ရန်ကုန်၊ မေ ၁၉
ထိုင်း-မြန်မာနယ်စပ်၊ စစ်ကောင်စီ၏ မော်ဖိုးကေစစ်တပ်စခန်းကို KNLA ပူးပေါင်းတပ်များက စတင်တိုက်ခိုက်နေပြီး ပြည်သူ ၁၀၀ ဝန်းကျင် ထိုင်းနိုင်ငံဘက်သို့ စစ်ဘေးတိမ်းရှောင်ရကြောင်း ထိုင်းစစ်တပ်က သတင်းထုတ်ပြန်သည်။
ယနေ့ မေလ ၁၉ ရက်နေ့ နံနက်ပိုင်းမှစတင်ပြီး စစ်ကောင်စီတပ်၏ မော်ဖိုးကေစစ်စခန်းကို KNLA ၊ KNDO ပူးပေါင်းတပ်များက စတင်တိုက်ခိုက်နေခြင်းဖြစ်ပြီး ဒရုန်းများဖြင့် ဗုံးများကျဲချလျက်ရှိကြောင်း၊ ထိုင်းစစ်တပ်က နယ်စပ်တစ်လျှောက်တွင် အခြေအနေကို စောင့်ကြည့်လျက်ရှိကြောင်း သိရှိရသည်။
မြန်မာဘက်အခြမ်းတွင် တိုက်ပွဲများ စတင်ဖြစ်ပွားချိန် ပြည်သူ ၁၀၀ ဝန်းကျင်မှာ သောင်ရင်းမြစ်ကို ဖြတ်ကူး၍ ထိုင်းနိုင်ငံဘက်သို့ စစ်ဘေးတိမ်းရှောင်လာကြောင်း၊ အဆိုပါ စစ်ဘေးဒုက္ခသည်များကို ထိုင်းစစ်တပ်နှင့်ဒေသအာဏာပိုင်များက ကူညီထားကြောင်း သိရှိရသည်။
မေလ ၁၅ ရက်နေ့တွင် ထိုင်း-မြန်မာနယ်စပ်အနီးရှိ မယ်လ စစ်တပ်စခန်းကို သိမ်းပိုက်ပြီးနောက် မေလ ၁၉ ရက်နေ့တွင် မော်ဖိုးကေစစ်တပ်စခန်းကို KNU က စတင်တိုက်ခိုက်နေခြင်းဖြစ်ကြောင်း သိရှိရသည်။
KNU က မတ်လ၊ ဧပြီလနှင့် ယခု မေလအတွင်းတွင် ထိုင်း-မြန်မာနယ်စပ်အနီးမှ စစ်ကောင်စီ၏ ပူးလူးတူ၊ ခလယ့်ဒေး၊ တခေါဘီခွီး၊ မော်ဖားသူးစခန်း ၊တာလယ်စခန်းနှင့် မယ်လစခန်းများကို ဆက်တိုက် တိုက်ခိုက်သိမ်းယူနိုင်ခဲ့ခြင်းဖြစ်သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
