ရန်ကုန်၊ အောက်တိုဘာ ၁၁
အကြမ်းဖက် စစ်တပ်က ပြုလုပ်မည့် မည်သည့် ရွေးကောက်ပွဲမဆို ငြင်းပယ်ရန်နှင့် အသိအမှတ်မပြုရန် ၊ နိုင်ငံရေးအကျဉ်း သားအားလုံး လွတ်မြောက်ရေး အပါအဝင် အချက် ၅ ချက် ဆေင်ရွက်ပေးရန် အာဆီယံသို့ အမျိုးသားညီညွတ်ရေးအစိုးရ-NUG ၊ ပြည်ထောင်စုလွှတ်တော်ကိုယ်စားပြု ကော်မတီ-CRPH ၊ NUCC နှင့် ကရင်-KNU ၊ ချင်း-CNF ၊ ကချင်-KPICT ၊ ကရင်နီ- KNPP/IEC အပါအဝင် တော်လှန်ရေးတပ်များနှင့် အဖွဲ့အစည်းပေါင်း ၂၀ က ယနေ့ ကြေညာချက် ထုတ်ပြန် တောင်းဆိုသည်။
မလေးရှားနိုင်ငံ က အာဆီယံဥက္ကဋ္ဌ ဖြစ်လာသည့်အချိန်မှစတင်၍ မြန်မာ့အရေးအတွက် ဖြေရှင်းရေး အတွက် NUG အမျိုး သား ညီညွတ်ရေးအစိုးရ၊ NUCC အမျိုးသားညီညွတ်ရေးအတိုင်ပင်ခံကောင်စီ၊ CRPH-ပြည်ထောင်စုလွှတ်တော်ကိုယ်စားပြုကော်မတီ၊ တိုင်းရင်းသားတော်လှန်ရေးအဖွဲ့အစည်းများ၊ တိုင်းရင်းသားရေးရာ အတိုင်ပင်ခံကောင်စီများ၊ ဖက်ဒရယ်ယူနစ်များနှင့် အခြားသော ကိုယ်စားပြု အဖွဲ့အစည်းများ အပါအဝင် အဓိက သက်ဆိုင်သူအဖွဲ့အစည်းများအားလုံးပါဝင်သော ဆွေးနွေးပွဲများ ဆက်တိုက် လုပ်ဆောင်ခဲ့ကြောင်း ယနေ့ ထုတ်ပြန်သော ကြေညာချက်ကို အစပျိုးထားသည်။
အဆိုပါ ဆွေးနွေးပွဲများနှင့် ထိတွေ့ဆက်ဆံမှုများသည် မြန်မာနိုင်ငံတွင် လက်ရှိဖြစ်ပေါ်နေသော အကျပ်အတည်းကိုဖြေရှင်းရေး ၊ အကြမ်းဖက်မှုများ ရပ်စဲရေး၊ လူသားချင်းစာနာထောက်ထားမှုဆိုင်ရာ အကူအညီများ ပေးနိုင်ရေး၊ အားလုံးပါဝင်သော နိုင်ငံရေးဆွေးနွေးပွဲများ ဖြစ်မြောက်ရေးနှင့် စစ်တပ်က စီစဉ်ထားသော အတုအယောင် ရွေးကောက်ပွဲကိစ္စကို ဖြေရှင်းရေး မဟာဗျူဟာနှင့် အကြံပြုချက်များကို အကောင်အထည်ဖော်ရေး အားလုံးပါဝင်သော ပလက်ဖောင်းတစ်ခု ဖြစ်ကြောင်း သိရှိရသည်။
မြန်မာ့အရေးဆွေးနွေးပွဲတွင် အဓိကသက်ဆိုင်သူများအားလုံးက စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် ဆိုးရွားလာနေသည့် အခြေအနေအပေါ် စိုးရိမ်ကြောင်း ထုတ်ဖော်ပြောဆိုပြီး ဒီမိုကရေစီ ပြန်လည်ထူထောင်ရေးနှင့် လူ့အခွင့်အရေးကို မြှင့်တင်ရန် ဆောင်ရွက်ရန် အတည်ပြုခဲ့ကြကြောင်း သိရှိရသည်။
