ရန်ကုန်၊ မန္တလေး၊ နေပြည်တော်၊ ပဲခူးနှင့် ဧရာဝတီတိုင်းတို့တွင် လူငယ်များနှင့် အမျိုးသမီးများ သတင်းအစအန မရတော့ဘဲ ပျောက်ဆုံးနေ၊ လှိုင်သာယာတွင် လူငယ် ၂ ဦးကို စစ်မှုထမ်းရမည်ဟုဆိုပြီး စစ်တပ်က ညအချိန် ဝင်ရောက် ဖမ်းဆီး
ရန်ကုန်၊ ဖေဖော်ဝါရီ ၁
ရန်ကုန်တိုင်း ၊ မန္တလေးတိုင်း၊ နေပြည်တော် ၊ ပဲခူးတိုင်းနှင့် ဧရာဝတီတိုင်းမှ လူငယ်များ ဆက်တိုက်ပျောက်ဆုံးနေပြီး အမျိုး သမီးငယ်များလည်း ပျောက်ဆုံးမှု ပိုများလာကြောင်း ဒေသ သတင်းရင်းမြစ်များနှင့် မိသားစုဝင်တချို့က ရန်ကုန်ခေတ်သစ် သတင်းဌာနထံသို့ ပြောဆိုသည်။
ရန်ကုန်တိုင်း၊ မြောက်ဥက္ကလာမြို့နယ် ၂ ရပ်ကွက်တွင် နေထိုင်သော အသက် ၃၆ နှစ်အရွယ် ကိုမျိုးမင်းခိုင်သည် ဇန်နဝါရီလ ၂၉ ရက်နေ့ ညနေ ၅ နာရီခန့်တွင် နေအိမ်မှ ထွက်သွားပြီးနောက် ပျောက်ဆုံးခဲ့ကြောင်း၊ မိသားစုဝင်များက ၎င်းဖုန်းကို ဆက်သွယ်သော်လည်း စက်ပိတ်ထားကြောင်း သိရသည်။
ရန်ကုန်မြို့တွင် နယ်မှလာပြီး သင်တန်းတက်နေသော ကိုမျိုးစည်သူသည် ဇန်နဝါရီလ ၂၉ ရက်နေ့တွင် ဆံပင်ညှပ်ရန် နေအိမ်မှ ထွက်သွားစဉ် ပျောက်ဆုံးသွားကြောင်း သိရှိရသည်။
ရန်ကုန်တိုင်း၊ တောင်ဒဂုံမြို့နယ်၊ ၇၀ ရပ်ကွက်တွင် နေထိုင်သော အသက်က၂၁ နှစ်အရွယ် ဒဂုံတက္ကသိုလ် ဒုတိယနှစ် zoo major တွင်တက်ရောက်နေသော မောင်ဝေယံ (ခ) ဝေယံမင်းထွန်းသည် ဇန်နဝါရီလ ၃၀ ရက်နေ့ မွန်းလွဲ ၃ နာရီခန့်တွင် ဖုန်းဝယ်ရန် နေအိမ်မှ ပလာဇာကို သွားရောက်စဉ် ပျောက်ဆုံးသွားကြောင်း၊ မောင်ဝေယံနှင့် မိသားစုဝင်များ ညနေ ၅ နာရီထိ အဆက်အသွယ်ရရှိခဲ့သော် လက်ရှိချိန်ထိ ဖုန်းစက်ပိတ်ထားကြောင်း သိရသည်။
ရန်ကုန်တိုင်း၊ မင်္ဂလာဒုံမြို့နယ်တွင် နေထိုင်သော ကိုရဲလင်းအောင်သည် ဇန်နဝါရီလ ၂၆ ရက်နေ့ ည ၁၁ နာရီခန့်တွင် ပုလဲလမ်းဆုံ ရခိုင်ကျောင်းမှတ်တိုင် အနီးတွင် ဗိုက်ဆာ၍ မုန့်ထွတ်၀ယ်စဉ် ပျောက်ဆုံးသွားကြောင်း သိရသည်။
ရန်ကုန်တိုင်း၊ တာမွေမြို့နယ်၊ မေတ္တာညွှန့်ရပ်ကွက်တွင် နေထိုင်သော အသက် ၃၀ အရွယ် ကိုအောင်ဆန်းဦးသည် ဇန်နဝါရီလ ၂၅ ရက်နေ့တွင် နယ်၌ မိခင်ဖြစ်သူနေမကောင်း၍ သွားရောက်စဉ် လမ်းခရီး၌ ပျောက်ဆုံးသွားကြောင်း သိရှိရသည်။
