ရန်ကုန်၊ ဩဂုတ် ၂၉
တရားမဝင်အကြမ်းဖက်စစ်အုပ်စုအတွက် နိုင်ငံတကာအားပေးကူညီသူအဖြစ် ဆောင်ရွက်နေသည့် ဝါရှင်တန်ဒီစီအခြေစိုက် လော်ဘီများအား ရပ်တန့်နိုင်ရေး အစိုးရများအနေဖြင့် ဒဏ်ခတ်ပိတ်ဆို့မှု ကယ်ပေါက်များအား ပိတ်ပင်ရမည်ဖြစ်ကြောင်း၊ ဩဂုတ်လ ၁ ရက်နေ့တွင် ဝါရှင်တန်ဒီစီအခြေစိုက် ပြည်သူ့ဆက်ဆံရေးလုပ်ငန်း McKeon Group သည် အမေရိကန်ပြည်ထောင်စုအစိုးရနှင့် ဆက်ဆံရေးကောင်းမွန်တိုးတက်စေရေး ကြိုးပမ်းဆောင်ရွက်ပေးရန်အတွက် အမေရိကန်ဒေါ်လာ ၃၆၀,၀၀၀ တန်ဖိုးရှိ စာချုပ်တစ်ရပ်ကို တရားမဝင်စစ်အုပ်စုနှင့် ချုပ်ဆိုခဲ့ကြောင်း၊ ယင်းနေ့မတိုင်မီကလည်း ဒီစီအခြေစိုက် DCI Group သည် စစ်အုပ်စုနှင့် အမေရိကန်ဒေါ်လာ ၃ သန်းတန်ဖိုးရှိ စာချုပ်တစ်ရပ်ကို ချုပ်ဆိုခဲ့ပြီး၊ ယင်းစာချုပ်သည်လည်း ကုန်သွယ်ရေးနှင့် သဘာဝသယံဇာတဆိုင်ရာများ ပါဝင်ကြောင်း သိရှိရသည်။
Justice For Myanmar အနေဖြင့် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ် မှုများကို အလုံးစုံပြစ်ဒဏ်ကင်းလွတ်မှုဖြင့် ကျူးလွန်လျက်ရှိသည့် တရားမဝင်စစ်အုပ်စုကို ကိုယ်စားပြုဆောင်ရွက်ပေးနေသည့်အတွက် McKeon Group နှင့် DCI Group တို့ကို ကန့်ကွက်ရှုတ်ချကြောင်း၊ ဒီစီအခြေစိုက်လော်ဘီများအနေဖြင့် လက်ပန်းကျအောင် လျှော်ဖွတ်စေကာမူ မြန်မာစစ်တပ်လက်ဝယ် စွန်းထင်းနေသည့် သွေးများကား ပြောင်စင်နိုင်မည်မဟုတ်ကြောင်း ပြောဆိုသည်။
အဆိုပါကုမ္ပဏီများအနေဖြင့် ဝင်ငွေရင်းမြစ်များနှင့် လုပ်ဆောင်ထားသည့် တင်ကြိုစိစစ်မှုများကို ထုတ်ပြန်သင့်ကြောင်း၊ စစ်အုပ်စုက ပေးချေသည့် ငွေကြေးမှန်သမျှသည် ငွေကြေးခဝါချမှုဖြစ်နိုင်ပြီး၊ မြန်မာပြည်သူများထံမှ ခိုးရာပါပိုင်ဆိုင်မှုများ ဖြစ်နိုင်ကြောင်း JFM သတိပေးသည်။
အဆိုပါစာချုပ်များသည် စစ်အုပ်စုက ယင်း၏ အုပ်ချုပ်ရေး၊ ဥပဒေပြုရေးနှင့် တရားစီရင်ရေးအဖွဲ့ ဖြစ်သည့် “နိုင်ငံတော်စီမံအုပ်ချုပ်ရေးကောင်စီ (SAC)” အား “နိုင်ငံတော်လုံခြုံရေးနှင့် ငြိမ်းချမ်းရေးကော်မရှင် (SSPC)” အဖြစ် ခေါင်းစီးပြောင်းလိုက်ပြီးနောက် ချုပ်ဆိုခဲ့ခြင်း ဖြစ်ကြောင်း ယင်းသည် စစ်ကောင်စီအတွက် နိုင်ငံတကာဒဏ် ခတ်ပိတ်ဆို့မှုများအား ရှောင်ရှားနိုင်စေမည့် ကယ်ပေါက်တစ်ခုကို ဖန်တီးခဲ့ပြီး၊ ယင်းစိုးရိမ်ဖွယ်ကယ်ပေါက်ကို ပိတ်ပင်ရမည် ဖြစ်ကြောင်း JFM က ထောက်ပြသည်။
ကနေဒါ၊ အီးယူ၊ ယူကေနှင့် အမေရိကန်ပြည်ထောင်စုတို့အနေဖြင့် စစ်အုပ်စု၏ ဒဏ်ခတ်ပိတ်ဆို့မှုများ ရှောင်ရှားရန်၊ မှားယွင်းသောနိုင်ငံရေးတရားဝင်မှုရရှိရန်နှင့် ၎င်းတို့ကျူးလွန်လျက်ရှိသည့် နိုင်ငံတကာရာဇဝတ်မှုများအတွက် ငွေကြေးရှာဖွေရန်ကြိုးပမ်းမှုများအား ပိတ်ပင်နိုင်ရေးအတွက် SSPC ကို ဒဏ်ခတ်ပိတ်ဆို့မှုစာရင်းတွင် အမြန်ဆုံး ထည့်သွင်းရမည်ဟု JFM က တိုက်တွန်းနှိုးဆော်ထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
