ပဲခူးတိုင်း၊ အုတ်ဖိုမြို့နယ် ဒေါင်းလေးရွာကို အကြမ်းဖက် စစ်တပ်က ဒရုန်းဖြင့် ဗုံးကျဲ တိုက်ခိုက်ခြင်းကြောင့် အသက် ၅ နှစ်အရွယ် ကလေးငယ်နှင့် မိခင်ဖြစ်သူတို့ သေဆုံးခဲ့ပြီး ဗုံးမှာ သားအမိ ၂ ဦးအပေါ်သို့ တည့်တည်ကျရောက်ပေါက်ကွဲခဲ့၍ ရုပ်အလောင်းပင် ရှာမရတော့ကြောင်း သာယာဝတီခရိုင် စစ်ရေးတာဝန်ခံ ရဲဘော် သစ္စာက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဩဂုတ်လ ၂၈ ရက်နေ့ ညနေ ၄ နာရီ ၄၄ မိနစ်ခန့်တွင် အုတ်ဖိုမြို့နယ်၊ တိမ်မြုပ်ကျေးရွာတွင် တပ်စွဲထားသော အကြမ်းဖက်စစ်တပ်က ဒေါင်လေးရွာသို့ တိုက်ပွဲဖြစ်ပွားခြင်းမရှိ ဒရုန်းဖြင့် ဗုံး ၂ လုံး ကျဲချခဲ့ကြောင်း၊ အကြမ်းဖက် စစ်တပ်၏ ဗုံးကျဲ တိုက်ခိုက်မှု အတွင်း အသက် ၅ နှစ်အရွယ် မယွန်းမီမီ နှင့် မိခင်ဖြစ်သူ အသက် ၃၂ နှစ်အရွယ် ဒေါ်ဇင်မာသင်းတို့ ပွဲချင်းပြီး သေဆုံးခဲ့ကြောင်း သိရှိရသည်။
စစ်တပ်၏ ဒရုန်း ဗုံး ၂ လုံးသည် မယွန်းမီမီ နှင့် ဒေါ်ဇင်မာသင်းတို့ အပေါ်သို့ တည့်တည့်ကျရောက် ပေါက်ကွဲခြင်းဖြစ်၍ အလောင်းကိုယ်ခန္ဓာရှာမရဘဲ အသားစများသာ ကောက်ယူရကြောင်း သိရှိရသည်။
“ကျနော်တို့ ရုပ်အလောင်းကိုတော့ ရှာဖွေမတွေ့ရှိခဲ့ဘူး။ သူတို့ သားအမိ စက်ဘီးစီးနေရင်း ဗုံးက လူပေါ် တည့်တည့်ကျတာဆိုတော့ အကုန်လုံး တစစီကို ဖြစ်သွားတာ မပေါက်ကွဲသေးတဲ့ ဗုံး ၁ လုံးကိုတော့ ရှင်းလင်း နိုင်ခဲ့တယ်” ဟု သာယာဝတီခရိုင် စစ်ရေးတာဝန်ခံ ရဲဘော် သစ္စာက ပြောဆိုသည်။
ထိုသို့ ဒရုန်းဖြင့် ဗုံးကျဲ တိုက်ခိုက်ပြီးနောက် အကြမ်းဖက် စစ်တပ်က လက်နက်ကြီးများဖြင့်ပါ ဆက်တိုက် ပစ်ခတ်ခဲ့သောကြောင့် ကျေးရွာနေ ပြည်သူများသည် ရွာလုံးကျွတ် ထွက်ပြေးတိမ်းရှောင်နေရကြောင်း သိရသည်။
အုတ်ဖိုမြို့နယ်တွင် စစ်တပ်က စစ်ကြောင်းထိုးခြင်းနှင့် လက်နက်ကြီးပစ်ခတ်မှုများ၊ ဒရုန်းဖြင့် ဗုံးကျဲမှုများကို ဆက်တိုက် လုပ်ဆောင်လျက်ရှိကြောင်း ဒေသပြည်သူများထံမှ သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
