ရန်ကုန်၊ စက်တင်ဘာ ၉
အကြမ်းဖက် စစ်တပ်က ထုတ်ပြန်လာသော ဖိတ်ခေါ်ချက် အမည်တပ်ထားသော ကြေညာချက်တွင် တိုင်း ရင်းသားလက်နက်ကိုင်-EAO များက နယ်မြေကျူးကျော် ချဲ့ထွင်ခြင်းများအတွက် PDF များကို လက်ကိုင်တုတ်အဖြစ်အသုံးပြုစေကာ PDF တို့၏ ဘဝ များကို စတေးခဲ့ကြောင်း၊ CRPH, NUG တို့က PDF အမည်ခံအဖွဲ့များကို ဖွဲ့စည်းကာ လက်နက်၊ ခဲယမ်းရရှိရေးအတွက် အချို့သော EAO များ လက်အောက်သို့ သွတ်သွင်းခဲ့ကြောင်း စစ်တပ်က ရည်ရွယ်ချက်ရှိရှိ သွေးခွဲထားသည်။
လက်ရှိနိုင်ငံတွင် ဖြစ်ပေါ်နေသော အခြေအနေများမှာ မဲစာရင်းမှားယွင်းမှုကြောင့်ဖြစ်ပြီး စစ်တပ်၏ တောင်း ဆိုချက်ကို ငြင်းပယ်ခဲ့ပြီး ရွေးကောက်ပွဲရလဒ်ဖြင့်ပင် လွှတ်တော်ခေါ်ယူရန် အတင်းအဓမ္မကြိုးပမ်းခဲ့မှုသည် ဖွဲ့စည်း ပုံအခြေခံဥပဒေပုဒ်မ ၄၁၇ အရ နိုင်ငံတော်အာဏာကို အဓမ္မနည်းဖြင့် ရယူရန်ကြိုးပမ်းမှုပင်ဖြစ်ကြောင်း၊နိုင်ငံ တော်အာဏာကို အဓမ္မနည်းဖြင့် ရယူရန်ကြိုးပမ်းမှုတွင် ထိုစဉ်က နိုင်ငံတော်သမ္မတကိုယ်တိုင် ဦးဆောင်ပါဝင်ပတ်သက်မှုရှိခဲ့ပြီး ဖွဲ့စည်းပုံအခြေခံဥပဒေက ပေးအပ်ထားသည့် တာဝန်အရမဟုတ်သည့် ပုဂ္ဂလိကပြစ်မှုကျူး လွန်မှုများရှိခဲ့၍ အရေးယူခံရသည့်အချိန်လည်းဖြစ်ကြောင်း၊ ထိုကြောင့် ဖွဲ့စည်းပုံအခြေခံဥပဒေအရ ယာယီသမ္မတက အရေးပေါ်အခြေအနေကြေညာပြီး စစ်တပ်ဦးစီးချုပ်ကို နိုင်ငံတော်အာဏာလွှဲအပ်ဆောင်ရွက်စေခဲ့ကြောင်း စစ်တပ်က ထုတ်ပြန်ထားသည်။
ယခုအခါ အိမ်နီးချင်းနိုင်ငံများ၏ ပူးပေါင်းဆောင်ရွက်မှုကြောင့် တိုင်းရင်းသားလက်နက်ကိုင်များ ရပ်တန်ရန် ခက်ခဲလာပြီး PDF များ ပိုမို အတိဒုက္ခရောက်လာကြောင်း၊ လက်နက်ကိုင်လမ်းစဉ်ကြောင့် ဒီမိုကရေစီ နောက်ပြန်ဆွဲခြင်းဖြစ်ပြီး ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုကြီးကို စစ်တပ်၊ ပြည်သူ၊ နိုင်ငံရေးပါတီများအပြင် PDF များကလည်း လိုလားကြပြီး ရည်မှန်းချက်ချင်း တူညီကြကြောင်း၊ ဒီမိုကရေစီမျက်နှာဖုံးတပ်ပြီး အာဏာကို မက်မောကြသည့် CRPH၊ NUG တို့၏ လိုလားချက်မှာ ရွေးကောက်ခံအစိုးရဆိုသည့် ရပ်တည်မှုမပျောက်ဆုံးရေးအတွက် လက်နက်ကိုင်လမ်းစဉ်ကို ရွေးချယ်နေခြင်းဖြစ်ကြောင်း၊ ၎င်းတို့၏ နှောင့်ယှက်မှုများကြောင့်သာ ဒီမိုကရေစီခရီးလမ်းနှောင့်နှေးကြန့်ကြာ နေရခြင်းဖြစ်ကြောင်း စစ်တပ်က ဆိုသည်။