ရန်ကုန်တိုင်း၊ သင်္ဃန်းကျွန်းကြီးမြို့နယ်၊ ဇောတိက ၁ လမ်းတွင်နေထိုင်သော အသက် ၃၅ နှစ်အရွယ် ကိုမောင်မောင်ဦးသည် ဇန်နဝါရီလ ၂၇ ရက်နေ့တွင် ဆူးလေမှ မင်္ဂလာဒုံ မြို့နယ်ကို ပြန်လာစဉ် အဆက်အသွယ်ရပြီးနောက် ည ၈ နာရီခန့်တွင် ဖုန်းစက်ပိတ်၍ ပျောက်ဆုံးသွားခြင်းဖြစ်ကြောင်း သိရသည်။
မန္တလေးတိုင်း မိုးကုတ်မြို့ အရှေ့ပိုင်း လယ်ဦးရပ်ကွက်တွင်နေထိုင်သော အသက် ၂၀ နှစ်အရွယ် Mg Sagar ဇန်နဝါရီလ ၂၀ ရက်နေ့တွင် ရန်ကုန်မြို့မှ မန္တလေးမြို့ကို သွားရောက်ပြီးနောက် ၂ ရက်အကြာတွင် ပျောက်ဆုံးသွားခြင်းဖြစ်ကြောင်း သိရသည်။
ပဲခူးတိုင်း၊ တောင်ငူမြို့တွင် နေထိုင်သော ကိုဘုန်းမြင့်မိုရ် (ခ) ထွန်းထွန်း သည် ဇန်နဝါရီလ ၂၈ ရက်နေ့တွင် ပဲခူးမြို့သို့ သွားရောက်စဉ် အဆက်အသွယ် ပြတ်တောက်ကာ ပျောက်ဆုံးသွားကြောင်း သိရှိရသည်။
မန္တလေးမြို့တွင်နေထိုင်သော ကိုသဲကိုကိုအောင်သည် ဇန်နဝါရီလ ၂၅ ရက်နေ့တွင် နေအိမ်မှ ထွက်ခွာသွားပြီးနောက် ပျောက် ဆုံးသွားခြင်းဖြစ်ကြောင်း သိရှိရသည်။
အလားတူ ရန်ကုန်တိုင်း၊ မင်္ဂလာဒုံမြို့နယ်၊ လေးထောင့်ကန်ရပ်ကွက်တွင် နေထိုင်သော အသက် ၂၂ နှစ်အရွယ် မအင်ကြင်းခင်သည် ဇန်နဝါရီလ ၂၁ ရက်နေ့တွင် မြောက်ဥက္ကလာမြို့နယ် အဝိုင်း အနီးရှိ အထည်ချုပ်စက်ရုံကို သွားရောက်စဉ် ပျောက်ဆုံးသွားခြင်းဖြစ်ကြောင်း သိရသည်။
ရန်ကုန်တိုင်း၊ အင်းစိန်မြို့နယ်၊ စဉ့်ငူ့ရပ်ကွက်၊ ဇေယျာသီရိလမ်းရှိ အဆောင်တွင် နေထိုင်သော အသက် ၁၈ နှစ်အရွယ် မအိသက်ခိုင်သည် ဇန်နဝါရီလ ၂၆ ရက်နေ့ နံနက် ၇ နာရီခန့်တွင် မုန့်ထွက်ဝယ်စဉ် ပျောက်ဆုံးသွားကြောင်း၊ ၎င်းပျောက်ဆုံးသွားသော သတင်းကြောင့် မိခင်ဖြစ်သူမှာလည်း သတိမေ့သွားပြီး လက်ခုတ်ကုန်းဆေးရုံတွင် တက်ရောက်ကုသနေရကြောင်း သိရှိရသည်။
ရန်ကုန်တိုင်း၊ ရွှေပြည်သာမြို့နယ်၊ အမှတ် စျ/၃၃ (၁၀)ရပ်ကွက်၊ ကော့သောင်းလမ်းနေ အသက် ၁၅ နှစ်အရွယ်ရှိ မယွန်းပိုးအိမ် (ခ) ယွန်းယွန်းသည် ဇန်နဝါရီလ ၂၈ ရက်နေ့ ညနေ ၅ နာရီခန့်တွင် နေအိမ်မှ ဈေးဝယ်သွားစဉ် ပျောက်ဆုံးသွားကြောင်း သိရှိရသည်။
ရန်ကုန်မြို့တွင် နေထိုင်သော အသက် ၂၀ အရွယ် မမြတ်ဖူးငုံသည် ဇန်နဝါရီလ ၁၇ ရက်နေ့ နံနက် ၁၁ နာရီခန့်တွင် သင်တန်းတက်ရန် YBS ဖြင့် သင်တန်းကို ရောက်လာခြင်းမရှိဘဲ ပျောက်ဆုံးသွားခြင်းဖြစ်ကြောင်းသိရှိရသည်။
