ဖိလစ်ပိုင်တရားရေးဝန်ကြီးဟောင်းက မလေးရှားနိုင်ငံ နိုင်ငံခြားရေးဝန်ကြီးဟောင်းနှင့် လက်ရှိ မလေးရှား အောက်လွှတ်တော်အမတ် Dato’ Sri Saifuddin Abdullah နှင့် ထိုင်းနိုင်ငံ နိုင်ငံခြားရေးဝန်ကြီးဟောင်း Khun Kasit Piromya ၊ မြန်မာနိုင်ငံဆိုင်ရာ အထူးအကြံပေးကောင်စီမှ ကုလသမဂ္ဂကိုယ်စားလှယ်ဟောင်း ၃ ဦးတို့နှင့်အတူ အာဆီယံသို့ မြန်မာ့အရေးအတွက် အရေးယူဆောင်ရွက်ရန် တောင်းဆိုသည့် ပူးတွဲကြေညာချက်တွင် လက်မှတ်ရေးထိုးပါဝင်လာကြောင်း၊ အာဆီယံက မြန်မာနိုင်ငံ ၏ အကျပ်အတည်းကို ဖြေရှင်းရန် ၄ နှစ်ကျော်ကြာပျက်ကွက်ခဲ့ပြီးနောက် မြန်မာ့အရေး အရေးယူဆောင်ရွက်ရန် စုပေါင်းတောင်းဆိုကြခြင်းဖြစ်ကြောင်း သိရှိရသည်။
ဖိလစ်ပိုင်နိုင်ငံ၏ အထက်လွှတ်တော်အမတ်ဟောင်းနှင့် လက်ရှိ အောက်လွှတ်တော်အမတ်တစ်ဦးလည်းဖြစ်သူ De Lima သည် ဖိလစ်ပိုင်နိုင်ငံ၏အလေးစားရဆုံးသော လူ့အခွင့်အရေးလှုပ်ရှားသူတစ်ဦးဖြစ်ပြီး မြန်မာပြည်သူများကို ထောက်ခံသည့် ထင်ရှားသော ဒေသတွင်းထုတ်ဖော်မှုပြုသူလည်းဖြစ်သည်။
ဖိလစ်ပိုင်နိုင်ငံက မလေးရှားနိုင်ငံထံမှ အာဆီယံဥက္ကဋ္ဌတာဝန်ကို ယခုနှစ်ကုန်တွင် လွှဲပြောင်းယူရန် ပြင်ဆင်နေချိန်တွင် သူမက ပူးတွဲကြေညာချက်တွင် ပါဝင်လာခြင်းမှာ အလွန်အရေးကြီးသောအချိန်အခါတွင် ထွက်ပေါ်လာခြင်းဖြစ်သည်။
မလေးရှားနိုင်ငံခြားရေးဝန်ကြီးဟောင်း Dato’ Sri Saifuddin Abdullah ကလည်း အာဆီယံအနေဖြင့် မြန်မာပြည်သူများနှင့်အတူ ရပ်တည်ရန် ပြင်းပြင်းထန်ထန်တိုက်တွန်းလျက်ရှိသည်။
“အာဆီယံအနေနဲ့ စစ်အုပ်စုရဲ့အတုအယောင်ရွေးကောက်ပွဲကို ဆန့်ကျင်ကြောင်း၊ အဲဒီရွေးကောက်ပွဲမှာ ဘယ်လိုမှ ပါဝင်ပတ်သက်မှာမဟုတ်ကြောင်းနဲ့ ရလဒ်ကိုလည်း ပယ်ချမှာဖြစ်ကြောင်း လုံးဝ ရှင်းလင်းပြတ်သားစွာ ပြောကြားသင့်တယ်။ အာဆီယံဟာ ဒီလမှာကျင်းပမယ့် ၄၇ ကြိမ်မြောက် ထိပ်သီးအစည်းအဝေးကို အခွင့်ကောင်းယူပြီး မြန်မာနိုင်ငံအတွက် မဟာဗျူဟာသစ်တစ်ခုကို ချမှတ်ရမယ်။ အဲဒီမဟာဗျူဟာမှာ ရှင်းလင်းတဲ့ နောက်ဆုံးပန်းတိုင်တစ်ခုရှိရမယ်၊ အဲဒါဟာ ပြည်သူတွေမျှော်မှန်းထားသလို ဒီမိုကရေစီနည်းကျပြီး၊ ရေရှည်တည်တံ့ကာ အားလုံးအကျုံး၀င်ပါဝင်နိုင်တဲ့ ချဉ်းကပ်မှုဖြစ်တယ်။“ပြည်သူတွေက နိုင်နေပြီး စစ်အုပ်စုက ရှုံးနေပါတယ် ” ဟု မလေးရှားနိုင်ငံခြားရေးဝန်ကြီးဟောင်း က ပြောကြားသည်။
