ပြည်တွင်း ပါဆယ်ပို့နှင့်အမြန်ချောလုပ်ငန်းများက တားမြစ်နှင့်ကန့်သတ်ကုန်များ ပို့ဆောင်လျှင် လုပ် ငန်းလိုင်စင်ပိတ်သိမ်းမည့်အပြင် ဥပဒေပုဒ်မများစွာဖြင့် အရေးယူမည်ဟု စစ်တပ်က ခြိမ်းခြောက်

ပဲခူး၊ မွန်၊ ကရင်၊ တနင်္သာရီ၊ ချင်း၊ စစ်ကိုင်းတိုင်း၊ ရှမ်းမြောက်၊ ကရင်နီပြည်များသို့ ဆိုလာ၊ ဆေးဝါး၊ လူသုံးကုန် ၊ စားနပ်ရိက္ခာ၊ စက်သုံးဆီ အပါအဝင် ကုန်အားလုံးနီးပါး ပို့ဆောင်ခွင့် စစ်တပ်က တားမြစ်

ရန်ကုန်၊ ဩဂုတ် ၂၉

ပြည်တွင်း ပါဆယ်ပို့နှင့်အမြန်ချောလုပ်ငန်းများအနေဖြင့် လက်နက်ခဲယမ်းများနှင့် တားမြစ်ကန့် သတ်ကုန်ပစ္စည်းများ သယ်ယူမှုများ လုပ်ဆောင်ပါက လုပ်ငန်းလိုင်စင်ပိတ်သိမ်းခံရမည့်အပြင် အကြမ်းဖက်မှုတိုက်ဖျက်ရေးဥပဒေ အပါအဝင် ဥပဒေပုဒ်မများစွာဖြင့် အရေးယူခံရမည်ဟု အကြမ်းဖက်စစ်တပ်က တရားဝင် ခြိမ်းခြောက် အကြောင်းကြားစာပေးပို့ထားကြောင်း သိရှိရသည်။

ပြည်တွင်း ပါဆယ်ပို့နှင့်အမြန်ချောလုပ်ငန်းများတွင် မြို့နယ်ခြား၍ ပို့ဆောင်လျှင် ပါဆယ် ၁ ခုအတွက် အလေးချိန် ၃ ကီလိုဂရမ်သာ ပို့ဆောင်ရမည်ဖြစ်ပြီး မြို့တွင်းဆိုလျှင် ပါဆယ် ၁ ခု ၁၀ ကီလိုကရမ်သာ ပို့ရမည်ဟု စစ်တပ်က ကန့်သတ်လိုက်ကြောင်း Royal Express မှ တာဝန်ကျ ဝန်ထမ်းတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

အကြမ်းဖက်စစ်တပ်က ပြည်တွင်း ပါဆယ်ပို့ လုပ်ငန်းများနှင့် အမြန်ချောပို့ လုပ်ငန်းများအားလုံး လိုက် နာရမည့် စည်းမျဉ်းစည်းကမ်းများနှင့် တားမြစ်ကန့်သတ်ကုန်ပစ္စည်းများ၊ မပို့ဆောင်ရမည့် နေရာများကို ထုတ်ပြန်ထားပြီး ယင်းထုတ်ပြန်ချက်ကို မလိုက်နာသော လုပ်ငန်းများအားလုံးကို လုပ်ငန်းလိုင်စင်ပိတ်သိမ်း ရပ်ဆိုင်းမည်ဟု တရားဝင် ခေါ်ယူပြောဆိုထားကြောင်း သိရှိရသည်။

“မြို့နယ်ခြားရင် ပါဆယ် ၁ ခု အလေးချိန် ၃ ကီလို ပဲ။ မြို့နယ် တစ်ခုအတွင်းဆိုရင်တော့ ပါဆယ် ၁ ခု အလေးချိန် ၁၀ ကီလိုပို့လို့ရတယ်။ တားမြစ်ကန့်သတ်ကုန်ပစ္စည်းကတော့ ဆိုလာ၊ဘက်ထရီ၊ အလှ ကုန်၊ ဆေးဝါး၊ စားသောက်ကုန်၊ လူသုံးကုန်တွေ လုံး၀ ပို့ခွင့်မရှိတော့ဘူး။ အဲဒါက အခု မငြိမ်းမချမ်းဖြစ်နေတဲ့ နေရာတွေအားလုံးပါတယ်။ ပဲခူး၊ မွန်၊ ကရင်၊ တနင်္သာရီ ၊ ရှမ်း/မြောက်၊ ကယား၊တနင်္သာရီ၊ ချင်း၊ မကွေး၊စစ်ကိုင်း တော်တော်များများပါတယ်။ ရန်ကုန်၊ မန္တလေး၊ နေပြည်တော်ပဲ အဓိက အလုပ်လုပ်လို့ရတော့တယ်။ ကျန်တာ တော်တော်များများက ပို့ခွင့်မရှိတော့ပါဘူး” ဟု Royal Express မှ တာဝန်ကျဝန်ထမ်းက ရန်ကုန်ခေတ်သစ်သတင်းဌာနထံသို့ ရှင်းပြသည်။

ထို့ပြင် ခရီးသည်တင် အဝေးပြေးကားဂိတ်များမှတစ်ဆင့် ကုန်စည်ပို့ဆောင်မှုများအားလုံးမှာလည်း လက်ရှိစစ်တပ်က ချမှတ်ထားသော စည်းမျဉ်းစည်းကမ်းများကြောင့် ကုန်ပစ္စည်းတန်ဆာ သယ်ယူမှုများ ယာယီရပ်ဆိုင်းထားရကြောင်း၊ အထူးသဖြင့် ဆေးဝါး၊ လူသုံးကုန်၊ ဆိုလာ၊ လျှပ်စစ်ပစ္စည်း၊ အမျိုးသမီးလစဉ်သုံးပစ္စည်းများကို သယ်ယူပို့ဆောင်ခွင့်မရှိသည့် တားမြစ်ကုန်များအဖြစ် အဝေးပြေးကား ဂိတ်များက လက်မခံတော့ကြောင်း သိရှိရသည်။

“လူမပါဘဲ ကုန်ပို့တာတွေ ခဏ နားထားတယ်။ စစ်ဆေးရေးဂိတ်တွေမှာ ရှင်းရလွန်းလို့။ လူကိုယ်တိုင်လိုက်ပြီး ကုန်သယ်တာတွေပဲ လက်ခံတော့တယ်” ဟု ရန်ကုန်မှ မကွေးတိုင်းသို့ ပြေးဆွဲနေသော ခရီး သည်တင်Express လိုင်းမှ ဂိတ်တာဝန်ခံတစ်ဦးက ရှင်းပြသည်။

ပြည်တွင်း ပါဆယ်ပို့နှင့်အမြန်ချောလုပ်ငန်းများ၊ ခရီးသည်တင်ယာဉ်လိုင်းများ၊ ကုန်ကားများအနေဖြင့် မည်သည့်အချိန်တွင်မဆို စစ်တပ်၊ရဲနှင့် အထွေထွေအုပ်ချုပ်ရေးဦးစီးဌာန အပါအဝင် ဌာနဆိုင်ရာများ၏ စစ်ဆေးမှုကို ခံယူရမည်ဖြစ်ပြီး ပူးပေါင်းဆောင်ရွက်မှု မဖြစ်မနေလုပ်ဆောင်ရန်ပါ စစ်တပ်က အသိပေး အကြောင်းကြားထားကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar