ရန်ကုန်၊ ဧပြီ ၄
မန္တလေတိုင်း၊ ပျော်ဘွယ်မြို့ KBZ ဘဏ်ပြိုကျမှုတွင် ပိတ်မိနေသူများကို ဦးစားပေး ကယ်ထုတ်ခြင်းမရှိဘဲ ဘဏ်တာဝန်ခံများက စစ်တပ်ကို လုံခြုံရေး ခေါ်၍ ပိုက်ဆံများကိုသာ ယူဆောင်ခဲ့ခြင်းကြောင့် လူသေဆုံးမှုများပြားခဲ့ကြောင်း နစ်နာသူ မိသားစုဝင်တချို့နှင့် ဒေသပြည်သူများက ရန်ကုန်ခေတ်သစ်သတင်းဌာနထံသို့ပြောဆိုသည်။
မတ်လ ၂၈ ရက်နေ့ လှုပ်ခတ်ခဲ့သော အင်အားပြင်း မြေငလျင်ကြောင့် ပျော်ဘွယ်မြို့ရှိ ၅ ထပ်ဆောင် KBZ ဘဏ်မှာ ၃ ထပ် မြေကြီးထဲ ကျွံ့ဝင်သွားကြောင်း၊ ထိုသို့ မြေကြီးထဲ ကျွံ့ဝင်မှုကြောင့် ဘဏ်ဝန်ထမ်း ၁၁ ဦးနှင့် ဘဏ်တွင်ငွေကြေးကိစ္စ လာရောက်ဆောင်ရွက်သူ ပြည်သူ ၃၀ ဦးကျော် ပိတ်မိခဲ့ခြင်းဖြစ်ကြောင်း သိရသည်။
ထိုသို့ ဘဏ်ပြိုကျစဉ်တွင် ပျော်ဘွယ် KBZ ဘဏ် တာ၀န်ခံ ဒေါ်သင်းသင်းယုနှင့် လက်ထောက် တာ၀န်ခံ ဒေါ်ယုယုခင်တို့ လွတ်မြောက်ခဲ့ပြီး အကြမ်းဖက် စစ်တပ်ကို လုံခြုံရေး ခေါ်ဆောင်ကာ ဘဏ်မီးခံ သေတ္တာ ထားရှိသော နေရာကို မြေတူးစက်များဖြင့် တူးဖော်ပြီး ငွေကြေးများကိုသာ ဦးစားပေး ထုတ်ယူဆောင်ခဲ့ကြောင်း သိရှိရသည်။
ပျော်ဘွယ် KBZ ဘဏ် ပြိုကျမှုအတွင်း ပိတ်မိနေသူများထဲမှ လူတချို့သာ အသက်ရှင်လျက် ကယ်ထုတ်နိုင်ခဲ့ပြီး ကျန်သူအားလုံး သေဆုံးခဲ့ကြောင်း ဒေသခံပြည်သူများနှင့် နစ်နာသူ မိသားစုဝင်များထံမှ သိရသည်။
ထို့ပြင် ပိတ်မိနေသူများကို ကယ်ဆယ်ရန် ဒေသပြည်သူများက ၁ နာရီ သိန်း ၃၀ ဖြင့် ငှားရမ်းရသော မြေတူးစက်များဖြင့် ဝင်ရောက် ကယ်ထုတ်ရန် တောင်းဆိုခဲ့သော်လည်း ဘဏ်တာဝန်ခံက ခွင့်မပြုခဲ့ကြောင်း၊ အောင်ပန်းနှင့် မိတ္ထီလာမှ လာသည့် ကယ်ဆယ်ရေးသမားများကိုလည်း စစ်တပ်က မောင်းထုတ်ခဲ့ကြောင်း သိရှိရသည်။
“ငလျင် စစချင်း လှုပ်တဲ့ အချိန်မှာ ဘဏ်တံခါးက အသေပိတ်သွားတာ အဲတာကို ပိတ်မိနေတဲ့ Customer တွေက ဖွင့်ခိုင်းတာကို ဖွင့်မပေးလို့ အကုန်ပိတ်မိပြီး သေကုန်တာ ဘဏ်အရှေ့ဘက်ကနေ ကယ်ဆယ်ရေး လုပ်တာမျိုး မဟုတ်ဘဲနဲ့ ဘဏ်ကိုလာအပ်တဲ့ ပိုက်ဆံထားတဲ့ မီးခံ သေတ္တာနားလေးကနေပြီးတော့ အပေါက်ဖောက်တာ အဲလိုဖောက်တာဆိုတော့ Customer တွေရဲ့ ရုပ်အလောင်းတွေကို