အာဆီယံဘုံသဘောတူညီချက် ၅ ရပ်ကို အကောင်အထည်ဖော်ရေး လက်ခံ အတည်ပြုထားသော်လည်း ဘုံသဘောတူညီချက် ၅ ရပ်ကို အကောင်အထည်ဖော်ရေး အကန့်အသတ်များရှိနေမှုအပေါ် စိုးရိမ်ကြကြောင်း ၊ စစ်တပ်က အရပ်သားများအပေါ် အကြမ်းဖက်မှုများ ဆက်လက်ကျူးလွန်နေပြီး အာဆီယံပဋိညာဉ် အပါအဝင် ဒီမိုကရေစီစံနှုန်းများကို ပြောင်ပြောင်တင်းတင်းလျစ်လျူရှုလျက်ရှိကြောင်း သိရှိရသည်။
မလေးရှားနိုင်ငံက ကမကထ ပြုလုပ်ခဲ့သော မြန်မာ့အရေး ဆွေးနွေးပွဲများတွင် စစ်တပ်၏ ရွေးကောက်ပွဲ ငြင်းပယ်ရန်၊ တော်လှန် ရေးတပ်များအကြား စုစည်းညီညွတ်မှု တည်ဆောက်ရန်၊ အာဆီယံက ပြတ်ပြတ်သားသား အရေးယူဆောင်ရွက်ရန်၊ အားလုံးပါဝင်သော နိုင်ငံရေးတွေ့ ဆုံဆွေးနွေးမှု အကောင်အထည်ဖော်ရန်၊ ဒေသတွင်းတည်ငြိမ်အေးချမ်းရေးဟူသော ရည်ရွယ်ချက် ၆ ခုကို ရလဒ်များအဖြစ် ရရှိခဲ့ကြောင်း သိရှိရသည်။
ထို့ပြင် တွေ့ဆုံဆွေးနွေးပွဲများတွင် စစ်တပ်ကို တရားဝင်မှု လုံး၀ မပေးရန်လည်း သဘောတူညီထားကြောင်း သိရှိရသည်။
ထို့ကြောင့် အာဆီယံအနေဖြင့် အကြမ်းဖက် စစ်တပ်က ပြုလုပ်မည့် မည်သည့် ရွေးကောက်ပွဲမဆို ငြင်းပယ်ရန်နှင့် အသိအမှတ်မပြုရန်၊ အရပ်သားများ အကြမ်းဖက်မှုမှ ကာကွယ်နိုင်ရေး အရေးယူဆောင်ရွက်မှုများ ချက်ချင်း လုပ်ဆောင်ရန်၊ စစ်တပ်၏ အကြမ်းဖက် ရက်စက်မှုများအပေါ် နှုတ်ဆိတ်နေမှုကို အဆုံးသတ်ရန်၊ ဒေါ်အောင်ဆန်းစုကြည်၊ သမ္မတ ဦးဝင်းမြင့် အပါအဝင် နိုင်ငံရေးအကျဉ်းသားများအားလုံး ခြွင်းချက်မရှိ ချက်ချင်းလွှတ်ပေးရေး တောင်းဆိုပေးရန် တော်လှန်ရေးအဖွဲ့များက စုပေါင်း တောင်းဆိုသည်။
ယင်းအပြင် အာဆီယံ ဘုံသဘောတူညီချက် ၅ ချက်ကို အကောင်အထည်ဖော်ရန် ပျက်ကွက်နေသော စစ်တပ်ကို တာဝန်ခံစေရန် သံတမန်ရေး အရေးယူမှု၊ အာဆီယံအစည်းအဝေးများမှ ဖယ်ရှားအရေးယူရန်၊ စစ်တပ်က အာဆီယံဘုံသဘောတူညီချက်ကို အကောင်အထည်ဖော်ရေး နိုင်ငံတကာနှင့်အတူ ဖိအားပေးအရေးယူရန် တောင်းဆိုထားသည်။
အဆိုပါ ကြေညာချက်တွင် NUG ၊ CRPH ၊ NUCC တို့နှင့်အတူ ABSDF ၊ CNF ၊ KPICT ၊ KNPP/IEC ၊ မွန်တိုင်းရင်းသား MSFC ၊ NMSP (AD)၊ PNFC ၊ PNLO၊ ရန်ကုန်လွှတ်တော်ကဲ့သို့သော ဖယ်ဒရယ်ယူနစ်များ စုစုပေါင်း အဖွဲ့အစည်းနှင့်တပ်စုစုပေါင်း ၂၀ ခု ပါဝင်ကြောင်း သိရှိရသည်။
ဓာတ်ပုံ- NUG ယာယီသမ္မတ ဒူဝါလရှီးလနှင့်အစိုးရဝန်ကြီးများ။
