ရန်ကုန်၊ ဩဂုတ် ၂၉
ဩဂုတ်လ ၂၇ ရက်နေ့ ထိုင်းနိုင်ငံအစိုးရ၏ ထိုင်း-မြန်မာနယ်စပ်ရှိ ယာယီခိုလှုံရေးစခန်းများတွင် နေထိုင်သောမြန်မာစစ်ဘေးရှောင်ပြည်သူများကို တရားဝင်အလုပ်လုပ်ကိုင်ခွင့်ပေးရန် ခွင့်ပြုခဲ့သည့်ကိစ္စနှင့်ပတ်သက်ပြီး အမျိုးသားညီညွတ်ရေးအစိုးရ၊ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဒေါ်ဇင်မာအောင်က အမျိုးသားညီညွတ်ရေးအစိုးရနှင့် မြန်မာပြည်သူများ ကိုယ်စား ထိုင်းဘုရင်မင်းမြတ်နှင့် ထိုင်းနိုင်ငံအစိုးရထံသို့ ကျေးဇူးတင်ကြောင်းသဝဏ်လွှာပေးပို့ခဲ့ကြောင်း သိရှိရသည်။
အမျိုးသားညီညွတ်ရေးအစိုးရအနေဖြင့်လည်း မြန်မာစစ်ဘေးရှောင်ပြည်သူများ၊ရွှေ့ပြောင်းအလုပ် သမားများနှင့်ပတ်သက်ပြီး လိုအပ်သည့်လူသားချင်းစာနာထောက်ထားမှုဆိုင်ရာ အကူအညီများအား ထိုင်းနိုင်ငံအစိုးရနှင့်အတူလက်တွဲဆောက်ရွက်ရန် အသင့်ရှိနေကြောင်း NUG က ထိုင်းအစိုးရထံသို့ အသိပေးထားကြောင်း သိရှိရသည်။
ဩဂုတ်လ ၂၆ ရက်နေ့တွင် ထိုင်းနိုင်ငံက နှစ်နိုင်ငံ နယ်စပ်တလျှောက်တွင် ၁၀ စုနှစ်များစွာကြာ ယာယီခိုလှုံနေထိုင်ခဲ့ကြသော မြန်မာဒုက္ခသည်များကို နိုင်ငံတွင်းတရားဝင်အလုပ်လုပ်ကိုင်ခွင့်ပြုရန် စီမံချက်အသစ်တစ်ရပ်ကို ထိုင်းအစိုးရက ခွင့်ပြုခဲ့သည်။
ထိုင်းအစိုးရက မြန်မာ ဒုက္ခသည်များကို သတ်မှတ်ထားသော ထိန်းချုပ်နယ်မြေများ၏ ပြင်ပတွင် နေထိုင်ခွင့်ပြုလိုက်သည့်အပြင် အလုပ်အကိုင်ရရှိရန် အလုပ်သမားဝန်ကြီးဌာနက ခွင့်ပြုချက်ပေးလိုက်ကြောင်း၊ အဆိုပါ အစီအစဉ်အရ အလုပ်လုပ်ကိုင်ခွင့် လက် မှတ် ၄၂,၀၀၀ ခန့် ထုတ်ပေးရန် ပြင်ဆင်ထားသည်။
ထိုင်းအလုပ်သမားဝန်ကြီးဌာန၏ အဆိုအရ လက်ရှိ မြန်မာနိုင်ငံမှ နေရပ်စွန့်ခွာသူ ၇၇,၇၁၈ ဦးကို ယာယီဒုက္ခသည် ခိုလှုံရေးစခန်း ၉ ခုတွင် လက်ခံထားရှိကြောင်း၊ အများစုသော ဒုက္ခသည်များမှာ ထိုနေရာတွင် ၁၀ စုနှစ်များစွာ နေထိုင်ခဲ့ကြပြီး ဒုက္ခသည်လူဦးရေ၏ ၄၇ ရာခိုင်နှုန်းခန့်မှာ စခန်းများတွင် မွေးဖွားခဲ့ကြကြောင်း သိရှိရသည်။
ကမ္ဘာလုံးဆိုင်ရာ ရန်ပုံငွေဖြတ်တောက်မှုများကြောင့် ဒုက္ခသည်များ အကူအညီပေးရေးနှင့် လူသားချင်းစာနာထောက်ထားမှုဆိုင်ရာ အကူအညီများကို လျော့နည်းကျဆင်းလာချိန်တွင် ထိုင်းအစိုးရက ယင်းကဲ့သို့ မူဝါဒ ပြုပြင်ပြောင်းလဲမှုများကို လုပ်ဆောင်လာခြင်းဖြစ်သည်။
ထိုင်းအစိုးရ၏ မူဝါဒအပြောင်းအလဲကြောင့် ဒုက္ခသည်များအတွက်သာမက ထိုင်းနိုင်ငံအတွက်ပါ အကျိုးရှိစေသော ခြေလှမ်းအဖြစ် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး-UNHCRက ကြိုဆိုခဲ့သည်။
ကာလရှည်ကြာနေထိုင်နေသော ဒုက္ခသည်များ၏ အလားအလာနှင့်အခြေအနေကို လက်ခံ၍ တံခါးဖွင့်ပေးမှုကြောင့် ထိုင်းနိုင်ငံသည် လူသားချင်းစာနာထောက်ထားမှုဆိုင်ရာ အခြေခံမူများကို လိုက်နာရုံသာမက ၎င်း၏အနာဂတ်တွင် မဟာဗျူဟာမြောက် ရင်းနှီးမြှုပ်နှံမှုကိုလည်း ပြုလုပ်နေကြောင်း UNHCR က ဆိုသည်။
မူဘောင်သစ်သည် ဒုက္ခသည်များသည် ၎င်းတို့၏စခန်းများမှ ထွက်ခွာရန် ခွင့်ပြုချက်လျှောက်ထားရန်၊ ကျန်းမာရေးစစ်ဆေးမှုခံယူရန်နှင့် လူမှုဖူလုံရေး သို့မဟုတ် ကျန်းမာရေးအာမခံအတွက် စာရင်းသွင်းရန် လိုအပ်ကြောင်း သိရှိရသည်။
မြန်မာဒုက္ခသည်များအတွက် အလုပ်လုပ်ခွင့်ပါမစ်ကို အခွန် ကင်းလွတ်ခွင့်ပြုလိုက်ပြီး အလုပ်လုပ်ခွင့်ပါမစ်သက်တမ်းမှာ ၁ နှစ်ဖြစ်ကြောင်း သိရှိရသည်။ု
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
