ကြို့ပင်ကောက်၊ ကြည်စုရွာတွင် စစ်မှုထမ်းကြေး တစ်အိမ်လျှင် ငွေကျပ် ၆ သောင်း လစဉ် ကောက်ခံနေသော ပျူစောထီး ဘိုကြီး ပစ်ခတ်ခံရပြီး သေဆုံး၊ လက်ပစ်ဗုံး ၁ လုံး သိမ်းဆည်းရရှိ

ရန်ကုန်၊ ဩဂုတ် ၂၉

ပဲခူးတိုင်း၊ ကြို့ပင်ကောက်၊ ကြည်စုရွာတွင် စစ်မှုထမ်းကြေးအဖြစ် အိမ်ထောင်စုတစ်စုလျှင် ငွေကျပ် ၆ သောင်း လစဉ် ကောက်ခံနေသော ပျူစောထီး ဘိုကြီး ပစ်ခတ်ခံရပြီး သေဆုံးသွားကြောင်း သာယာဝတီ ခရိုင် အမှတ် ၁ တပ်ရင်း ၃၈၀၁ တပ်ခွဲ ၅ ကြို့ပင်ကောက် HERO ပြောက်ကျားတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဩဂုတ်လ ၂၈ ရက်နေ့ မွန်းလွဲ ၁၂ နာရီ ၃၀ မိနစ်ခန့်တွင် ကြို့ပင်ကောက်မြို့နယ်၊ အုတ်တွင်းကုန်းအုပ်စု ကြည်စုကျေးရွာတွင် စစ်မှုထမ်းကြေးဟုဆိုကာ တစ်အိမ်လျှင် ငွေကျပ် ၆ သောင်း လစဉ် ကောက်ခံနေသော ကြည်စုရွာ ပျူစောထီး ဘိုကြီးကို ၎င်းနေအိမ်အတွင်း သာယာဝတီခရိုင် အမှတ် ၁ တပ်ရင်း ၃၈၀၁ တပ်ခွဲ ၅ ကြို့ပင်ကောက် HERO ပြောက်ကျားတပ်ဖွဲ့မှ ရဲဘော်များက ဝင်ရောက် တိုက်ခိုက်ခဲ့ရာမှ ပျူစောထီး ဘိုကြီး ပွဲချင်းပြီး သေဆုံးခဲ့ကြောင်း သိရှိရသည်။

သေဆုံးသွားသော ပျူစောထီး ဘိုကြီးသည် ကျေးရွာနေ ပြည်သူများထံမှ လစဉ် စစ်မှုထမ်းကြေး ငွေ ၆ သောင်းကောက်ခံသည့် အပြင် PDF များနှင့် ထောက်ပို့ ပြည်သူများ၏ သတင်းနှင့် အချက်လက်များကိုလည်း လိုက်လံစုံစမ်းနေသူဖြစ်ကြောင်း၊ ထို့ပြင် ၎င်းထံမှ လက်ပစ်ဗုံး ၁ လုံးလည်း သိမ်းဆည်းရရှိခဲ့ကြောင်း သိရှိရသည်။

“ကြည်စုရွာ ပျူစောထီး ဘိုကြီးကို ကျနော်တို့ ရဲဘော်တွေက သူ့နေအိမ်မှာပဲ သွားရောက် ပစ်ခတ် တိုက်ခိုက်ခဲ့တာပါ။ ပွဲချင်းပြီးသေဆုံးတယ်။ လက်ပစ်ဗုံး ၁ လုံးလည်း သိမ်းဆည်းရရှိခဲ့ပါတယ်” ဟု သာယာဝတီခရိုင် အမှတ် ၁ တပ်ရင်း ၃၈၀၁ တပ်ခွဲ ၅ ကြို့ပင်ကောက် HERO ပြောက်ကျားတပ်ဖွဲ့မှ တာဝန်ရှိသူ တစ်ဦးက ပြောဆိုသည်။

ပြည်သူများကို အနိုင်ကျင့်ပြီး စစ်မှုမထမ်းမနေရ ထမ်းခိုင်းနေသော အုပ်ချုပ်ရေးမှူးများနှင့် ပျူစောထီးများကို ဆက်လက် တိုက်ခိုက်သွားမည်ဖြစ်၍ ပြည်သူများအနေဖြင့် အကြမ်းဖက် စစ်တပ်နှင့် ၎င်းတို့ လက်အောက်ခံများ အနီး သွားလာနေထိုင်ခြင်း မပြုလုပ်ရန် ကြို့ပင်ကောက် HERO ပြောက်ကျားတပ်ဖွဲ့က အသိပေးထားသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar