ဘုတလင်မြို့နယ်၊ အောင်သာရွာကို စစ်တပ်က သင်္ကြန်အကြိုနေ့ ညနေပိုင်းတွင် ဝင်ရောက် စီးနင်း မီးရှို့ပြီး ပြည်သူများကို လူသားဒိုင်း အဖြစ် ဖမ်းဆီးသွား

ရန်ကုန်၊ ဧပြီ ၁၃

စစ်ကိုင်းတိုင်း၊ ဘုတလင်မြို့နယ်၊ အောင်သာရွာကို အကြမ်းဖက် စစ်တပ်က သင်္ကြန်အကြိုနေ့ ညနေပိုင်းတွင် ဝင်ရောက် စီးနင်း မီးရှို့ပြီး ပြည်သူများကို လူသားဒိုင်း အဖြစ် ဖမ်းဆီးသွားကြောင်း Budalin Mobile Team-BMT (ဘုတလင်မြို့နယ် ရွေ့လျားစစ်ကြောင်း) မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ယနေ့ ဧပြီလ ၁၃ ရက်နေ့ ညနေ ၅ နာရီ ၂၃ မိနစ်ခန့်တွင် ဘုတလင်မြို့နယ်၊ အောင်သာရွာကို အကြမ်းဖက် စစ်တပ်က ဝင်ရောက် စီးနင်း နေအိမ်များကို မီးရှို့ဖျက်ဆီးကာ ပြည်သူများကို လူသားဒိုင်းအဖြစ် ဖမ်းဆီးသွားခြင်းဖြစ်ကြောင်း သိရသည်။

အကြမ်းဖက် စစ်တပ် မီးရှို့ဖျက်ဆီးမှုကြောင့် ကျေးရွာ အတွင်းရှိ နေအိမ် ၁၀ လုံးကျော် မီးလောင်ပြာကျခဲ့ပြီး ကျေးရွာနေပြည်သူများကိုလည်း ဖမ်းဆီးသွားခြင်းဖြစ်ကြောင်း သိရှိရသည်။

” ညနေ 5နာရီလာက်က ရွာကို ဝင်စီးပြီးမီးရှို့သွားတာပါ။ နေအိမ် ၁၀ လုံးလောက် မီးထဲပါသွားပါတယ်။ ပြည်သူတွေ ထိခိုက်မှုတော့မကြားသေးဘူး။ ပြည်သူတွေကို လူသားဒိုင်း ဓားစာခံ အဖြစ်ဖမ်းသွားတယ်။ ပြည်သူ ဘယ်နှဦး ဖမ်းဆီးခံရတယ်ဆိုတာ မသိရသေးဘူး” ဟု Budalin Mobile Team-BMT (ဘုတလင်မြို့နယ် ရွေ့လျားစစ်ကြောင်း) မှ တာဝန်ရှိသူ တစ်ဦးက ပြောဆိုသည်။

အဆိုပါ အကြမ်းဖက် စစ်တပ်စစ်ကြောင်းသည် ပြည်သူပိုင် နေအိမ်များကို မီးရှို့ဖျက်ဆီးပြီးနောက် နမခ ဌာနချုပ် ဘက်ကို ပြန်လည် ဆုတ်ခွာသွားကြောင်း သိရသည်။

Photo – စစ်ကိုင်းတိုင်းအတွင်းရှိ ကျေးရွာတစ်ရွာကို အကြမ်းဖက် စစ်တပ်က ညအချိန်မီးရှို့ဖျက်ဆီးနေစဉ် (ပုံအဟောင်းဖြစ်သည်)

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar