ရှမ်းပြည်နယ်၊ ညောင်ရွှေမြို့နယ်တွင် ငလျင်ဒဏ်ကြောင့် လူ ၁၀၀ နီးပါး သေဆုံးခဲ့သော အင်းလေးဒေသရှိ ကျေးရွာ ၆ ရွာမှ ထောင်နှင့်ချီသော ပြည်သူများ သောက်ရေ၊ စားနပ်ရိက္ခာနှင့် အမိုးအကာများ အရေးပေါ် လိုအပ်နေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၂၈ ရက်နေ့တွင် လှုပ်ခတ်ခဲ့သော အင်အားပြင်း ငလျင်ဒဏ်ကြောင့် အင်းလေးဒေသရှိ ပြည်သူများလည်း ပြင်းထန်စွာ ခံစားခဲ့ရပြီး ထောင်နှင့်ချီသော နေအိမ်များလည်း ပျက်စီးခဲ့ကြောင်း သိရသည်။
လက်ရှိချိန်တွင် အင်းလေး ဒေသရှိ ရွာလုံးကျွတ် နီးပါး ပျက်စီးခဲ့သော မြောင်းဝကြီးရွာ၊ အိုင်ထောင့်ကြီးရွာ၊ ရှေ့ဝကြီးရွာ၊ ကေလာရွာ၊ ဇရပ်ကြီးရွာ နှင့် နန်းပန်ရွာ တို့မှ ပြည်သူများသည် သောက်ရေနှင့် စားနပ်ရိက္ခာများ အရေးပေါ် လိုအပ်နေခြင်းဖြစ်ကြောင်း သိရှိရသည်။
အဆိုပါ ကျေးရွာမှ ပြည်သူများသည် လက်ရှိချိန်တွင် လှေပေါ်၌ အခင်းများခင်း၍ ဖြစ်သလို နေထိုင်နေရပြီး ဆန်ပြုတ်များသာ သောက်သုံးနေရကာ လာရောက် လှူဒါန်းသော အလှူရှင်များကိုသာ စောင့်ဆိုင်းကာ နေထိုင်နေရကြောင်း သိရသည်။
ယင်းကျေးရွာနေ ပြည်သူများကို စစ်ကောင်စီ ဘက်မှ လာရောက် လှူဒါန်းခြင်းများလည်းမရှိသေးဘဲ ပရဟိတ အဖွဲ့တချို့သာ လှူဒါန်းမှုရှိကြောင်း၊ ထို့ပြင် ပြည်သူများသည် နေအိမ်များ ပြန်လည် တည်ဆောက်ရေးအတွက် အခက်အခဲများလည်းရှိနေပြီး မိုးကာနှင့် ဝါးလုံးများလည်း လိုအပ်လျက်ရှိကြောင်း သိရှိရသည်။
“ကျေးရွာတိုင်း လိုလိုက ပျက်စီးဆုံးရှုံးမှုရှိပေမယ့် မြောင်းဝကြီးကျေးရွာရယ် အိုင်ထောင့်ကြီးကျေးရွာရယ် ရှေ့ဝကြီးကျေးရွာ ကေလာကျေးရွာရယ် ဇရပ်ကြီးကျေးရွာရယ် နန်းပန်ရွာရယ်ကတော့ အဆိုးဆုံး ငလျင်ဒဏ်ကို ထိသွားတာ ရွာလုံးကျွတ် နီးပါးကို ပျက်စီးမှုဖြစ်ခဲ့တဲ့ ရွာတွေပါ။ ပရဟိတ အဖွဲ့အစည်း တချို့လာလှူတာမျိုးရှိတယ်။ ရေအလှူရှင်တွေကိုလည်း ကျွန်တော်တို့ တောင်းခံထားတယ်။ သောက်ရေးတွေ လှူဖို့အတွက်ပေါ့။ ဆန်လာလှူရင် ဆန်ပြုတ်သောက်ပြီး နေထိုင်နေရတာပေါ့။ အလှူရှင်တွေကိုလည်း လာရောက်လှူတန်းပေးကြဖို့ မေတ္တာရပ်ခံပါတယ်” ဟု ဒေသပြည်သူ တစ်ဦးက ပြောဆိုသည်။
အင်းလေးဒေသလူ့အခွင့်အရေးအဖွဲ့၏ မတ်လ ၃၀ ရက်နေ့ ထုတ်ပြန်သော စာရင်းအရ ငလျင်ဒဏ်ကြောင့် အင်းလေးဒေသတွင် သေဆုံးသူ ၈၉ ဦးရှိပြီး နေအိမ် ၂၃၃၇ လုံး ပျက်စီးခဲ့ကြောင်း သိရသည်။
