ရန်ကုန်။ မတ် ၂၆
ဧရာဝတီတိုင်း၊ လေးမျက်နှာမြို့အနီးသို့ AA ၏ ထိုးစစ်က ရောက်ရှိလာပြီး အကြမ်းဖက် စစ်တပ်က ငဝန်တံတားအဆင်း ရွှေသစ်စုရွာတွင် ခံစစ်ပြင်ဆင်နေကာ ကျေးရွာပြည်သူများကို ထမင်းနှင့် ဟင်းများကို စစ်တပ်က အတင်းအကျပ်ချက်၍ ပို့ဆောင်ခိုင်းနေကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
မတ်လဆန်းပိုင်းမှ စတင်ကာ လေးမျက်နှာမြို့နယ်တွင် AA နှင့် အကြမ်းဖက် စစ်တပ်တို့ ထိတွေ့ တိုက်ပွဲများ စတင်ပြင်းထန်လာပြီး လက်ရှိအချိန် လေးမျက်နှာမြို့ အနီးအထိ AA ၏ ထိုးစစ်များ ရောက်ရှိလာကြောင်း၊ လက်ရှိတွင် အကြမ်းဖက် စစ်တပ်က ငဝန်တံတားအဆင်းရှိ ရွှေသစ်စုရွာတွင် ခံစစ် ပြင်ဆင်နေကြောင်း၊ ထို့ပြင် ငဝန်မြစ် အနောက်ဘက်ရှိ သမိုင်းဝင် ထူးပါရုံဘုရားကြီးတွင်လည်း အကြမ်းဖက် စစ်ကောင်စီ တပ်သား တချို့ ရောက်နေပြီး တပ်စွဲရန် ပြင်ဆင်နေကြောင်း၊ အကြမ်းဖက် စစ်ကောင်စီ တပ်သားများ ရောက်ရှိလာသောကြောင့် ထူးပါရုံဘုရားကြီး အနီးရှိ ကျေးရွာများမှ ပြည်သူများသည် ဘေးလွတ်ရာကို ကြိုတင် ရှောင်ရှားနေကြကြောင်း သိရှိရသည်။
ထိုသို့ အကြမ်းဖက် စစ်ကောင်စီ တပ်သားများ လာရောက်တပ်စွဲခြင်းကြောင့် မတ်လ ၂၃ ရက်နေ့မှ စတင်ပြီး ရွှေသစ်စုကျေးရွာ၏ လက်နက်ကိုင် ကျေးရွာအုပ်ချုပ်ရေးမှူး ဇော်နိုင်က ကျေးရွာနေ ပြည်သူများကို အလှည့်ကျ ထမင်းနှင့် ဟင်းများ အတင်းအကျပ် ချက်ခိုင်း၍ စစ်သားများထံသို့ ပို့ဆောင်ခိုင်းနေကြောင်း သိရသည်။
“ကျေးရွာနေ ပြည်သူတွေက စစ်ခွေး ၁၀၀ စာ ချက်ပြီး ပို့ဆောင်နေရတယ်။ ရွာလူကြီး ဇော်နိုင်ဦးက လက်နက်ကိုင် အုပ်ချုပ်ရေးမှူးပါ။ သူအိမ်မှာလည်း လက်နက် ၊ ခဲယမ်း အချို့ သိမ်းဆည်းထားတာရှိတယ်။ အခုဆိုနေ့စဉ် လက်နက်ကြီးသံတွေ ကြားနေရပါတယ်။ တဖြည်းဖြည်းနဲ့ လက်နက်ကြီးသံက ပို၍ ကျယ်ကျယ်လောင်လောင် ကြားနေရတယ်။ AA ရဲ့ ထိုးစစ်တပ် မြို့နားကပ်လာပြီ” ဟု ဒေသပြည်သူ တစ်ဦးက ပြောဆိုသည်။
အကြမ်းဖက် စစ်တပ်သည် လေးမျက်နှာမြို့နယ် အတွင်းဖြစ်ပွားနေသော တိုက်ပွဲများ၌ ထိခိုက်သေဆုံးမှု များပြားနေပြီး လေကြောင်းနှင့် လက်နက်ကြီးများကိုသာ အားထား၍ တိုက်ခိုက်နေခြင်းဖြစ်ကြောင်း သိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
