ ကျေးရွာများကို လက်နက်ကြီးများဖြင့် ရမ်းသမ်းပစ်ခတ်ခြင်း၊ စစ်ဆေးရေးဂိတ်အမည်ခံကာ ခရီးသွားပြည်သူလူထုကို ဆက်ကြေးကောက်ခြင်း ၊ အတင်းအကြပ်ငွေကြေးကောက်ခံခြင်း၊ ဖမ်းဆီးခြင်း၊ နှိပ်စက်ခြင်းများ လုပ်ဆောင်နေသည့် စခန်းဖြစ်ကြောင်း သိရသည်။
အဆိုပါ တိုက်ခိုက်မှုကို မကွေးတိုင်း ပကဖ အထူးလှုပ်ရှားတပ်ဖွဲ့ – United States of Burma Army – USBA တပ်ဖွဲ့ဝင်ရဲဘော်များက တိုက်ခိုက်ခဲ့ခြင်းဖြစ်ပြီး အကြမ်းဖက်စစ်တပ်က လက်နက်ကြီးများ ဖြင့် ရမ်းသမ်းပစ်ခတ်ခဲ့သော်လည်း ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
“စခတွေဘက်က ပစ်တဲ့လက်နက်ကြီးတွေကြောင့် ထိခိုက်တဲ့ ပြည်သူတော့ မရှိပါဘူး။ ဒါမေပယ့် အ ကြမ်းဖက်စစ်ကောင်စီစခန်းအနီးအနားမှာရှိတဲ့ ပြည်သူတွေအနေနဲ့ စခန်းအနီးအနားမှာ မနေဖို့၊ စစ် တပ်စခန်းနဲ့ မီတာ ၁၀၀ ၊ မီတာ ၂၀၀ အတွင်းမှာနေတာက အရမ်းအန္တရာယ်များတယ်၊ ကျနော်တို့ လက်နက်ခဲယမ်းတွေဆိုတာက အနီးကပ်တိုက်ပွဲမှာ အန္တရာယ်နည်းကောင်း နည်းနိုင်ပေမယ့် လက် နက်ကြီးပစ်ခတ်မှုတွေမှာဆိုရင် လူကို မထိအောင် အရမ်းကို ဂရုစိုက်ပစ်ရတာ၊ သို့သော်လည်းလွဲချော် မှုဖြစ်ပြီး ပြည်သူလူထုအပေါ် ထိခိုက်မှုဖြစ်မှာ စိုးရတယ်၊ ဒါကြောင့်မို့လို့ အကြမ်းဖက်စစ်တပ်စခန်း အနီးအနားမှာ မနေကြဖို့ မေတ္တာရပ်ခံပါတယ်” ဟု မကွေး တိုင်း ပကဖ အထူးလှုပ်ရှားတပ်ဖွဲ့- USBA တာဝန်ခံ ကိုဗဟိန်းက ဆက်လက်ပြောဆိုသည်။
