စစ်ကိုင်း ငလျင်ရှောင်စခန်းတွင် လူ ၅ ဦး ဝမ်းရောဂါ စဖြစ်၊ ဝမ်းရောဂါများ ပျံ့နှံ့မည်ကို ကျန်းမာရေးဝန်ထမ်းများ စိုးရိမ်
ငလျင်ကြီး၏ ဗဟိုချက် စစ်ကိုင်းမြို့ အရှေ့ပိုင်း ရန်နိုင်ရပ်ကွက် ရန်နိုင်ငလျင်ဘေးရှောင်စခန်း (ရန်နိုင်ကျောင်းရှေ့ကကွင်း) တွင် လူ ၅ ဦး ဝမ်းပျက်ဝမ်းလျှောစတင်ဖြစ်ပွားနေပြီး ရာသီဥတု နှင့် စခန်း၏ အခြေအနေအရ ဝမ်းရောဂါပျံ့နှံ့မည်ကို ကျန်းမာရေးဝန်ထမ်းများ စိုးရိမ်နေကြကြောင်း စစ်ကိုင်းငလျင်ကူညီရေးလုပ်ဆောင်နေသူတစ်ဦးက ရန်ကုန်ခေတ်သစ်ကို ပြောကြားသည်။
“Outbreak ဖြစ်မှာ တော်တော်လေး စိုးရိမ်နေကြတယ်။ ဆေးဝါးတွေ အတော်လိုအပ်နေပါတယ်”ဟု ၎င်းက ဆိုသည်။
ရန်နိုင်ငလျင်ဘေးရှောင်စခန်းတွင် ညအိပ် အိမ်ထောင်စု ၉၈ စု လူဦးရေ ၅၀၀ ခန့် လက်ရှိတွင် ရှိနေပြီး ဝမ်းပျက်ဝမ်းလျှောစတင်ဖြစ်ပွားနေသဖြင့် ဓာတ်ဆားထုပ်များ၊ အားဆေးများနှင့် အသက်အရွယ်ကြီး သူများအတွက် ဆီးချိုဆေး၊ သွေးကျဆေး၊ အာရုံကြောအားတိုးဆေး၊ နှလုံးဆေးများ လိုအပ်နေပြီး အလှူရှင်များအနေနှင့် ဆေးဝါးများကို အဓိကထား လှူဒါန်းပေးကြပါရန် ကူညီရေး လုပ်ဆောင်နေသူများက ပြောကြားသည်။
“သက်ကြီးရွယ်အိုအတွက် ဆေးဝါးတွေအတော်လိုအပ်နေတယ်။ ဆေးတွေ လာလှူပေမယ့် ဆေးဝါးလိုအပ်ချက်မြင့်တက်နေတယ်”ဟု ကူညီရေးလုပ်ဆောင်နေသူတစ်ဦးက ပြောသည်။
ဆေးလာလှူသူရှိသော်လည်း (ဆေးဆိုင်များမှ မဟုတ်) ဆေးဝါး မလုံလောက်ဘဲ ဆေးဆိုင်များ ဖွင့်သည်ကို လုံးဝမတွေ့ရဟု ၎င်းက ဆိုသည်။
စစ်ကိုင်း ရန်နိုင်ရပ်ကွက်တွင် အိမ်ထောင်စု ၁၇၀၀၊ လူဦးရေ ၉ ထောင်ခန့်ရှိပြီး လူမသေဆုံးဘဲ အဆောက်အအုံ ပြိုကျသူ ၂၁၇ ဦး၊ အဆောက်အအုံပြိုကျရာမှ သေဆုံးသူ ၃၂ ဦး၊ ထိခိုက်ဒဏ်ရာရသူ ၁၃၀၀ ဦးရှိကြောင်း အချက်အလက်များအရ သိရသည်။
ဧပြီလ ၂ ရက်နေ့မှစတင်ကာ စစ်ကိုင်း စကုမော်တွင် UN Agencies များ၏ ကျန်းမာရေးအစီအစဉ်၊ Rapid Need Assessment များကို စတင်လုပ်ဆောင်နေပြီး စစ်ကိုင်းတွင် ငလျင်လှုပ်ခတ်ပြီး နောက်ပိုင်း ငလျင်ဘေးဒဏ်မှ လွတ်ကင်းသူများကို ငလျင်ဘေးရှောင်စခန်း ၈ ခုတွင် နေရာချထားပေးထားသည်။
