တွန်းဇံမြို့ရှိ CNA တပ်စခန်းကို စစ်တပ်နှင့် ZRA ပူးပေါင်း အဖွဲ့က ဝင်ရောက် တိုက်ခိုက်ပြီး Nakzang ရွာကို ရွာလုံးကျွတ် မီးရှို့ဖျက်ဆီးသွား
ချင်းပြည်နယ်၊ တွန်းဇံမြို့ရှိ CNA တပ်စခန်းကို အကြမ်းဖက် စစ်တပ်နှင့် ZRA ပူးပေါင်း အဖွဲ့က ဝင်ရောက် တိုက်ခိုက်ပြီး Nakzang ရွာကို ရွာလုံးကျွတ် မီးရှို့ဖျက်ဆီးသွားကြောင်း CNA သတင်းနှင့်ပြန်ကြားရေးဌာနမှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလ ၃ ရက်နေ့ နံနက် ၆ နာရီခန့်တွင် အိန္ဒိယနိုင်ငံ၊ မဏိပူရပြည်နယ်နှင့် ချင်းပြည်နယ် နယ်စပ်တွင် ခြေကုပ်ယူထားသော အကြမ်းဖက် စစ်တပ်နှင့် ပူးပေါင်းထားသည့် Zomi Revolutionary Army (ZRA) တပ်ဖွဲ့က ချင်းလဲန်၊ တွန်းဇံမြို့နယ်အတွင်းရှိ CNA တပ်မ ၄ စခန်းကို ဝင်ရောက် ကျူးကျော် တိုက်ခိုက်ခဲ့ကြောင်း သိရသည်။
ယင်း ကျူးကျော် တိုက်ခိုက်မှု အတွင်း ချင်းပြည်အစိုးရ၊ ချင်းအမျိုးသား တပ်မတော် နှင့် ပူးပေါင်းတပ်ဖွဲ့များက ပြန်လည် တိုက်ထုတ်ခဲ့ခြင်းကြောင့် ZRA တပ်ဖွဲ့ဝင်များ အထိနာပြီး ပြန်လည်ဆုတ်ခွာသွားကာ တိုက်ပွဲအတွင်းမှ ZRA တပ်ဖွဲ့ဝင်များ အသုံးပြုသော Drone နှင့် လက်နက်ခဲယမ်းအချို့ သိမ်းဆည်းရရှိခဲ့ကြောင်း သိရသည်။
“အသေးစိတ်အချက်အလက်ကတော့ စုဆောင်းနေတုန်းပါ။ ဧပြီလ ၃ ရက်နေ့က တွန်းဇံမှာ တပ်စွဲ ထားတဲ့ CNA တပ်မဟာ ၄ ကို ZRA တွေက ဝင်တိုက်တာပါ။ ၄ ရက်နေ့မှာ CNA ကပြန်တိုက်တဲ့ အတွက် ပြန်ဆုတ်သွားတာဖြစ်ပါတယ်။ ZRA တွေအခြေချတာက မဏိပူရနဲ့ ချင်းပြည်နယ် နယ်စပ် တွေမှာပါ။ ဘယ်အထိ ဆုတ်သွားလဲတော့ မသိရသေးပါဘူး” ဟု CNA သတင်းနှင့်ပြန်ကြားရေးဌာနမှ တာဝန်ရှိသူတစ်ဦးက ပြောဆိုသည်။
ထိုသို့ ဆုတ်ခွာထွက်ပြေးသွားသော ZRA တပ်ဖွဲ့ဝင်များသည် ဆုတ်ခွာရာ လမ်းကြောင်း ပေါ်ရှိ အိမ်ခြေ ၈၀ ခန့်ရှိသော Nakzang ရွာကို မီးရှို့ဖျက်ဆီးခဲ့ပြီး ဘုရားရှိခိုးကျောင်းမှလွဲ၍ ကျေးရွာ တစ်ရွာလုံးကို မီးရှို့ဖျက်ဆီးခဲ့ကြောင်း၊ Nakzang ရွာသည် မဏိပူရ မြစ်ဘေးတွင် တည်ရှိပြီး လက်ရှိချိန်တွင် ကျေးရွာနေ ပြည်သူများသည် နီးစပ်ရာ တွန်းဇံမြို့အတွင်း၌ ဝင်ရောက် ခိုလုံလျက်ရှိကြောင်း သိရသည်။
လက်ရှိကာလသည် အင်အားပြင်းငလျင်ဒဏ်ကြောင့် ပြည်ထောင်စု မြန်မာနိုင်ငံတွင် ဒုက္ခရောက်နေကြသည့် ပြည်သူများကို ကယ်ဆယ်ရေးနှင့် ကူညီထောက်ပံ့ရေးအတွက် ယာယီအပစ်အခတ် ရပ်စဲပြီး ဝိုင်းဝန်း ဆောင်ရွက်နေသည့် အချိန်ဖြစ်သောကြောင့် စစ်ရေးလှုပ်ရှားမှုများ ကန့်သတ်ထားခြင်းကို အခွင့်အရေးယူကာ ကျူးကျော်တိုက်ခိုက်လာခြင်းဖြစ်ကြောင်း CNA သတင်းနှင့်ပြန်ကြားရေး ဌာနက ပြောဆိုထားသည်။
ချင်းအမျိုးသားတပ်မတော်၊ အမှတ် ၄ တပ်မဟာအနေဖြင့် မိမိကိုယ်ကို ခုခံကာကွယ်ရန် လိုအပ်လာလျှင် အကြမ်းဖက် စစ်တပ်နှင့် ၎င်းလက်အောက်ခံ ZRA တပ်ဖွဲ့များကို တိုက်ခိုက်ချေမှုန်းသွားမည် ဖြစ်ကြောင်း အသိပေးထုတ်ပြန်ထားသည်။
