ထိုင်းနိုင်ငံ၊ ဘန်ကောက်မြို့ ရှိ စစ်သံရုံးအနီးနှင့် MBK ကုန်တိုက်အနီးတွင် မင်းအောင်လှိုင်ကို ဆန္ဒပြ၊ ရှန်ဂီလာဟိုတယ်အနီးသွားရောက် ဆန္ဒပြသူ မြန်မာနိုင်ငံသား ကိုဖြိုးပိုင် ဖမ်းဆီးခံထားရ
ရန်ကုန်၊ ဧပြီ ၄
ထိုင်းနိုင်ငံ၊ ဘန်ကောက်မြို့ ၊ စစ်သံရုံးအနီးနှင့် MBK ကုန်တိုက်အနီးတွင် အကြမ်းဖက် စစ်ခေါင်းဆောင် မင်းအောင်လှိုင်ကို ဆန္ဒပြမှု လုပ်ဆောင်ခဲ့ကြောင်း သိရှိရသည်။
ယနေ့ ဧပြီလ ၄ ရက်နေ့ မွန်းလွဲပိုင်း ဘန်ကောက်မြို့ ၊ စစ်သံရုံးအနီး ဒဂုံမြို့သစ်မြောက်ပိုင်းကျောင်းသားသမဂ္ဂ (ဗကသများအဖွဲ့ချုပ်) မှ နိုင်ငံခြားရောက် တော်လှန်ရေး ရဲဘော်များနှင့်ပူးပေါင်း၍ မင်းအောင်လှိုင်ကို ဆန္ဒပြခဲ့ကြသည်။
ယင်းအပြင် MBK ကုန်တိုက်အနီးတွင်လည်း မင်းအောင်လှိုင်ကို ဆန့်ကျင်သော စာသားများကိုင်ဆောင်၍ ထိုင်းရောက် မြန်မာတချို့က ဆန္ဒပြခဲ့ကြောင်း သိရှိရသည်။
အလားတူ ယမန်နေ့ အကြမ်းဖက် စစ်ခေါင်းဆောင် မင်းအောင်လှိုင်ကို ဆန္ဒပြရန် သွားသည့် မြန်မာနိုင်ငံသား ဖြိုးပိုင်မှာ ဘန် ကောက်မြို့ ရှန်ဂီလာဟိုတယ်အနီးတွင် ဖမ်းဆီးခံခဲ့ရပြီး လက်ရှိအချိန်အထိ ထိုင်းရဲများက ဖမ်းဆီးထားဆဲဖြစ်ကြောင်း၊ ၎င်းကို မြန်မာပြည် ပြန်ပို့မည်ကို စိုးရိမ်နေရကြောင်း ကိုဖြိုးပိုင်၏ မိတ်ဆွေတချို့က ရန်ကုန်ခေတ်သစ်သတင်းဌာနထံသို့ ပြောဆိုသည်။