မတွေ့ဘဲနဲ့ ပိုက်ဆံထားတဲ့ နေရာကိုပဲ မြေတူးစက်တွေနဲ့ ထိုးချပြီး တွေ့တဲ့ ပိုက်ဆံတွေကိုပဲကောက်လိုက် တွေ့တဲ့ အလောင်းတွေကို လောက်ပဲ ပြန်ပေးတာ အလောင်း တွေကိုလည်း ကြည့်ခွင့်မပေးဘဲ ဇွတ်ကို သယ်ထုတ်တာ ကယ်ဆယ်ရေးသမားတွေကလည်းလာတယ်။ လာတာကိုမှ လက်သင့်မခံဘူး။ လက်နက်ကိုင်ထားတဲ့ သူတွေက အကုန်လုံးကို ပြန်လွှတ်တာ ငလျင်လှုပ်ပြီး နောက်ရက်ထိကို အသက်ရှင်တဲ့ သူတွေရှိတယ် အကုန်လုံးကလည်း အသံပေးတယ်။ လူ ၄၀ ကျော်လောက်ရှိတယ်။ အောက်ကနေ ဝိုင်းအော်ပြီး အသံပေးတယ် အဲဒါကို ကယ်မယ် ကယ်မယ်ဆိုပြီး ပိုက်ဆံတွေကိုပဲ ထုတ်ယူသွားကျတာ” ဟု နစ်နာသူ မိသားစုဝင် တစ်ဦးက ပြောဆိုသည်။
အဆိုပါ ပျော်ဘွယ်မြို့ KBZ ဘဏ် ပြိုကျသည့် နေရာကို မတ်လ ၃၀ ရက်နေ့တွင် ဘဏ်ပိုင်ရှင် အောင်ကို၀င်း ရောက် ရှိလာကြောင်း၊ ၎င်းရောက်ရှိလာပြီးနောက် ညနေပိုင်းတွင် စင်္ကာပူနိုင်ငံမှ ကယ်ဆယ်ရေးအဖွဲ့နှင့် မီးသတ်များ ရောက်ရှိလာပြီး စစ်ဆေးမှုများ ပြုလုပ်စဉ်တွင် ပိတ်မိသူ အားလုံး အစာငတ်ခြင်း၊ ရေငတ်ခြင်း၊ သွေးလွန်ခြင်းနှင့် အောက်စီဂျင် ပြတ်လပ်ခြင်းတို့ကြောင့် သေဆုံးသွားခဲ့သည်ဟု ပြောဆိုခဲ့ကြောင်း သိရသည်။
“၂၉ ရက်နေ့ထိ ပိတ်မိနေတဲ့ သူတွေရဲ့ အသံတွေကို ကြားနေရတုန်းပါပဲ အဲ့နေမှာလည်း ကယ်ဆယ်ရေးတွေ စတင်တာ မလုပ်သေးဘူး။ ရဲ နဲ့ စစ်သားတွေကိုတောင် လုံခြုံရေးယူပြီး ပိုက်ဆံတွေကို အရင်ထုတ်နေတုန်းပဲ ပိုင်ရှင် အောင်ကို၀င်း က ၃၀ ရက်နေ့အလောင်းတွေ အနံ့ထွက်တော့မှ ရောက်လာပါတယ်။ ရောက်လာတဲ့ တိုင်အောင်လည်း ကယ်ဆယ်ရေး အစီအစဉ် မလုပ်သေးပါဘူး။ ညနေပိုင်း စင်္ကာပူ ကယ်ဆယ်ရေးနဲ့ မီးသတ်တွေလာပြီး စစ်ကြည့်လိုက်တော့ ပိတ်မိနေသူ အားလုံးက အစာငတ် ၊ ရေငတ် ၊သွေးလွန် ၊ အသက်ရှုမရ ဖြစ်ပြီး သေဆုံးသွားတယ်လို့ ပြောပါတယ်။ ရပ်မိ ရပ်ဖတွေက မြေတူးစက် ၁ နာရီ သိန်း ၃၀ နဲ့ ၂ နာရီစာငှားပေးပါ့မယ်ဆိုတာကို အကယ်မခံတာပါ။ တစ်ကယ်ဆို ပိတ်မိနေတဲ့သူတွေ အသက်ရှင်နေပါလျက်နဲ့ ဘဏ်တာ၀န်ခံတွေက မှားယွင်း ဆုံးဖြတ်လို့ အသက်များစွာဆုံးရှုံးခဲ့ရတာပါ” ဟု ဒေသပြည်သူ တစ်ဦးက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