စစ်အုပ်စုသည် ရွေးကောက်ပွဲမတိုင်မီ ခုခံတော်လှန်ရေးတပ်ဖွဲ့များထံ ဆုံးရှုံးခဲ့ရသောနယ်မြေများကို ပြန်လည်သိမ်းပိုက်ရန်ကြိုးပမ်းနေစဉ် ကလေးသူငယ်များအပါအဝင် အရပ်သားများကို ပစ်မှတ်ထားသတ်ဖြတ်မှုများ ပိုမိုလုပ်ဆောင်လာနေကြောင်း အဆိုပါ ကြေညာချက်တွင် ထောက်ပြထားသည်။
မလေးရှား နိုင်ငံခြားရေးဝန်ကြီး Dato’ Seri Utama Haji Mohamad bin Haji Hasan က ပြီးခဲ့သည့်အပတ်တွင် မြန်မာနိုင်ငံ၌ ရွေးကောက်ပွဲများ ယုံကြည်လက်ခံနိုင်ဖွယ်ရှိစေရန် “လွတ်လပ်၊ မျှတ၊ ပွင့်လင်းမြင်သာပြီး ယုံကြည်စိတ်ချရသော လုပ်ငန်းစဉ်များ၏ အခြေခံမူများနှင့်အညီ” ကျင်းပရမည်ဖြစ်ပြီး “နိုင်ငံတစ်ဝှမ်းလုံးတွင် နိုင်ငံရေးပါတီများနှင့် သက်ဆိုင်သူအားလုံး ပါဝင်”ရမည်ဖြစ်ကြောင်း ရှင်းလင်းပြောကြားခဲ့သည်။ စစ်အုပ်စု၏ အတုအယောင်ရွေးကောက်ပွဲ အစီအစဉ်သည် ဤအနိမ့်ဆုံး စံနှုန်းများအနက် တစ်ခုမျှ မပြည့်မီဟု ထောက်ပြထားသည်။
အကြမ်းဖက် မြန်မာစစ်အုပ်စု၏ ရွေးကောက်ပွဲကို ဒီဇင်ဘာလ ၂၈ ရက်တွင် စတင်ရန် စီစဉ်ထားရာ အာဆီယံ၏ ၄၇ ကြိမ်မြောက် ထိပ်သီးအစည်းအဝေးက မြန်မာ့အရေးအတွက် အာဆီယံအတွက် အရေးယူဆောင်ရွက်ရန် နောက်ဆုံးအခွင့်အရေး ဖြစ်သည်။
လက်ရှိ အာဆီယံဥက္ကဋ္ဌ မလေးရှားနှင့် ဥက္ကဋ္ဌသစ် ဖိလစ်ပိုင်တို့သည် အာဆီယံ အထူးကိုယ်စားလှယ် Tan Sri Othman Hashim ၏ ပံ့ပိုးမှုဖြင့် အဆိုပါ အခွင့်အရေးကိုအရယူကာ မြန်မာနိုင်ငံဆိုင်ရာ မူဝါဒသစ်တစ်ရပ်ကို ဦးဆောင်ချမှတ်ရမည်ဖြစ်ပြီး အဆိုပါ မူဝါဒသစ်တွင် အာဆီယံ၏ ဆောင်ရွက်ချက်များ ပါဝင်ရမည်ဖြစ်ကြောင်း ပူးတွဲကြေညာချက်က ထောက်ပြထားသည်။