ထို့ကြောင့် PDF အပါအဝင် လက်နက်ကိုင်အုပ်စုများအနေဖြင့် မကြာမီတွင် ကျင်းပတော့မည့် ရွေးကောက်ပွဲကြီးအလွန် စစ်မှန်စည်းကမ်းပြည့်ဝသော ဒီမိုကရေစီနှင့်ဖက်ဒရယ်စနစ်ကိုအခြေခံသည့် ပြည်ထောင်စုကြီးကို တည်ဆောက်နိုင်ရေး ဆန္ဒရှိပါက ကြိုဆိုလက်ခံမည်ဖြစ်ကြောင်း ၊ PDF များ ဆက်သွယ်ညှိနှိုင်းဆောင်ရွက်နိုင်ကြောင်း စစ်တပ်က ကြေညာထားသည်။
“ကြေညာချက်ကို ကြည့်ရတာ ခဲတစ်လုံးတည်းနဲ့ ငှက် ၃ ကောင်လောက်ကို တစ်ခါတည်း ပစ်တယ်လို့ မြင်ပါတယ်။ PDF နဲ့ EAO တွေကို သွေးခွဲတယ်။ PDF နဲ့ NUG ကို သွေးခွဲတယ်။ PDF နဲ့ CRPH ကို သွေးခွဲတယ်။ PDF နဲ့ စစ်တပ်က ရည်မှန်းချက်ချင်းတူတယ်ပြောတယ်။ ဗမာ PDF လူငယ်တွေ စစ်တပ်ကို လက်နက်ကိုင် တိုက်နေသမျှကာလပတ်လုံး စစ်တပ်က သူတို့မှာ ဘယ် လောက် အထိနာတယ်ဆိုတာ သွယ်၀ိုက်ပြီး ဝန်ခံထားတာပဲ။ ဒါကြောင့် PDF ကိုဦးတည်ပြီးတော့ ဒီလို ကြေညာချက် ထုတ်တတာ။ ပထမအကြိမ်က တစ်ခါ ထုတ်ခဲ့ပြီးပြီ။ အခုက ဒုတိယအကြိမ် ထုတ်တယ်ဆိုတော့ သူတို့ ဖိတ်ခေါ်ချက် မအောင်မြင်ဘူးဆိုတာလည်း သက်သေပြတယ်။ ပြည်တွင်းမှာလည်း လူငယ်တွေမှာ ကျပ်တည်းလာတယ်။ အခွင့်အလမ်းတွေ ပျောက်လာတယ်။ ပေါ်တာဆွဲ အဖမ်းခံနေရတယ်။ အဲဒီအတွက် ရွေးချယ်စရာက သိပ်များများစားစားမရှိတော့ဘူး။ ပြည်ပကို ထွက်ပြေးမလား၊ လက်နက်ကိုင်ပြီး ပြန်ချမလား။ အဲဒီ ၂ လမ်းပဲရှိတော့တယ်” ဟု ရန်ကုန်မြို့တွင် နေထိုင်နေဆဲ သတင်း စာဆရာလည်းဖြစ်၊ နိုင်ငံရေးလေ့လာသုံးသပ်သူလည်းဖြစ်သူ ဝါရင့် အယ်ဒီတာတစ်ဦးက သုံးသပ်ပြောဆိုသည်။
စစ်တပ်က ယခုနှစ်ဇူလိုင်လ ၅ ရက်နေ့တွင်လည်း PDF များကို ဖိတ်ခေါ်သော ကြေညာချက် ထုတ်ပြန်ခဲ့ပြီး ယုံကြည်ချက်နှင့် ခံယူချက်များအတွက် လက်နက်ကိုင်လမ်းစဉ်ကို ရွေးချယ်ခဲ့ကြသည့် PDF အမည်ခံများအပါအဝင် လက်နက်ကိုင်အုပ်စုများ၏ မျှော်မှန်းချက်မှာလည်း ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည် ထောင်စုတည်ဆောက်ရေးပင်ဖြစ်ကြောင်း၊ စစ်ကောင်စီအနေဖြင့်လည်း ရွေးကောက်ပွဲပြန်လည်ကျင်းပပေးနိုင်ရေး ကြိုးပမ်းဆောင်ရွက်ခဲ့ရာ အတော်ပင်ခရီးရောက်နေပြီဖြစ်ကြောင်း၊ ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည်ထောင်စုကြီးဆီသို့လျှောက်လှမ်းရန် တံခါးဝကြီးမှာ လွတ်လပ်ပြီးတရားမျှတသော ပါတီစုံဒီမိုကရေစီအထွေထွေ ရွေးကောက်ပွဲကြီးပင်ဖြစ် ကြောင်း၊ လက်နက်ကိုင်လမ်းစဉ်ကို ဆက်လက်လျှောက်လှမ်းနေမည်ဆိုပါက နိုင်ငံတော်အတွက်အကျိုးရှိမည်မဟုတ်ဘဲ ဒီမိုကရေစီနောက်ပြန်သွားနေသကဲ့သို့သာ ဖြစ်နေမည်ဖြစ်ကြောင်း ဖိတ်ခေါ်ခဲ့ဖူးသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