စစ်ကိုင်းမြို့တွင် ဗလီ ၃ လုံးပြိုကျမှုတွင် မြို့မဗလီတွင် ၅၈ ဦး၊ မြို့တော်ဗလီတွင် ၃၇ ဦး၊ မိုးကျဗလီတွင် ၆၀ စုစုပေါင်း ၁၅၅ ဦး သေဆုံးခဲ့ပြီး ငလျင်ဘေးဒဏ်ခံရသည့် မူဆလင်များမှာ Camp များတွင် မနေဘဲ မင်းလမ်းနှင့် ပန်းပဲတန်းဘက်တွင်သာ နေထိုင်နေကြပြီး ချက်ပြုတ်လှူဒါန်းသည့်အစားအသောက် ရောက်ရှိမှုနည်းပါးနေသဖြင့် လာရောက်လှူဒါန်းပေးကြလျှင် ပိုမိုကောင်းမွန်ကြောင်း ငလျင်ဘေးဒဏ်ခံနေရသူများက ပြောကြားသည်။
အစားအသောက်အနေဖြင့် ငါး၊ ပုဇွန်၊ ကြက်ဥနှင့်ဆိုင်သော ဟင်းများပါဝင်သည့် အစားအသောက်များကို အဓိက လှူဒါန်းပေးနိုင်လျှင် ပိုကောင်းကြောင်းလည်း ကယ်ဆယ်ရေးလုပ်ဆောင်သူများက အကြံပေးသည်။
“လောလောဆယ် မီးလည်း မမွှေးရဲတော့ ချက်ပြီးသား ဝေစေချင်တယ်” ဟု ၎င်းတို့က ဆိုသည်။
၎င်းတို့ဆီတွင် လက်ရှိ၌ ခေါက်ဆွဲခြောက်နှင့် ဆန်အနည်းငယ်ရှိကြကြောင်းလည်း သိရသည်။
စစ်ကိုင်းမြို့အတွင်း စကစဘက်မှ လုံခြုံရေးယူထားမှုနှင့်ပတ်သက်ပြီးလည်း ကူညီနေသူတစ်ဦးက “စစ်ကိုင်းတံတားပေါ်က ဂိတ်တွေကို ဖယ်ပေးတယ်။ သေနတ်တကားကားလုပ်တာတွေကတော့ မပျောက်ဘူး။ လမ်းပြတဲ့ကောင်ကအစ သေနတ်တွေနဲ့။ ဝေခြမ်းရေးလုပ်တဲ့သူဖြစ်ဖြစ် ကယ်ဆယ်ရေးလုပ်တဲ့သူဖြစ်ဖြစ် စိတ်မဖြောင့်ဘူး။ ယူနီဖောင်းနဲ့ရပ်နေတဲ့သူတွေဆီမှာ သေနတ်တွေ ဓားတွေရှိနေတာ မဖြစ်သင့်ဘူး”ဟု ရန်ကုန်ခေတ်သစ်၏ မေးမြန်းမှုကို မှတ်ချက်ပေးသည်။
လက်ရှိတွင် စစ်ကိုင်းမြို့၌ Camp က ၈ ခု ရှိပြီး စကုမော်ဘုန်းကြီးကျောင်း Camp၊ Non-cdm များသင်တန်းလာတက်ရင်း ငလျင်ထိသူများကို ထားသော အထက ၂ Camp ၊ ရန်နိုင်ရပ် အမကကျောင်း Camp၊ စစ်ကိုင်း နှစ် ၇၀၀ ဘောလုံးကွင်း Camp (စစ်ရှောင်ငလျင်ထိစခန်း)၊ မဟာဆီးခုံကြီးဘုရား Camp၊ အထက ၁ ကျောင်း ဘောလုံးကွင်း Camp၊ ပိုးလမ်းဓမ္မာရုံ Camp၊ မြို့သစ်အိုးအိမ် Camp တို့ဖြစ်သည်။
အဆိုပါစခန်းများတွင် ဆေးဝါးများအပြင် ခြင်ထောင်၊ သွားတိုက်တံ၊ မိုးကာ၊ ဓာတ်ဆားနှင့် မီးများလည်း လိုအပ်နေကြောင်း ကယ်ဆယ်ရေးစခန်းများမှသိရသည်။
ပုံ- မြန်မာနိုင်ငံမီးသတ်တပ်ဖွဲ့
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