မန္တလေးတိုင်း၊ အမရပူရမြို့၊ ကြံတန်း တိုးချဲ့ ၃ ရပ်ကွက်တွင် နေထိုင်သော အသက် ၁၃ နှစ်အရွယ် မမေသဇင်နွယ်သည် ဇန်နဝါရီလ ၂၂ ရက်နေ့ ညနေ ၄ နာရီ ၃၀ မိနစ်တွင် နေအိမ်မှ ပျောက်ဆုံးသွားကြောင်းသိရသည်။
နေပြည်တော်၊ ပျဥ်းမနားမြို့၊ အောင်သာယာ ၂၅ လမ်းတွင် နေထိုင်သော မဖူးဖူးသည် ဇန်နဝါရီလ ၂၇ ရက်နေ့တွင် နေအိမ်မှ ထွက်ခွာသွားပြီးနောက် ပျောက်ဆုံးသွားခြင်းဖြစ်ကြောင်း သိရသည်။
ဧရာဝတီတိုင်း၊ ဓနုဖြူမြို့၊ ၁၂ ရပ်ကွက် ၅ လမ်းတွင် နေထိုင်သော အသက် ၁၅ နှစ်အရွယ် မတီတာဇူးဇူးသည် ဇန်နဝါရီလ ၂၄ ရက်နေ့ နံနက် ၈ နာရီခန့်တွင် နေအိမ်မှ ထွက်ခွာသွားပြီးနောက် ပျောက်ဆုံးသွားခြင်းဖြစ်ကြောင်းသိရသည်။
ထို့ပြင် စစ်တပ်က ရန်ကုန်တိုင်း၊ လှိုင်သာယာမြို့နယ်တွင် လူငယ်မောင်၀ဏ္ဏ နှင့် လူငယ် တစ်ဦးကို ဇန်နဝါရီလ ၃၀ ရက်နေ့ ညသန်းခေါင်ယံအချိန် စစ်မှုထမ်းရန် ဝင်ရောက် ဖမ်းဆီးသွားကြောင်း သိရှိရသည်။
ဇန်နဝါရီလ ၃၀ ရက်နေ့ ည ၁၁ နာရီအချိန် လှိုင်သာယာမြို့နယ်၊ ၉ ရပ်ကွက်၊ စံရိပ်ငြိမ်လမ်းတွင် နေထိုင်သော ဦးဇော်ဝင်း၏ တူဖြစ်သူ အသက် ၂၆ နှစ်အရွယ် မောင်ဝဏ္ဏကို စစ်တပ်နှင့် ရပ်ကွက်အုပ်ချုပ်ရေးအဖွဲ့က စစ်မှုထမ်းရန်အတွက် ဝင်ရောက် ဖမ်းဆီးသွားခဲ့ကြောင်း သိရှိရသည်။
“ဇန်နဝါရီ ၃၀ ရက်နေ့ ည ၁၁နာရီကျော်လောက်မှာ မောင်၀ဏ္ဏကို နေအိမ်ထဲအထိဝင်ဆွဲတယ်။ မီးတွေကလည်း ပျက်နေတဲ့အချိန်။ ရပ်ကွက်ရုံးကလူတွေရယ်၊ စခတွေရယ် ဝင်ဆွဲတာ။ အဲဒီကောင်လေးက အလုပ်မရှိဘူး။ ရပ်ကွက်ထဲလျှောက်သွားနေတဲ့လူငယ်ပါ။ အနေလည်းအေးတယ်။ စစ်မှုထမ်းဖို့ဆိုပြီး ဝင်ဆွဲတာ” ဟု ရပ်ကွက်ပြည်သူတစ်ဦးက ဆိုသည်။
အလားတူ လှိုင်သာယာမြို့နယ်၊ ၉ ရပ်ကွက်၊ သရက်လမ်းတွင် နေထိုင်သော ဒေါ်စိုးစိုးအေး ၏ သားဖြစ်သူကိုလည်း စစ်တပ်က စစ်မှုထမ်းရန် အသက်အရွယ် အကျုံးဝင်သည်ဟုဆိုကာ ဝင်ရောက်ဖမ်းဆီးသွားကြောင်း သိရှိရသည်။
“ကိုယ့်အိမ်ရှေ့မှာ ဆိုင်ကယ်သံနဲ့ကားသံ ညဘက်ကြားရရင် လန့်နေရပြီ။ စစ်မှုထမ်းဖို့ ဝင်ဖမ်းမလားဆိုပြီးတော့။ အခုကတော့ လူငယ်တွေရှိတဲ့ နေအိမ်တွေကို ညပိုင်း ဘာမပြော ညာမပြောနဲ့ ဝင်ဖမ်းပြီး စစ်ထဲထည့်တာပဲ။ ငြင်းလို့လည်းမရဘူး” ဟု လှိုင်သာယာမြို့နယ်၊ ၉ ရပ်ကွက်မှ ဆွမ်းလောင်းအသင်းအဖွဲ့ဝင်တစ်ဦးက ဆိုသည်။
