ပုလောနှင့် ရမည်းသင်းတွင် လူငယ်များကို ပေါ်တာဆွဲ ဖမ်းဆီး ငွေညှစ်နေသည့် အုပ်ချုပ်ရေးမှူး ခင်မောင်ဝင်းနှင့် ဒုတပ်ကြပ်ကြီး သန်းထိုက် တို့ ပစ်ခတ် ခံရပြီး ၂ ဦးလုံး သေဆုံး
တနင်္သာရီတိုင်း၊ ပုလောမြို့နယ်တွင် လူငယ်များကို ပေါ်တာဆွဲ ဖမ်းဆီး ငွေညှစ်နေသည့် အုပ်ချုပ်ရေးမှူး ခင်မောင်ဝင်းကို ပစ်ခတ် တိုက်ခိုက်ရာ ပွဲချင်းပြီးသေဆုံးခဲ့ကြောင်း မြိတ်ခရိုင် အမှတ် ၁ တပ်ရင်းမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၃၁ ရက်နေ့ နံနက် ၁၁ နာရီခန့်တွင် ပုလောမြို့၊ အမှတ် ၄ ရပ်ကွက် အုပ်ချုပ်ရေးမှူး ခင်မောင်ဝင်းကို တော်လှန်ရေး ရဲဘော်များက ၎င်းနေအိမ်အတွင်း ပစ်ခတ် တိုက်ခိုက်ခဲ့ရာ ပွဲချင်းပြီး သေဆုံးခဲ့ကြောင်း သိရသည်။
သေဆုံးသွားသော ခင်မောင်ဝင်းသည် အကြမ်းဖက် စစ်ကောင်စီ၏ စစ်မှုထမ်းဥပဒေ ပြဌာန်းပြီးနောက် လူငယ်များကို စစ်မှုထမ်းရန် အတင်းအကြပ်ဖိအားပေး ခိုင်းစေနေသူဖြစ်ပြီး ခြိမ်းခြောက်ငွေညှစ်ခြင်းကိုလည်း ဆောင်ရွက်လျက်ရှိသူဖြစ်ကြောင်း၊ ထို့ကြောင့် တော်လှန်ရေး ပူးပေါင်းအဖွဲ့များက ၎င်း၏ လုပ်ရပ်များကို ရပ်တန့်ရန် အကြိမ်ကြိမ်သတိပေးခဲ့သော်လည်း ပူးပေါင်းလိုက်နာခြင်းမရှိသည့်အတွက် ပစ်ခတ် တိုက်ခိုက်ခဲ့ခြင်းဖြစ်ကြောင်း မြိတ်ခရိုင် အမှတ် ၁ တပ်ရင်းမှ တာဝန်ရှိသူ တစ်ဦးက ပြောဆိုသည်။
ပုလောမြို့နယ်အတွင်းရှိ ရပ်ကွက်/ကျေးရွာအုပ်ချုပ်ရေးမှူးများအနေဖြင့် လူငယ်များကို စစ်မှုထမ်းရန် အတင်းအကြပ် ဖိအားပေး ခြင်း၊ စစ်မှုထမ်းဥပဒေကို အကြောင်းပြ၍ ပြည်သူလူထုအား ခြိမ်းခြောက်ခြင်း၊ အနိုင်ထက်စီးနင်းပြုလုပ်ခြင်းများ ပြုလုပ်ပါက ဆက်လက် တိုက်ခိုက်သွားမည်ဖြစ်ကြောင်း မြိတ်ခရိုင် အမှတ် ၁ တပ်ရင်းက အသိပေး ပြောဆိုထားသည်။
အဆိုပါ တိုက်ခိုက်မှုကို ပြည်သူ့ကာကွယ်ရေးတပ်မတော်၊ မြိတ်ခရိုင်အမှတ် ၁ တပ်ရင်းနှင့် ကရင်အမျိုးသားကာကွယ်ရေးတပ် (KNDO) တပ်ရင်း(၇) မဟာမိတ်ပူးပေါင်းအဖွဲ့တို့က ပူးပေါင်း လုပ်ဆောင်ခဲ့ခြင်းဖြစ်ကြောင်း သိရသည်။
အလားတူ မန္တလေးတိုင်း၊ ရမည်းသင်းမြို့နယ်တွင်လည်း ဒုတပ်ကြပ်ကြီးသန်းထိုက်ကို ပစ်ခတ် တိုက်ခိုက်ခဲ့ရာ ပွဲချင်းပြီးသေဆုံးခဲ့ကြောင်း တိုက်ဒေါင်းပြည်သူ့တော်လှန်ရေးအင်အားစုမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၂၈ ရက်နေ့ နံနက် ၉ နာရီ ၃၀ မိနစ်ခန့်တွင် ဒုတပ်ကြပ်ကြီးသန်းထိုက်သည် ရမည်းရဲစခန်းမှ ဆိုင်ကယ်ဖြင့် ထွက်လာစဉ် အမြန်လမ်းမိုင်တိုင် ၂၅၆ အနီး တိုက်ဒေါင်းပြည်သူ့တော်လှန်ရေးအင်အားစုမှ ရဲဘော်များက ပစ်ခတ် တိုက်ခိုက်ခဲ့ရာ ပွဲချင်းပြီး သေဆုံးခဲ့ကြောင်း သိရသည်။
“အမြန်လမ်းကို ဆိုင်ကယ်နဲ့ ထွက်လာတုန်း ပစ်ခတ် တိုက်ခိုက်ခဲ့တာ သူ့ဆီက WY ဆေးပြားတွေလည်း သိမ်းဆည်းရရှိပါတယ်။ သူကိုယ်တိုင် သုံးဖို့ ဝယ်ထားတာလို့ သိရတယ်” ဟု တိုက်ဒေါင်းပြည်သူ့တော်လှန်ရေးအင်အားစုမှ တာဝန်ရှိသူ တစ်ဦးက ပြောဆိုသည်။
