ရန်ကုန်၊ ဧပြီ ၂
မန္တလေးတွင် နောက်ဆက်တွဲ ငလျင်ဘေးစိုးရိမ်၍ ပြည်သူများ လမ်းပေါ်ထွက်အိပ်စဉ် သူခိုးနှင့်ဓားပြတိုက်မှုများ စိုးရိမ်နေရပြီး နေအိမ်အများအပြားမှာ သူခိုးခိုးခံနေရကြောင်း မန္တလေးနှင့်စစ်ကိုင်းတို့တွင် ကူညီကယ်ဆယ်ရေး လုပ်နေသူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဧပြီလ ၂ ရက်နေ့ညပိုင်း မန္တလေးမြို့၊ ၃၈ လမ်းနှင့် ၄၁ လမ်းအကြား ၈၉ လမ်းမပေါ်တွင် မျက်နှာဖုံးစွပ်ထားသော ဓားကိုင် လူ ၅ ဦးက သွားလာလှုပ်ရှားနေသဖြင့် ပြည်သူများ စုဝေးကာ ယင်းလူ ၅ ဦးကို လိုက်လံ ရှာဖွေခဲ့ရကြောင်း၊ ထို့ပြင် ငလျင်လှုပ်ခတ်၍ ပြိုကျပျက်စီးနေသော နေအိမ်များ၊ ပျက်စီးမှုမရှိသော်လည်း နောက်ဆက်တွဲ ငလျင်စိုးရိမ်၍ လမ်းပေါ် ထွက်အိပ်ချိန် သူခိုးခံရမှုများရှိနေကြောင်း သိရှိရသည်။
“မန္တလေးမှာ ငလျင်လှုပ်ပြီးနောက် အိမ်တွေ အဖောက်ခံရတယ်။ လူသူပြတ်တဲ့ လမ်းကြိုလမ်းကြားများတွင် ဓားထောက် ဓားပြတိုက်တာ၊ လုယက်တာတွေ၊ အရမ်းကို ပေါလာတယ်။ တစ်နေ့ညကလည်း ၃၈ လမ်း ၊ ၄၁ လမ်းကြားမှာရှိတဲ့ ၈၉ လမ်းမပေါ်မှာ မျက်နှာဖုံးစွပ်တွေနဲ့ လူ ၅ ဦး ပြီးရင် ဓားတွေ ကိုယ်စီ လွယ်ထားလို့ အဲဒါလိုက်ရသေးတယ်” ဟု မန္တလေး၊ဒေသပြည်သူတစ်ဦးက လူမှုကွန်ရက်မှတစ်ဆင့် ပြောဆိုထားသည်။
မန္တလေးနှင့် စစ်ကိုင်းတွင် လျှပ်စစ်မီး ပြတ်တောက်နေပြီး ယင်းကြောင့် ညပိုင်းတွင် စစ်ကိုင်းနှင့်မန္တလေးမြို့တစ်ခုလုံးမှာ မှောင်မိုက်နေကြောင်း၊ ယင်းအခြေအနေကို အခွင့်အကောင်းယူကာ သူခိုးနှင့်လူဆိုးများက လှုပ်ရှားဓားပြတိုက် ခိုးယူမှုများ ကျူးလွန်နေခြင်းဖြစ်ကြောင်း သိရှိရသည်။
“စစ်ကိုင်း ဇေယျာကွက်သစ်ဘက်မှာ ညတိုင်း သူခိုးကပ်တယ်။ အဲဒီတော့ ရပ်ရွာက လူငယ်တွေ စုစည်းပြီး ကိုယ့်အိမ် လုံခြုံရေး၊ ကိုယ့်ရပ်ရွာလုံခြုံရေး အဲဒီလိုမျိုး ပြန်ပြီး လုံခြုံရေးယူရတယ်။ ဘယ်သူမှလည်း လာမလုပ်ပေးဘူး။ တပ်နဲ့ရဲလည်း ညဘက် ကင်းလှည့်တာဘာညာမရှိပါဘူး။ တစ်မြို့လုံးကလည်း ညဆိုရင် မှောင်နဲ့ မည်းမည်းပဲ” ဟု ဇေယျာကွက်သစ်မှ ကူညီကယ်ဆယ်ရေးလုပ်နေသူ အဝေးသင်တက္ကသိုလ်ကျောင်းသား လူငယ်တစ်ဦးက ရှင်းပြသည်။
မတ်လ ၂၈ ရက်နေ့ မွန်းလွဲပိုင်း လှုပ်ခတ်ခဲ့သော ငလျင်ကြောင့် မန္တလေးနှင့် စစ်ကိုင်းမြို့ကြီးများမှာ မြို့ပျက်ကြီးကဲ့သို့ ဖြစ်နေပြီး အပုတ်နံ့များမှာ ယခုရက်ပိုင်း ပို၍ နံလာကြောင်း၊ စစ်ကောင်စီကလည်း ရံဖန်ရံခါ လုံခြုံရေး သွားလာမှုများရှိသော်လည်း ညပိုင်းအချိန်များတွင်မူ လမ်းပေါ်တွင် လုံး၀ မတွေ့ရကြောင်း ဒေသပြည်သူများက ပြောဆိုကြသည်။
“အရင်ဆို ဟန်ရေးပြ လမ်းသလားနေတဲ့ စစ်သား၊ ရဲနဲ့ ပြည်သူ့စစ်တွေလည်း ညပိုင်းဆို တစ်ဦးမှ မတွေ့ရတော့ဘူး။ ပြည်သူကတော့ ကိုယ့်လုံခြုံရေး ကိုယ်ယူရတာပဲ” ဟု မန္တလေးမြို့၊ မဟာအောင်မြေမြို့မှ ဆွမ်းလောင်းအသင်းအဖွဲ့ဝင်တစ်ဦးက သုံးသပ်ပြောဆိုသည်။
ဓာတ်ပုံ – ၃၈ လမ်းနှင့် ၄၁ လမ်းအကြား ၈၉ လမ်းတွင် ဓားကိုင်လူအုပ်စုကို မြို့ခံ ပြည်သူများနှင့် သံဃာတော်များ ပူးပေါင်း ရှာဖွေနေကြစဉ်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
