နေပြည်တော်တွင် ငလျင်ဒဏ်သင့် Non-CDM ဝန်ထမ်းများ ရုံးမဖြစ်မနေ ပြန်လည်တက်ကြရန်နှင့် နေပြည်တော်ပြင်ပသို့ ပြောင်းရွှေ့ ထွက်ခွာခြင်းမလုပ်ရန် စစ်ကောင်စီက ညွှန်ကြား
ငလျင်ဒဏ်သင့် ဝန်ထမ်းများ စားဝတ်နေရေး အဆင်ပြေစေရန် စစ်ကောင်စီက ပံ့ပိုးမှု အလွန်နည်းပါး
ရန်ကုန်၊ ဧပြီ ၅
နေပြည်တော်တွင် ငလျင်ဒဏ်သင့် Non-CDM ဝန်ထမ်းများအနေဖြင့် ရုံးမဖြစ်မနေ ပြန်လည်တက်ကြရန်နှင့် နေပြည်တော်ပြင်ပသို့ ပြောင်းရွှေ့ ထွက်ခွာခြင်းမလုပ်ရန် စစ်ကောင်စီက ညွှန်ကြားလာကြောင်း နေပြည်တော် Non-CDM ဝန်ထမ်းများက ရန်ကုန်ခေတ်သစ်သတင်းဌာနထံသို့ ပြောဆိုသည်။
မတ်လ ၂၈ ရက်နေ့ မွန်းလွဲပိုင်း လှုပ်ခတ်ခဲ့သော ငလျင်ကြောင့် နေပြည်တော်ရှိ ဝန်ထမ်းအိမ်ရာများ၊ ဝန်ကြီးဌာနရုံးများစွာ ပြိုကျပျက်စီးမှုများစွာဖြစ်ပေါ်ခဲ့သည့်အပြင် ဝန်ထမ်းများနှင့် မိသားစုဝင်များလည်း သေဆုံးမှုများ ရှိခဲ့ကြောင်း၊ မတ်လ ၂၈ ရက်နေ့ ငလျင်လှုပ်ခတ်ပြီး ၇ ရက်အကြာတွင် စစ်ကောင်စီက Non-CDM ဝန်ထမ်းများ အနေဖြင့် လာမည့် ဧပြီ လ ၇ ရက်နေ့မှစတင်ပြီး ရုံးမဖြစ်မနေ တက်ရန်၊ ရုံးသို့ လာရောက် လက်မှတ်ရေးထိုး သတင်းပေးပို့ ရန် ညွှန်ကြားလာခြင်းဖြစ်ကြောင်း သိရှိရသည်။
သို့ရာတွင် လက်ရှိအချိန်အထိ Non-CDM ဝန်ထမ်းများနှင့် မိသားစုဝင်များမှာ ငလျင်ဘေးကြောင့် နေထိုင်စရာ ပျောက်ဆုံးနေပြီး လမ်းပေါ်နှင့် နေရာချထားပေးသည့် ရွက်ဖျင်တဲငယ်များတွင် ဖြစ်သလို နေထိုင်နေရဆဲဖြစ်ကြောင်း၊ ပြိုကျနေသော ဝန်ထမ်းအိမ်ရာများအောက်မှ အလောင်းများကို ရှင်းလင်းနိင်ခြင်းမရှိသေးဘဲ ဖြစ်သလို နေထိုင်နေရသည့်အပြင် သောက်ရေနှင့်သုံးရေ အခက်အခဲ၊ ချက်ပြုတ်စားသောက်စရာ အခက်အခဲများလည်း ကြုံတွေ့နေရကြောင်း သိရှိရသည်။
“လာမယ့် ဧပြီလ ၇ ရက်နေ့ ဝန်ထမ်းတွေ ရုံး ပြန်တက်ရမယ်။ သတင်းပို့ခိုင်းတယ်။ ရုံးတက် လက်မှတ်ထိုးရမယ်။ နေပြည်တော်ထဲမှာပဲ ရှိနေတယ်ဆိုတာအတည်ပြု သတင်းပို့ခိုင်းတာ” ဟု နေပြည်တော်၊သမဝါယဝန်ကြီးဌာနမှ အရာထမ်းတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
လတ်တလော နေပြည်တော်မှ Non-CDM ဝန်ထမ်းများ နေပြည်တော်သို့ မိသားစုလိုက် စွန့်ခွာနေသည်ဆိုသော သတင်းများကြောင့် ခွင့်ပြုချက်မရဘဲ နေပြည်တော်မှ စွန့်ခွာမှုများကို ခွင့်မဲ့ ပျက်ကွက်ဟု သတ်မှတ်ပြီး ဝန်ထမ်း စည်းမျည်း၊ စည်းကမ်းများနှင့်အညီ အရေးယူမည်ဖြစ်ကြောင်း၊ သက်ဆိုင်ရာဝန်ကြီးဌာနများအနေဖြင့် ငလျင်ဒဏ်သင့် ဝန်ထမ်းများအတွက် တတ်စွမ်းသမျှ အကူအညီပေးနေသည်ဟု ဝန်ထမ်းများကို အသိပေးလာကြောင်း သိရှိရသည်။
