ရန်ကုန်၊ ဇူလိုင် ၃
ရန်ကုန်တိုင်းတွင် စစ်မှုထမ်းကြေးအပြင် လုံခြုံရေးစရိတ်ဟုဆိုကာ ပျူစောထီးများနှင့်အုပ်ချုပ်ရေးအဖွဲ့များက တောင်းခံနေကြောင်း ရန်ကုန်မှ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
၂၀၂၄ ခုနှစ် မေလမှစတင်၍ ရန်ကုန်တိုင်းအတွင်း ကျေးရွာများ၊ ရပ်ကွက်များနှင့်မြို့နယ်များတွင် စစ်မှုထမ်းကြေးဟုဆိုကာ တစ်အိမ်ထောင်လျှင် ငွေကျပ် ၂ သောင်းကျပ်မှစတင်၍ အများဆုံးသိန်းဂဏန်းအထိ တောင်းခံခဲ့ကြကြောင်း၊ အဆိုပါ စစ်မှုထမ်းကြေးတောင်းခံမှုမှာ ၁ နှစ်ကျော်ကြာမြင့်လာချိန် ယခုအခါ လုံခြုံရေးစရိတ်ဟုဆိုကာ သင်္ဃန်းကျွန်းမြို့နယ်၊ ထန်းတပင်မြို့နယ်၊ ကော့မှူးမြို့နယ်၊ ကွမ်းခြံကုန်းမြို့နယ်၊ လှိုင်သာယာမြို့နယ်၊ ဒဂုံမြို့သစ်တောင်ပိုင်း၊ ဒဂုံမြို့သစ် အရှေ့ပိုင်းမြို့နယ်များတွင်ပါ တောင်းခံလာကြောင်း ဒေသပြည်သူများက ပြောဆိုသည်။
“သင်္ဃကျွန်း ဆ/က ရပ်ကွက် မှာတော့ စစ်မှုထမ်းကို ထောက်ပံ့စရိတ်လို့ ပြောတယ်။ လာကောက်တဲ့ စာရွက် မှာတော့ လုံခြုံရေးစရိတ်ဆိုပဲ လုံခြုံရေးလုပ်တာတော့မတွေ့ပါဘူး။ အမျိုးမျိုးငွေလှည့်တောင်းနေတယ်” ဟု သင်္ဃန်းမြို့နယ်မှ ဒေသပြည်သူက ပြောသည်။
ရန်ကုန်တိုင်းအတွင်းရှိ ကျေးရွာ၊ ရပ်ကွက်နှင့်မြို့နယ်များတွင် လုံခြုံရေးအတွက် အများပြည်သူအားလုံး တာဝန်ရှိပြီး လုံခြုံရေးအတွက် ပြည်သူများက ပူးပေါင်းပါဝင်မည်ရမည်ဖြစ်ကြောင်း၊ ပြည်သူများအနေဖြင့် မိမိတို့၏ အလုပ်အကိုင်များအတွက် နေ့စဉ် ရုန်းကန်နေရသဖြင့် ပူးပေါင်းပါဝင်ခြင်းမပြုနိုင်သည်ကို နားလည်ကြောင်း၊ ထို့ကြောင့် လုံခြုံရေးဆောင်ရွက်နေသည့် ပျူစောထီးနှင့် ရပ်ကွက်အုပ်ချုပ်ရေးအဖွဲ့များအတွက် လုံခြုံရေးစရိတ် လစဉ် ပေးဆောင်ရမည်ဟု ကော့မှူးမြို့နယ်တွင် အသိပေးပြောဆိုကြောင်း ဒေသပြည်သူများက ဆိုကြသည်။
” ရွာတွေမှာ ပြည်သူ့စစ်ဗျူဟာအရ လုံခြုံရေးအတွက် ကျေးရွာပြည်သူတွေအားလုံးပါဝင်ရမယ်။ ကင်းစောင့်ရမယ်၊ လုံခြုံရေး ယူရမယ်။ တစ်အိမ်ထောင်ကို တစ်ဦး ပါဝင်ရမယ် ပြောတယ်။ မပါဝင်နိုင်ရင်တော့ လစဉ် ကင်းကြေး လုံခြုံရေးကြေးပေးဆောင်ခိုင်းတယ်။ တစ်အိမ်ထောင်ကို ၂ သောင်းကောက်တယ်။ စစ်မှုထမ်းကြေးက သပ်သပ်၊ လုံခြုံရေးစရိတ်ကြေးက သပ်သပ်။ မဖြစ်မနေ ပေးခိုင်းနေတာ” ဟု ကော့မှူးမြို့နယ်မှ ပြည်သူတစ်ဦးက ပြောဆိုသည်။
အလားတူ ရန်ကုန်တိုင်း၊ ထန်းပင်မြို့နယ်၊ ထိမ်နှစ်ပင်ကျေးရွာတွင်လည်း အုပ်ချုပ်ရေးမှူး လှမြင့်ဌေး(ခ) ကိုငါးကြီးက ပြည်သူများကို အစည်းအဝေးခေါ်ယူ၍ စစ်မှုထမ်းကြေးအဖြစ် တစ်အိမ်ထောင် ၂ သောင်းကျပ်နှုန်း၊ လစဉ် လုံခြုံရေးစရိတ်များ ပေးရမည်ဟုဆိုကာ ပြည်သူများထံမှ ကောက်ခံနေကြောင်း၊ ကျေးရွာရှိ အိမ်ခြေ ၃၀၀ နှင့် ကွက်သစ်မှ အိမ်ထောင်စုပေါင်း ၁၅၀၀ ထံမှ ငွေကြေးများ တောင်းခံနေကြောင်း သိရှိရသည်။
“ထန်းတပင်မှာတော့ ခေါင်းစဉ် အမျိုးမျိုးတပ်ပြီး ငွေတောင်းနေတာ။ ဧည့်စာရင်းက ၇ ရက်ပဲပေးတယ်။ ဧည့် စာရင်း တစ်ခါတိုင်ရင် ၁၀၀၀ ကျပ်၊ ကွက်သစ်မှာ အိမ်ထောင်စု ၁၅၀၀ လောက်ရှိတယ်။ ဧည့်စာရင်းနဲ့နေရတာ။ ဧည့်စာရင်းတင်ကို တစ်လကို သိန်း ၆၀ ကျော်ရတယ်။ စစ်မှုထမ်းကြေးကလည်း လစဉ်ကောက်တယ်။ ဒီကြားထဲ လုံခြုံရေးစရိတ်ဆိုတာကလည်း လစဉ်တောင်းတယ်” ဟု ဒေသပြည်သူတစ်ဦးက ရှင်းပြသည်။
ထိုကဲ့သို့ ခေါင်းစဉ် အမျိုးမျိုးတပ် ငွေကြေးကောက်ခံမှုများကို တိုင်ကြားရန်မှာလည်း ရပ်ကွက်အုပ်ချုပ်ရေးအဖွဲ့ နှင့် ပျူစောထီးများ တိုင်ချင်ရာ တိုင်နိုင်ပြီး တိုင်သည့်သူကို သိရှိပါက အသက်ကို အာမ မခံဟု ခြိမ်းခြောက်မှုကြောင့် မတိုင်ရဲကြကြောင်း၊ စစ်တပ်အုပ်ချုပ်သည့် ခေတ်ဖြစ်၍ တိုင်ကြားသည့်သူများကို လက်နက်ဖြင့်သာ စကားပြောမည်ဟု ပြည်သူများကို ခြိမ်းခြောက်ကြကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
