ရန်ကုန်၊ မတ် ၇
ရန်ကုန်တိုင်း၊ သန်လျင်မြို့နယ် ဧရာဝတီ ရေတပ်စခန်းဌာနချုပ်တွင် ရေတပ်ဦးစီးချုပ် ဗိုလ်ချုပ်ကြီး ထိန်ဝင်း အမိန့်ဖြင့် အရေးပေါ် ယတြာအတွက် ရွတ်ဖတ်ပူဇော်နိုင်ရန်အတွက် ပဋ္ဌာန်းရွတ်နည်း သင်တန်းများ ပို့ချနေပြီး ရေတပ် ဦးစီးချုပ်၏ ဇနီး အပါအဝင် အရာရှိဇနီးမှန်သမျှ အားလုံး တက်ရောက်နေရကြောင်း ရေတပ်သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
မတ်လ ၁ ရက်နေ့မှ ၇ ရက်နေ့အထိ ဧရာဝတီ ရေတပ်စခန်းဌာနချုပ် ဓမ္မာရုံတွင် ပဋ္ဌာန်း ရွတ်နည်း သင်တန်း ဖွင့်လှစ်နေခြင်းဖြစ်ပြီး ငွေလှရတနာ အဘိဓမ္မာ သင်တန်းမှူးမှာ အငြိမ်းစား ဗိုလ်ချုပ်တင်ငွေ၏ သမီးနှင့် စစ်ဆေးဆရာဝန် တပ်ရင်းမှုး၏ဇနီး ခင်သန္တာဦးက ဦးဆောင်၍ သင်တန်းပို့ချနေခြင်းဖြစ်သည်။
အဆိုပါပဋ္ဌာန်း ရွတ်နည်း သင်တန်းသို့ ကာကွယ်ရေးဦးစီးချုပ် (ရေ) ဗိုလ်ချုပ်ကြီး ထိန်ဝင်း၏ ဇနီးနှင့် အတူ အရာရှိများ၏ ဇနီးများ တက်ရောက်နေပြီး သင်တန်းတက်ရောက်ခြင်းမရှိသူများကို အရေးယူမည်ဟုဆိုကာ မဖြစ်မနေ တက်ရောက်ခိုင်းနေခြင်းဖြစ်ကြောင်း သိရှိရသည်။
ယနေ့ မတ်လ ၇ ရက်နေ့တွင် သင်တန်းဆင်းပွဲနှင့် ဆုပေးပွဲ ပြုလုပ်သွားမည်ဖြစ်ပြီး ရေတပ်ဌာနချုပ် ဓမ္မာရုံတွင်လည်း ယနေ့ ညနေ ၄ နာရီ ၃၀ မိနစ်မှ စတင်၍ နေ့စဉ် ဓမ္မစကြာသုတ္တန် ရွတ်ဖတ်ရန်လည်း အမိန့်ထုတ်ထားကြောင်း သိရသည်။
“ဧရာဝတီ ရေတပ်စခန်းဌာနချုပ် (သန်လျက်စွန်း) မှာ ပဌာန်းသင်တန်း ၇ ရက်ဖွင့်လှစ်နေတယ်။ ကာကွယ် ရေးဦးစီးချုပ် (ရေ) ဗိုလ်ချုပ်ကြီး ထိန်ဝင်းရဲ့ မိန်းမ ကိုယ်တိုင် တက်ရောက်နေရတယ်။ အရာရှိ ဇနီးတွေ အကုန် မတက်မနေရဆိုပြီး မတက်ရင် အရေးယူမယ်ပြောလို့ အကုန်လုံး တက်နေကြတယ်။ ရေတပ်ဌာနချုပ် ဓမ္မာရုံမှာလည်း နေ့တိုင်း ဓမ္မစကြာသုတ္တန် ရွတ်ဖတ်ရမယ်ဆိုပြီး အမိန့်ထုတ်ထားတယ်” ဟု တပ်တွင်း သတင်းရင်းမြစ်ကပြောဆိုသည်။
ဓာတ်ပုံ – ရေတပ်ဦးစီးချုပ် ဗိုလ်ချုပ်ကြီး ထိန်ဝင်းနှင့် ဧရာဝတီ ရေတပ်စခန်းဌာနချုပ်ရှိ တပ်တွင်း ဓမ္မာရုံ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