မတ်လ ၂၈ ရက်နေ့ လှုပ်ခတ်ခဲ့သော ငလျင်ကြောင့် နေပြည်တော်ရှိ မြန်မာ့မီးရထားရုံးချုပ် ဝန်ထမ်းအိမ်ရာများအနက်မှ ၄ ထပ်တိုက် အမှုထမ်းအိမ်ရာ ၂၅ လုံး၊ အရာထမ်းအိမ်ရာ ၁၇ လုံးမှာ ပျက်စီးခြင်း၊ ပြိုကျခြင်းနှင့် အက်ကွဲခြင်းတို့ကြောင့် လူနေထိုင်၍ မရတော့ကြောင်း၊ ထို့ကြောင့် စစ်ကောင်စီက ဝန်ထမ်းများနှင့် မိသားစုများကို နေပြည်တော်၊ ပုဗ္ဗသီရိမြို့နယ်ရှိ နေပြည်တော်ဘူတာကြီး အမှတ် ၁ ပလက်ဖောင်းနှင့် ကုန်းလမ်းပို့ဆောင်ရေး ဝင်းထဲတွင် ယာယီနေထိုင်ရန် နေရာချထားပေးကြောင်း၊ သို့ရာတွင် မည်သည့် အကူအညီမှ မပေး၍ သောက်သုံးရေ၊ စားနပ်ရိက္ခာနှင့် အမိုးအကာများ အကူအညီလိုအပ်နေကြောင်း သိရှိရသည်။
“ဘယ်သူမှလည်း လာမကြည့်ဘူး။ ရေတောင် တစ်ဘူး ၂၀၀၀ နဲ့ ဝယ်သောက်နေရတယ်။ ငလျင်ကြောင့် မြန်မာ့မီးရထားဝန်ထမ်းနဲ့မိသားစုဝင် ၁၂ ဦးသေဆုံးပါတယ်။ ၁၄ ဦးကတော့ ပြင်းထန်ဒဏ်ရာရပါတယ်။ ကျနော်တို့ကို ဘယ်သူမှလည်း လာမကြည့်ပါဘူး။ သောက်ရေမရှိလို့ သောက်ရေ ၂၀ လီတာ တစ်ဘူးကို ၂၀၀၀နဲ့ဝယ်သောက်နေရတယ်” ဟု မြန်မာ့မီးရထားဝန်ထမ်းတစ်ဦးက ဆိုသည်။
စစ်ကောင်စီက ငလျင်ဒဏ်ကြောင့် ပျက်စီးဆုံးရှုံးသွားသော နေရာများကို ပြုပြင်နေရာတွင် နေပြည်တော်စစ်ရုံးချုပ်၊ သမ္မတအိမ်တော်၊ ကာကွယ်ရေးဝန်ကြီးဌာန၊ လမ်းတံတားများကို ဦးစားပေးပြုပြင်နေပြီး ဝန်ထမ်းအိမ်ရာများကိုမူ ဦးစားပေးပြင်ဆင်ခြင်းမရှိသေးကြောင်း သိရှိရသည်။
“ဝန်ထမ်းအိမ်ရာတွေကို ပြင်ဖို့ မပြောနဲ့ ဒီကျွံ့သွားတဲ့ တိုက်အောက်မှာရှိတဲ့ မိသားစုဝင်တွေ အလောင်းတောင် သေချာ မရှင်းပေးသေးဘူး။ ပုတ်စော်ကနံနေပြီ။ မီးသတ်ကို အလောင်းလာထုတ်ပေးဖို့ အကြောင်းကြားတော့လည်း အလှည့်စောင့်ပါပြောတယ်။ ဌာနအကြီးအကဲတွေကိုပြောတော့လည်း ပုတ်စော်နံတဲ့နေရာနဲ့ ဝေးဝေးနေ နောက် ရက်ပိုင်းကြာရင် အနံ့ပျောက်ပြီး အရိုးသွားပါလိမ့်မယ်လို့ပြောတယ်။ ဘယ်လောက်တောင် တာဝန်မယူလဲ စဉ်းစားကြည့်” ဟု နေပြည်တော်ဝန်ထမ်းများ နေထိုင်ရာ ခရေအိမ်ရာတွင် နေထိုင်သူ Non-CDM ဝန်ထမ်းတစ်ဦးက ဆိုသည်။
နေပြည်တော်သည် မတ်လ ၂၈ ရက်နေ့ လှုပ်ခတ်ခဲ့သော ငလျင်ကြောင့် ပျက်စီးဆုံးရှုံးမှု များပြားသော နေရာဖြစ်ပြီး ထိခိုက်သေဆုံးမှုအရေအတွက် များပြားသော နေရာလည်းဖြစ်ကြောင်း သိရှိရသည်။
ဓာတ်ပုံ- နေပြည်တော်တွင် ငလျင်ဒဏ်ကြောင့် ဝန်ထမ်းအိမ်ရာများ ပြိုပျက်ပျက်စီးနေစဥ်။
