ကချင်ပြည်နယ်၊ ခေါင်လန်ဖူးမြို့နယ်အတွင်းရှိ အကြမ်းဖက်စစ်တပ်လက်အောက်ခံ ပြည်သူ့စစ်တပ် စခန်း ၂ ခုကို KIA တပ်ဖွဲ့က တိုက်ခိုက်သိမ်းပိုက်လိုက်ကြောင်း KIA စစ်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောကြားသည်။
အောက်တိုဘာလ ၁၉ ရက်နေ့ ခေါင်လန်ဖူးမြို့နယ်၊ ရှီးလာန်ဒမ်းကျေးရွာအနီး အင်အား ၃၀ ခန့် ဖြင့် တပ်စွဲထားသော စစ်တပ်လက်အောက်ခံ ပြည်သူ့စစ်တပ်စခန်းကိုလည်းကောင်း၊ အောက်တိုဘာ ၂၀ ရက်နေ့က မခေါင်ဒမ်းကျေးရွာ ဆုတောင်းကုန်းရှိ ပြည်သူ့စစ်တပ်စခန်းကို လည်းကောင်း KIA တပ်ဖွဲ့က တိုက်ခိုက်သိမ်းပိုက်ခဲ့ကြောင်း သိရသည်။
ထိုသို့ တိုက်ခိုက်သိမ်းပိုက်ခံရပြီးနောက် အကြမ်းဖက်စစ်ကောင်စီတပ်က ယင်းကျေးရွာများ အပါအ ဝင် ခေါင်လန်ဖူးမြို့နယ်နှင့် ဆော့လောမြို့နယ်တို့အတွင်းရှိ ပြည်သူလူထုကို ပစ်မှတ်ထားကာ Y12 လေယာဉ်ဖြင့် တောက်လျှောက် ဗုံးကျဲ တိုက်ခိုက်နေကြောင်း သိရသည်။
“စခန်းသိမ်းပိုက်ခံရတာကို မကျေနပ်လို့ လေယာဉ်ခေါ်တာနေမယ်။ Y12 လေယာဉ်နဲ့ ဗုံးကျဲနေတာ၊ ဒီနေ့ မွန်းတည့် ၁၂ နာရီခွဲလောက်ကလည်း လန်ဆယ်ကျေးရွာနဲ့ အနီးတဝိုက်ကျေးရွာတွေကို ဗုံးကျဲ ချတာ အလုံး ၂၀ လောက်ရှိတယ်။ ဘုရားကျောင်းနဲ့ နေအိမ်တွေ ထိခိုက်ပျက်စီးတယ်။ နာပေဖုံကျေး ရွာအနီးကိုလည်း ဗုံး ၃ လုံးကျဲသွားတယ်” ဟု KIA စစ်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောကြားသည်။
KIA တပ်ဖွဲ့က တိုက်ခိုက်သိမ်းပိုက်ခဲ့သည့် ခေါင်လန်ဖူးမြို့နယ်၊ ရှီးလန်ဒမ်းကျေးရွာမှာ အိမ်ခြေ ၂၀ ခန့်ရှိပြီး လန်ဆယ်ကျေးရွာအထက်ဘက်၌ တည်ရှိကြောင်း သိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
