ရန်ကုန်၊ ဧပြီ ၂၃
ကရင်ပြည်နယ်၊ ကော့ကရိတ်မြို့နယ်၊ ကျုံဒိုးမြို့ ကမ်းနီရွာ ဗလီကို အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၂၂ ရက်နေ့ နံနက်ပိုင်း ကျုံဒိုးမြို့ ကမ်းနီရွာ ဗလီကို အကြမ်းဖက် စစ်တပ်က လေယာဉ်ဖြင့် ဗုံး ၂ လုံး ကျဲချ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်း တိုက်ခိုက်မှု အတွင်း ပြည်သူများ ထိခိုက်မှုမရှိသော်လည်း ဗလီကျောင်းတော်အဆောက် အဦး ထိခိုက် ပျက်စီးခဲ့ကြောင်း သိရှိရသည်။
“ကမ်းနီရွာကို စစ်တပ်က လေယာဉ်နဲ့ မနေ့က နံနက်ပိုင်းက ထပ်ပြီး ဗုံးကျဲ တိုက်ခိုက်သွားတာပါ။ ပြည်သူတွေတော့ အထိအခိုက်မရှိဘူး။ သူတို့ ကျဲတဲ့ ပထမ ၁ လုံးကျတာ မကွဲလို့ နောက် ၁ လုံးထပ်ပစ်ချတာ ဗလီပေါ် ကျရောက် ပေါက်ကွဲတယ်။ ထိခိုက်ပျက်စီးမှုတော့ ရှိတယ်” ဟု ဒေသပြည်သူ တစ်ဦးက ပြောဆိုသည်။
အဆိုပါ ကမ်းနီရွာ ဘုန်းကြီးကျောင်းကို ဧပြီလ ၁၅ ရက်နေ့ကလည်း အကြမ်းဖက် စစ်ကောင်စီက Yak-130 တိုက်လေယာဉ်ဖြင့် ဗုံးကျဲချရာတွင် အသက် ၃ နှစ်အရွယ်ကလေးငယ် ၂ ဦးဖြစ်သည့် မိကျဲကျဲမွန်နှင့် မင်းကွန်ဗလဲ၊ အသက် ၉ နှစ်အရွယ် မင်းလင်းပြည့်အောင်၊ အသက် ၁၅ နှစ်အရွယ် မိပိုးဖူးဇင်၊ အသက် ၃၄ နှစ်အရွယ် ကိုမျိုး၊ အသက် ၇၆ နှစ်အရွယ် ဒေါ်သိန်းရှင် စုစုပေါင်း ၆ ဦးသေဆုံးခဲ့ကြောင်း၊ ထို့ပြင် ပြည်သူ ၇ ဦး၊ ကိုရင် ၈ ပါး ၊ သံဃာ ၂ ပါး အပါအဝင် ၂၀ ဦးနီးပါး ထိခိုက်ဒဏ်ရာရရှိခဲ့သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