အာဆီယံအနေဖြင့် မြန်မာ့အရေးအတွက် သံတမန်ရေးရာ ကြိုးပမ်းမှုများကို အရှိန်အဟုန်မြှင့်တင်ရန် လိုအပ်ကြောင်း၊ ပထမဦးစွာ၊ အထူးသဖြင့် လေကြောင်းတိုက်ခိုက်မှုများအပါအဝင် တိုက်ခိုက်မှုအားလုံးကို ချက်ချင်းရပ်စဲရမည်ဖြစ်ပြီး ဒုတိယအနေဖြင့်၊ နိုင်ငံရေးအကျဉ်းသားအားလုံးကို ချက်ချင်းလွှတ်ပေးရမည်ဖြစ်ကြောင်း၊ ထို့အပြင်၊ တစ်နိုင်ငံလုံး အပစ်အခတ်ရပ်စဲရေးရန် ၊အပစ်အခတ်ရပ်စဲရေးကို အာဆီယံနှင့် ကုလသမဂ္ဂလုံခြုံရေးကောင်စီက ထောက်ခံရမည်ဖြစ်ပြီး နိုင်ငံတကာ လေ့လာသူများက စောင့်ကြည့်ရမည်ဖြစ်ကြောင်း ပူးတွဲကြေညာချက်က အကြံပြုထားသည်။
ထို့ပြင် မြန်မာ့အရေးအတွက် အဓိကသက်ဆိုင်သူအားလုံးနှင့် ပူးပေါင်းဆောင်ရွက်မှုကို တိုးချဲ့ရမည်ဖြစ်ကြောင်း၊ ထို အဓိကသက်ဆိုင်သူများတွင် အမျိုးသားညီညွတ်ရေးအစိုးရ (NUG)၊ အမျိုးသားညီညွတ်ရေးအတိုင်ပင်ခံကောင်စီ (NUCC)၊ ပြည်ထောင်စုလွှတ်တော် ကိုယ်စားပြုကော်မတီ (CRPH)၊ တိုင်းရင်းသား လက်နက်ကိုင်တော်လှန်ရေး အဖွဲ့အစည်းများ (EROs)၊ အတိုင်ပင်ခံကောင်စီများ၊ ဖက်ဒရယ်ယူနစ်များ၊ မြန်မာနိုင်ငံမှ ထွက်ခွာသွားရန် ဖိအားပေးခံခဲ့ရသူများ အပါအဝင် လူနည်းစုအသိုင်းအဝိုင်းများ၊ အရပ်ဘက်လူ့အဖွဲ့အစည်းများအပြင် အိမ်နီးချင်းနိုင်ငံများ၊ ကုလသမဂ္ဂအေဂျင်စီများ အစရှိသည်တို့ပါ၀င်ရန် အကြံပြုထားသည်။
မြန်မာနိုင်ငံတွင် ကျူးလွန်ခဲ့သော နိုင်ငံတကာရာဇဝတ်မှုများအတွက် တာဝန်ယူ/ခံမှုရှိစေရန် ပံ့ပိုးရမည်ဖြစ်ပြီး၊ တရားမျှတမှုရရှိရေးအတွက် နိုင်ငံ တကာနှင့် ပြည်တွင်းတရားရုံးများ၊ အထူးခုံရုံးများ၊ နှင့် ကမ္ဘာ့နေရာတိုင်းတွင်တရားစီရင်ပိုင်ခွင့်အား ကျင့်သုံးသည့် တရားရုံးများအပါအဝင် တာဝန်ယူ/ခံမှုဆိုင်ရာ ယန္တရားအားလုံးနှင့် ပူးပေါင်းဆောင်ရွက်ရမည်။ နိုင်ငံတကာ ရာဇဝတ်မှုများနှင့် ကြီးလေးသော မတရားပြုကျင့်မှုများအတွက် လွတ်ငြိမ်း ချမ်းသာခွင့် လုံးဝမရှိစေရကြောင်း၊ ပြစ်ဒဏ်မှ ကင်းလွတ်နေသည့် သံသရာကို အဆုံးသတ်ရမည်ဖြစ်ကြောင်း အာဆီယံသို့ ဝန်ကြီးဟောင်းများနှင့် ကုလသမဂ္ဂသံတမန်ဟောင်းများက အကြံပြုထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
