မြင်းခြံနှင့် ပုလောမြို့နယ်တို့တွင် စစ်တပ်၏ ပစ်ခတ်မှုကြောင့် ပြည်သူ ၄ ဦး သေဆုံး
မန္တလေးတိုင်း၊ မြင်းခြံမြို့နယ်ရှိ ငါ့နန်းရွာတွင် အကြမ်းဖက် စစ်တပ်က သားအမိ ၂ ဦးကို အကြောင်းမဲ့ ပစ်ခတ်ခြင်းကြောင့် သားဖြစ်သူ သေဆုံးခဲ့ကြောင်း ရွှေဂျိုးဖြူ ပြည်သူ့ကာကွယ်ရေးတပ်ဖွဲ့နှင့် ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၂၆ ရက်နေ့ ည ၇ နာရီ ၃၀ မိနစ်ခန့်အချိန် မြင်းခြံမြို့နယ်၊ ငါ့နန်းရွာမှ သားအမိ ၂ ဦးသည် ခင်ပွန်းဖြစ်သူ နေအိမ်မှ ပျောက်ဆုံးသွား၍ လိုက်ရှာနေကြစဉ် အကြမ်းဖက် စစ်ကောင်စီ တပ်သားများနှင့် ဆုံတွေ့ပြီး ပစ်ခတ်ခံခဲ့ရ ကြောင်း၊ ယင်း ပစ်ခတ်မှု အတွင်း သား ဖြစ်သူ ပွဲချင်းပြီးသေဆုံးခဲ့ပြီး မိခင်ဖြစ်သူမှာလည်း ထိခိုက်ဒဏ်ရာရရှိခဲ့ကြောင်း သိရသည်။
“၂၆ ရက်နေ့ ည ၇ နာရီကျော်လောက်က ငါနန်းရွာထဲမှာ အမျိုးသား ဖြစ်သူ ပျောက်သွားလို့ဆိုပြီး ထွက်ရှာတဲ့ သားအမိ ၂ ဦးကို ရွာတောင်ဘက်မှာရှိတဲ့ ကင်းပုန်းဝပ်နေတဲ့ စစ်ခွေးတွေက အကြောင်းမဲ့ လှမ်းပစ်တာ သားဖြစ်သူ ပွဲချင်းပြီး သေဆုံးသွားပြီး မိခင်ဖြစ်သူကတော့ ကျည်ထိမှန် ဒဏ်ရာရတယ်လို့ သိရတယ်” ဟု ဒေသပြည်သူတစ်ဦးက ပြောဆိုသည်။
အလားတူ တနင်္သာရီတိုင်း ပုလောမြို့နယ်တွင်လည်း အကြမ်းဖက် စစ်ကောင်စီတပ်သားများ ပစ်ခတ်မှုကြောင့် ပြည်သူ ၃ ဦးသေဆုံးခဲ့ကြောင်း ပုလော ပကဖ မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၂၇ ရက်နေ့ ညပိုင်း တော်ဝင်ရွာမှ စစ်ဘေးရှောင်ပြည်သူများက ၎င်းတို့ နေအိမ်သို့ ပြန်လာစဉ် ထမင်းမစားရွာမှ ပျူစောထီးများက အကြောင်းမဲ့ ပစ်ခတ်ခြင်းကြောင့် ပြည်သူ ၃ ဦး ပွဲချင်းပြီး သေဆုံးခဲ့ကြောင်း သိရသည်။
“ဖြစ်စဉ် အသေးစိတ်တော့ ကျနော်တို့လည်း မသိရသေးဘူး။ ထမင်းမစားရွာက ပျူစောထီးတွေ လုပ်တာလို့တော့ သိထားရတယ်” ဟု ပုလော ပကဖ မှ တာဝန်ရှိသူ တစ်ဦးက ပြောဆိုသည်။
ဓာတ်ပုံ- စစ်တပ်၏ ပစ်ခတ်မှုကြောင့် သေဆုံးနေသော ပြည်သူတစ်ဦး။
