ရန်ကုန်-မန္တလေး အမြန်လမ်းအနီး စစ်ကြောင်းထိုးလာသော စစ်တပ်ကို တိုက်ခိုက်မှု စစ်သား ၁၀ ဦးသေဆုံးပြီး သေနတ် ၃ လက် သိမ်းဆည်းရရှိ

ရန်ကုန်၊ ဇူလိုင် ၂၁

မန္တလေးတိုင်း၊ မလှိုင်မြို့နယ်၊ ရန်ကုန်-မန္တလေး အမြန်လမ်းပိုင်း အနီး စစ်ကြောင်းထိုးလာသော အကြမ်းဖက် စစ်တပ်ကို တိုက်ခိုက်ခဲ့ရာ စစ်တပ်ဘက်မှ ၁၀ ဦးသေဆုံးပြီး သေနတ် ၃ လက် သိမ်းဆည်းရရှိခဲ့ကြောင်း မိတ္ထီလာခရိုင် အမှတ် ၂ တပ်ရင်းမှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇူလိုင်လ ၁၈ ရက်နေ့ မွန်းလွဲ ၃ နာရီ ၄၅ မိနစ်ခန့်အချိန် ရန်ကုန်-မန္တလေး အမြန်လမ်းအနီးရှိ အောင်သာ (မြောက်) ရွာ နှင့် အောင်သာ(တောင်) ရွာ တွင် ခတ္တခဏ အထိုင်ချပြီး စစ် ကြောင်းထိုးရန် ထွက်လာသော အင်အား ၁၀၀ ခန့်ပါ စစ်ကြောင်းကို တော်လှန်ရေး တပ်ဖွဲ့များက မြင်းရှင် (ခ) မြင်းသေရွာ တွင် ကြိုတင်နေရာယူပြီး စတင် တိုက်ခိုက်ခဲ့ကြောင်း သိရသည်။

‎ယင်း တိုက်ခိုက်မှု အတွင်း အကြမ်းဖက် စစ်ကောင်စီ တပ်သား ၁၀ ဦး သေဆုံးကာ ၂၀ ဦးကျော် ထိခိုက် ဒဏ်ရာရရှိခဲ့ပြီး တိုက်ပွဲဖြစ်ပွားပြီးနောက် အကြမ်းဖက် စစ်ကောင်စီ တပ်သားများထံမှ G-3 သေနတ် ၂ လက်၊ MA-2 သေနတ် ၁ လက် ၊ G-3 ကျည်ဘောက် ၃ ဘောက်၊ 5.56ကျည် ၁၀၀ ကျော်၊ G-3ကျည် ၁၀၀ ကျော်တို့ကို သိမ်းဆည်းရမိခဲ့ကြောင်း သိရှိရသည်။

‎ထိတွေ့ တိုက်ပွဲသည် ၃ နာရီခန့် ကြာမြင့်ခဲ့ပြီး တိုက်ပွဲအတွင်း အထိနာခဲ့သော အကြမ်းဖက် စစ်တပ်ဘက်မှ Mi-35 ဖြင့် ၁ ကြိမ်၊ လက်နက်ကြီးများဖြင့် တရစပ် ပစ်ခတ် တိုက်ခိုက်မှုများ အကြိမ်ကြိမ်ပြုလုပ်ခဲ့ကြောင်း သိရသည်။

“မြင်းရှင်(ခ)မြင်းသေရွာကို စစ်ကြောင်းထိုးဖို့ ထွက်လာတဲ့ အင်အား ၁၀၀ ခန့်ပါ စစ်ကြောင်းကို ကျနော်တို့ ကြိုတင်သတင်းရပြီး စောင့်ဆိုင်း တိုက်ခိုက်ခဲ့တာပါ။ စစ်ခွေး ၁၀ ကောင်သေပြီး ၂၀ ကျော် ထိခိုက် ဒဏ်ရာရတယ်။ သေနတ် ၃ လက်လည်း သိမ်းဆည်းရရှိပါတယ်” ဟု မိတ္ထီလာခရိုင် အမှတ် ၂ တပ်ရင်းမှ တာဝန်ရှိသူက ပြောဆိုသည်။

အဆိုပါ တိုက်ခိုက်မှုကို မိတ္ထီလာခရိုင် အမှတ် ၂ တပ်ရင်းနှင့် အတူ မြင်းခြံခရိုင် အမှတ် ၈ တပ်ရင်း၊ မိတ္ထီလာခရိုင် အမှတ် ၃ တပ်ရင်း တို့က ပူးပေါင်း လုပ်ဆောင်ခဲ့ကြောင်း သိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar