ရန်ကုန်၊ ဇူလိုင် ၂၄
စစ်ကိုင်းတိုင်း၊ ယင်းမာပင်မြို့နယ် ထန်းတောတိုက်ရွာကို တိုက်ပွဲဖြစ်ပွားခြင်းမရှိဘဲ အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် နေအိမ်များ ပျက်စီးခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇူလိုင်လ ၂၃ ရက်နေ့ နံနက် ၁၁ နာရီ ၃၀ မိနစ်ခန့်တွင် တံတားဦးလေတပ်မှ တက်လာသည့် ဂျက်ဖိုက်တာ ၁ စီးသည် ယင်းမာပင်မြို့နယ်၊ ထန်းတောတိုက်ရွာကို တိုက်ပွဲဖြစ်ပွားခြင်းမရှိဘဲ ပေါင် ၅၀၀ ဗုံးသီး ၁ လုံးနှင့် ပေါင် ၃၀၀ ဗုံးသီး ၁ လုံး ကျဲချ တိုက်ခိုက်ခဲ့ကြောင်း သိရသည်။
ထိုတိုက်ခိုက်မှု အတွင်း ကျေးရွာ အတွင်းရှိ ပြည်သူပိုင် နေအိမ်များ ပျက်စီးခဲ့ပြီး ပြည်သူများ ထိခိုက်မှု မရှိကြောင်း၊ ပြည်သူများ မွေးမြူထားသော နွား ၁ ကောင် သေဆုံးခဲ့ကြောင်း သိရှိရသည်။
“မနေ့က တံတားဦး လေတပ်က ဂျက်ဖိုက်တာက ယင်းမာပင် အနောက်ခြမ်း ထန်းတောတိုက်ရွာကို တိုက်ပွဲဖြစ်ပွားခြင်းမရှိဘဲနဲ့ အကြောင်းမဲ့ ဗုံးကျဲသွားတာ နေအိမ်တွေ ထိခိုက်ပျက်စီးသွားတယ်။ ပြည်သူတွေတော့ ထိခိုက်မှုမရှိဘူး။ ပေါင် ၅၀၀ ဗုံး ၁ လုံးနဲ့ ပေါင် ၃၀၀ ဗုံး ၁ လုံး ကျဲချသွားတာ ပြည်သူတွေက တောထဲ တောင်ယာလုပ်သွားနေတဲ့ချိန်မို့ လွတ်မြောက်သွားတာ”ဟု ဒေသပြည်သူတစ်ဦးက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
