ကရင်အမျိုးသားအစည်းအရုံး-KNU တပ်မဟာ ၁ နယ်မြေ၊ မွန်ပြည်နယ်၊ ဘီးလင်းမြို့နယ် ၊ ပျဉ်းမပင်ဆိပ်အနောက်ကျေးရွာသို့ စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲချခဲ့ရာ ပြည်သူ ၄ ဦး ပွဲချင်းပြီး သေဆုံးသွားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ အောက်တိုဘာလ ၉ ရက်နေ့ ည ၈ နာရီ ၂၀ မိနစ်အချိန် အကြမ်းဖက်စစ်တပ်က ဘီးလင်းမြို့နယ်၊ ပျဉ်းမပင်ဆိပ်အနောက်ကျေးရွာသို့ လေကြောင်းဖြင့် ဗုံးကျဲချခြင်ဖြစ်ကြောင်း ၊ယင်းသို့ လေကြောင်းတိုက်ခိုက်မှုကြောင့် ပျဉ်းမပင်ဆိပ်အနောက်ကျေးရွာမှ ပြည်သူ ၄ ဦးမှာ ပွဲချင်းပြီး သေဆုံးသွားခဲ့ကြောင်း၊ ပြည်သူ ၃ ဦးမှာ အရေးပေါ် အခြေအနေဖြင့် ဒဏ်ရာရရှိထားပြီး အခြားသော ဒဏ်ရာရရှိသောသူများလည်းရှိကြောင်း သိရှိရသည်။
“မနေ့ည ၈ နာရီ ၂၀ မိနစ်မှာ လေယာဉ်နဲ့ ဗုံးလာကျဲတာပါ။ ဒဏ်ရာရတာက ၇ ဦးမှာ ၃ ဦးက အရေးပေါ် အသက်အန္တရာယ်စိုးရိမ်နေရတယ်” ဟု ဒေသပြည်သူတစ်ဦးက ပြောဆိုသည်။
အလားတူ ယမန်နေ့ည ၇ နာရီဝန်းကျင်အချိန် ရှမ်းပြည်နယ်မြောက်ပိုင်း၊ TNLA က သိမ်းပိုက်ထားသော မိုးမိတ်မြို့နယ်၊ ဝဲဘောင်းကျေးရွာကို စစ်တပ်က တိုက်ပွဲဖြစ်ပွားမရှိဘဲ လေယာဉ်ဖြင့် ပေါင် ၂၅၀ ဗုံး ၃ လုံး လာရောက်ကျဲချခဲ့ကြောင်း၊ ထိုသို့ ကျဲချမှုကြောင့် ကလေးငယ် ၂ ဦး အပါအဝင် ပြည်သူ ၇ ဦးသေဆုံးခဲ့ကြောင်း TNLA က သတင်းထုတ်ပြန်သည်။
စစ်တပ်၏ လေကြောင်းတိုက်ခိုက်မှုကြောင့် ပြည်သူ ၈ ဦး ထိမှန်ဒဏ်ရာရရှိသည့်အပြင် နေအိမ် ၁၀ လုံးလည်း ပျက်စီးသွားခဲ့ကြောင်း သိရှိရသည်။
အလားတူ အောက်တိုဘာ ၇ ရက်နေ့တွင်လည်း ကျောက်မဲမြို့နယ်၊ မိုင်းလုံမြို့ ၊ မန်ဟုန်းကျေးရွာသို့ စစ်တပ်က လေကြောင်းဖြင့် ပေါင် ၂၅၀ ဗုံး ၂ လုံး ကျဲချတိုက်ခိုက်မှုကြောင့် ကလေးငယ် ၁ ဦးအပါအ၀င် ပြည်သူလူထု ၁၀ ဦးသေဆုံးခဲ့ပြီး ၃ ဦး ထိမှန်ဒဏ်ရာရရှိခဲ့ကြောင်း သိရှိရသည်။
အကြမ်းဖက်စစ်တပ်က ၎င်းတို့ လက်လွှတ်ဆုံးရှုံးထားသော နယ်မြေများ ပြန်လည်ရရှိရေးအတွက် လေကြောင်းတိုက်ခိုက်မှုနှင့် မြေပြင်ထိုးစစ်ဆင်မှုများကို ၂ ဆ မြှင့်တင်ရန် စစ်ဘက်ဆိုင်ရာအစည်းအဝေးက ဆုံးဖြတ်ချက်ချမှတ်ထားကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
