မြင်းမူတွင် စစ်တပ်က ယနေ့ ညပိုင်း လက်နက်ကြီးများဖြင့် ကျေးရွာများကို ပစ်ခတ်မှု ပြည်သူ ၂ ဦးဒဏ်ရာရပြီး အလ္လကပရွာကို ဝင်ရောက် စီးနင်းကာ သေနတ်များ ပစ်ဖောက်နေ
စစ်ကိုင်းတိုင်း၊ မြင်းမူမြို့နယ်တွင် အကြမ်းဖက် စစ်တပ်က ယနေ့ ညပိုင်း လက်နက်ကြီးများဖြင့် ကျေးရွာများကို ပစ်ခတ်ခြင်းကြောင့် ပြည်သူ ၂ ဦးဒဏ်ရာရပြီး အလ္လကပရွာကို ဝင်ရောက် စီးနင်းကာ သေနတ်များ ပစ်ဖောက်နေကြောင်း မြင်းမူမြို့နယ် သတင်းမှန် ပြန်ကြားရေးအဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၃၁ ရက်နေ့ ည ၈ နာရီ ၄၀ မိနစ်ခန့်တွင် မြင်းမူမြို့နယ်၊ ထီးဆောင်းရွာတွင် အထိုင်ချ တပ်စွဲထားသော အကြမ်းဖက် စစ်ကောင်စီ တပ်သားများက လက်နက်ကြီးများဖြင့် ကျေးရွာများကို ရမ်းသမ်း ပစ်ခတ်နေခြင်းဖြစ်ကြောင်း သိရသည်။
အကြမ်းဖက် စစ်ကောင်စီ တပ်သားများ ပစ်ခတ်သော လက်နက်ကြီး ထိမှန်ပြီး ပြည်သူ ၂ ဦး ထိခိုက်ဒဏ်ရာရရှိကာ ပြည်သူတချို့လည်း ထွက်ပြေး တိမ်းရှောင်နေရကြောင်း သိရှိရသည်။
” ထီးဆောင်းကျေးရွာမှာ အထိုင်ချ တပ်စွဲထားတဲ့ အကြမ်းဖက် စစ်ခွေးတွေက လက်နက်ကြီးတွေနဲ့ ရမ်းသမ်း ပစ်ခတ်နေတာပါ။ အခုသိရတာတော့ ပြည်သူ ၂ ဦး ထိခိုက်ဒဏ်ရာရတယ်လို့ သိထားရတယ်” ဟု မြင်းမူမြို့နယ် သတင်းမှန် ပြန်ကြားရေးအဖွဲ့မှ တာဝန်ရှိသူ တစ်ဦးက ပြောဆိုသည်။
အလားတူ မြင်းမူမြို့နယ်၊ မြောင်လမ်းခွဲရှိ စစ်သားများနှင့် ဒို့မြန်မာကျော် ဆီဆိုင်တွင် အထိုင်ချ တပ်စွဲထားသော အကြမ်းဖက် စစ်ကောင်စီ တပ်သားများကလည်း ယနေ့ ညပိုင်းတွင် အလ္လကပကျေးရွာကို ဝင်ရောက် စီးနင်းပြီး လက်နက်ငယ်များ ပစ်ဖောက်နေကြောင်း မြင်းမူမြို့နယ် သတင်းမှန်ပြန်ကြားရေး အဖွဲ့မှ တာဝန်ရှိသူ တစ်ဦးက ဆက်လက်ပြောဆိုသည်။
ဓာတ်ပုံ- ရန်ကုန်တွင် ညပိုင်း ကင်းလှည့်နေသည့် အကြမ်းဖက် စစ်ကောင်စီတပ်သားများ (ပုံအဟောင်းဖြစ်သည်)
