ရန်ကုန်၊ ဇူလိုင် ၂၈
ရှမ်းပြည်နယ်၊ တာချီလိတ်မြို့ပေါ်တွင် မယ်ဆိုင်ချောင်းရေမြင့်တက်လာသဖြင့် ရေကြီးမှုများဖြစ်ပေါ်နေပြီး လူဦးရေ ၁၀၀၀ ခန့် ဘေးလွတ်ရာ ရွေ့ပြောင်းနေရကြောင်း ကယ်ဆယ်ရေးသမားများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇူလိုင်လ ၂၈ ရက်နေ့ နံနက်ပိုင်းမှ စတင်ပြီး မယ်ဆိုင်ချောင်းရေသည် တာချီလိတ်မြို့ လွယ်တော်ခမ်းရပ်ကွက်ကို ဝင်ရောက်လာပြီး စိုးရိမ်ရေမှတ်အထက် ၅ ပေခွဲခန့်အထိ ကျော်လာကြောင်း၊ ရပ်ကွက် ၃ ခုမှ ထောင်နှင့်ချီသော ပြည်သူများသည် ဘေးလွတ်ရာကို ရွေ့ပြောင်းနေရကြောင်း သိရသည်။
လက်ရှိချိန်တွင် တာချီလိတ်မြို့ပေါ်ရှိ လွယ်တော်ခမ်းရပ်ကွက်၊ မယ်ခေါင်ရပ်ကွက် နှင့် တာလော့ရပ်ကွက် မှ ပြည်သူများကို ဒေသတွင်း ပရဟိတ အဖွဲ့များက ကယ်ဆယ်ရေး စခန်း ၂ ခုဖွင့်လှစ်ပြီး ကူညီကယ်ဆယ်ရေး လုပ်ငန်းများ ဆောင်ရွက်ပေးကြောင်း သိရှိရသည်။
“အခြေအနေကတော့ ဘေးလွတ်တဲ့နေရာကို ရှောင်နေတာပေါ့။ လူထိခိုက်မှုတော့ မရှိပါဘူး။ ဘေးလွတ်ရာရွှေ့ပြောင်းနေရတာ ခန့်မှန်းခြေ လူဦးရေ ၁၀၀၀ လောက် ရှိမယ်။ ကယ်ဆယ်ရေးအနေနဲ့ကတော့ အပြင်ထွက်ချင်တဲ့လူတွေကို စက်လှေတွေနဲ့ အပြင်ကို ပို့ပေးနေတာပေါ့။ ရေလွတ်တဲ့နေရာကို ပို့ပေးနေတာပေါ့။ မီးသတ်တပ်ဖွဲ့တွေနဲ့ ပူးပေါင်းပြီးတော့ အဲဒီလိုမျိုးတွေ လုပ်ပေးတယ်။ ကယ်ဆယ်ရေး စခန်း ၂ ခု လောက်ရှိပါတယ်။ ဖွင့်ပေးထားပါတယ်။ သူတို့နေဖို့အတွက် ထမင်းတွေလည်း ပရဟိတအသင်းတွေက ပေါင်းပြီး လှူပေးမှာ အခု စီစဥ်နေပြီ” ဟု ဒေသပြည်သူ တစ်ဦးက ပြောဆိုသည်။
မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ တာချီလိတ်တွင် မယ်ဆိုင်ချောင်းရေသည် စိုးရိမ်ရေအမှတ် အထက် ၅ ပေခွဲခန့်ကျော် ရောက်ရှိနေပြီး နောက် ၁ ရက်တွင် ၂ ပေခွဲမြင့်တက်လာနိုင်ကာ စိုးရိမ်ရေအမှတ်အထက်တွင် ဆက်လက် တည်ရှိနိုင်ကြောင်း သိရှိရသည်။
အလားတူ ရှမ်းပြည်နယ်တောင်ပိုင်း၊ ကလောမြို့နယ်တွင်လည်း ကလောချောင်းရေက မြင့်တက်လာသဖြင့် ကလောမြို့ ရပ်ကွက် ၄ နှင့် ရပ်ကွက် ၂ တို့တွင် နေအိမ်အများအပြား ရေနစ်မြုပ်နေပြီး ချောင်းရေမှာလည်း ရေစီးသန်စွာဖြင့် မြို့တွင်း အနိမ့်ပိုင်းနေရာများသို့ စီးဝင်ရောက်နေကြောင်း သိရှိရသည်။
“ကလောချောင်းရေ တအားတိုးနေတယ်။ ရေစီးကလည်း အရမ်းကို သန်နေတာ။ အနိမ့်ပိုင်းတွေ တော်တော်များများတော့ ရေတွေဝင်ကုန်ပြီ။ ကလောမြို့က ချောင်းဘေးမှာဆိုတော့ စိုးရိမ်ရတယ်။ တောင်ကျချောင်းရေးတွေကြောင့် ရေတွေ တအားတိုးနေတာ” ဟု ကလောမြို့မှ မြို့ခံပြည်သူတစ်ဦးက ပြောဆိုသည်။
ဓာတ်ပုံ – ကလောနှင့်တာချီလိတ်တို့တွင် ရေကြီးမှုများဖြစ်ပွားနေစဉ်။
Photo- CJ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
