ရန်ကုန်၊ ဩဂုတ် ၂၉
ထိုင်းနိုင်ငံ၊ ဆာလာပူလီမြို့ရှိ ကြက်သားဆော့စက်အလုပ်ရုံတွင် မြန်မာအလုပ်သမား ကိုအောင်ဇော်လင်း လုပ်ငန်းခွင်မတော်တဆမှုဖြင့် သေဆုံးခဲ့ပြီး ကျန်ရစ်သူမိသားစုကို အသိမပေးဘဲ အလုပ်ရှင်က သဂြိုလ်ရန်ကြိုးစားနေသဖြင့် တားမြစ်ထားရကြောင်း WAG အလုပ်သမားမဟာမိတ်အဖွဲ့မှ ကိုမုန်တိုင်းက ရန်ကုန်ခေတ်သစ်သတင်းဌာနသို့ ပြောကြားသည်။
ဩဂုတ်လ ၂၅ ရက်နေ့ ကြက်သားဆော့စက်ရုံ၏ ကြက်သားအိုးကျိုသည့် ရေနွေးအိုး ပွင့်ပေါက်သွားခဲ့ရာမှ ကိုအောင်ဇော်လင်းကို ရေနွေးပူများ လောင်သွားခဲ့ကြောင်း၊ အခင်းဖြစ်သည့်နေရာတွင် မေ့လဲသွား၍ ဆာလာပူလီဆေးရုံကြီးသို့ ပို့ဆောင်ခဲ့ပြီး ထိုဆေးရုံတွင်ဆေးကုသမှုခံယူနေစဥ် ဩဂုတ်လ ၂၇ ရက်နေ့ ကိုအောင်ဇော်လင်း သေဆုံးခဲ့ကြောင်း သိရှိရသည်။
MOU မြန်မာ အလုပ်သမား ကိုအောင်ဇော်လင်း ကွယ်လွန်ခဲ့ရသည်ကို သူဌေးဖြစ်သူက မိသားစုဝင်ကို သေချာအကြာင်းမကြားဘဲ သင်္ဂြိုဟ်ရန် လုပ်ဆောင်နေ၍ တားမြစ်ကာ ပကန်စခွန်မှ နစ်နာကြေးရရှိရေး လုပ်ဆောင်နေကြောင်း၊ ကိုအောင်ဇော်လင်းသည် မြန်မာပြည်မှ GMKအေဂျင်စီနှင့် ထိုစက်ရုံတွင်စာချုပ်ချုပ်ဆိုပြီး အဆိုပါ အလုပ်တွင် လုပ်ကိုင်နေသည်မှာ ၂ နှစ်ကျော်ပြီဖြစ်ကြောင်း သိရှိရသည်။
“ဒီဖြစ်စဉ်က သူဌေးက လုံးဝ သူ့ရဲ့ ဆွေမျိုးသားချင်းကို အကြောင်းမကြားတာပေါ့။ ပြီးတော့ သေဆုံးသူက MoU ဖြစ်တယ် သံရုံးထောက်ခံစာ ပါရတယ်။ ဒါမှသာ ပကန်စခွန်ကို လိုက်လို့ရတဲ့အမှုဖြစ်တာပေါ့နော်။ ဒီထောက်ခံစာတွေ မရှိဘူးဆို အမှုလုပ်ရတာခက်တယ်။ သူ့ဆွေမျိုးသားချင်းမရောက်သေးဘူး သင်္ဂြိုဟ်ပစ်လိုက်ရင် ဒီအလောင်းက ပျောက်သွားနိုင်တယ်။ အဲဒီလိုမျိုးကြောင့် ကျွန်တော်တို့အဖွဲ့က အားချင်းပဲ သွားတယ်။ ညှိနှိုင်းနေတုန်း ထောက်ခံစာ ဗီဇာကိစ္စတွေကို မပြီးသေးဘူး။ အဖြေက စနေမှ ထွက်မှာ ။ စာရွက်စာတမ်းမပြည့်စုံရုံ ပေးမသင်္ဂြိုဟ်ဘူးလို့ ပိတ်ထားတာ။ မိသားစုဝင်က အကူအညီတောင်းလာတာ။ အခု မိသားစုဝင်နဲ့ အတူ လုပ်ထားပါတယ်”ဟု WAG အလုပ်သမားမဟာမိတ်အဖွဲ့မှ ကိုမုန်တိုင်းက ရန်ကုန် ခေတ်သစ်သတင်းဌာနသို့ ပြောကြားသည်။
မြန်မာနိုင်ငံသားများ လုပ်ငန်းခွင်အတွင်း သေဆုံးမှုတွင် ကာယကံရှင်၏ မိသားစုဆွေမျိုးတွေ မသိရဘဲ၊လက်မှတ်မပါဘဲ အလုပ်ရှင်က မိမိသဘောအရအလောင်းကို ထုတ်ယူပြီး သင်္ဂြိုလ်ခွင့်မရှိကြောင်း၊ ယခုအမှုတွင် အလုပ်ရှင်က ၎င်း၏သဘောအရ အလောင်းထုတ်ယူပြီးသင်္ဂြိုဟ်ရန် စီစဉ်နေသဖြင့်WAG အဖွဲ့သားများက တားမြစ်ခဲ့ရခြင်း ဖြစ်ကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
