ကရင်ပြည်နယ်၊ ထိုင်း-မြန်မာနယ်စပ်၊ မြ၀တီမြို့နယ်၊ KK Park မှာ ကျားဖြန့် လက်ကြီး တရုတ်လုပ်ငန်းရှင်များ အပါအဝင် အရေးပါသူများကို စစ်တပ်လက်အောက်ခံ ကရင်နယ်ခြားစောင့်တပ်-BGF မှ စောချစ်သူ၊ တင်ဝင်းနှင့် မုတ်သုန်တို့က ခေါ်ထုတ်သွားပြီး ရွှေက္ကိုလ် အပါအဝင် ဘေးကင်းရာ နေရာများတွင် ခိုလှုံခွင့်ပေးထားကြောင်း ကရင်စစ်ရေး သတင်းရင်းမြစ်က ပြောဆိုသည်။
အောက်တိုဘာလ ၂၂ ရက်နေ့ကတည်းက BGF မှ စောချစ်သူ၊ တင်ဝင်းနှင့် မုတ် သုန်တို့က KK Park မှ ကျားဖြန့် တရုတ်သူဌေးများ၊ အွန်လိုင်း နည်းပညာဆိုင်ရာ ပညာရှင်များ အပါအဝင် အရေးပါသူများကို ခေါ်ထုတ်သွားပြီး တချို့မှာ ရွှေက္ကိုလ်တွင် ရောက်ရှိကာ တချို့မှာမူ BGF က အထူးစီစဉ်ပေးထားသော နေရာများတွင် ယာယီခိုလှုံနေကြကြောင်း သိရှိရသည်။
” KK Park က ကျားဖြန့် တရုတ်သူဌေးတွေ၊ အိုင်တီ ပညာရှင်တွေနဲ့ အရေးပါသူတွေကို အောက်တိုဘာလ ၂၂ လောက်ကတည်းက BGF အကုန်ခေါ်ထုတ်သွားပြီး ရွှေက္ကိုလ်၊ ဘုရားသုံးဆူနဲ့ BGF နယ်မြေတွေမှာ ရွှေ့ထားပေးတယ်။ အခု ထိုင်းဘက်နဲ့ မြ၀တီဘက်ကို ထွက်ပြေးနေတာတွေက အလုပ်သမားနဲ့ အလုပ်ကြီးကြပ်ရေး စတဲ့ လုပ်ငန်းလည်ပတ်တဲ့သူတွေပဲ။ အဓိက အရေးကြီး ပုဂ္ဂိုလ်တွေက BGF က ဗိုလ်တင်ဝင်းနဲ့ စီမံမှုနဲ့ လုံခြုံတဲ့နေရာတွေကို ရွှေ့ပေးပြီးသွားပြီ။ KK Park ကို စစ်တပ်က ဝင်စီးမယ်၊ နှင်လွှတ်မယ်ဆိုတာတွေက စစ်တပ်နဲ့ BGF ညှိနှိုင်းပြီး လုပ်ကြတာ” ဟု ကရင်စစ်ရေး သတင်းရင်းမြစ်က ပြောဆိုသည်။
KK Park မှ ကျားဖြန့် တရုတ်သူဌေး များအပါအဝင် အရေးပါသူများကို BGF က အထူးအစီအစဉ်ဖြင့် ရွှေ့ပြောင်းပေးရာတွင် မြ၀တီ ၂၇၅ ဂိတ်၊ သင်္ဃန်းညီနောင်ဂိတ်၊ ကော့ကရိတ် ၉ တိုင်ဂိတ်၊ ကျုံဒိုးဂိတ် အပါအဝင် စစ်တပ်ဂိတ်များ လမ်းကြောင်းဖွင့်ပေးထားကြောင်း သိရှိရသည်။
လတ်တလော ထိုင်းဘက်သို့ ထွက်ပြေးနေကြသော တရုတ် အပါအဝင် နိုင်ငံခြားသား ၇၀၀ ကျော်ရှိနေပြီး ထိုင်းနိုင်ငံက ထွက်ပြေးလာသူများကို စိစစ်ခြင်း၊ ယာယီခိုလှုံနိုင်သော နေရာများ စီစဉ်ပေးခြင်းနှင့် အရေးယူ ဆောင်ရွက်မှုများ လုပ်ဆောင်ရန် စာရင်းကောက်ယူခြင်းများ လုပ်ဆောင်လျက်ရှိကြောင်း ထိုင်းသတင်းများက ဖော်ပြသည်။
ထိုင်းနိုင်ငံ၊ မဲဆောက်မြို့ဘက်သို့ မြ၀တီမြို့နယ် KK Park မှ ထွက်ပြေးလာသော နိုင်ငံခြားသားများ အများစုတွင် တရုတ်နိုင်ငံသားများဖြစ်ကြောင်း၊ လက်ရှိ တာ့ခ်ခရိုင် လူဝင်မှုကြီးကြပ်ရေးကလည်း စိစစ်မှုများ လုပ်ဆောင်နေပြီး သက်ဆိုင်ရာ တရုတ်သံရုံးနှင့် ချိတ်ဆက် ဆောင်ရွက်ရန်လည်း အစီအစဉ်ရှိနေကြောင်း စိစစ်မှုများတွင် ပါဝင်ကူညီပေးနေသော တရုတ်-မြန်မာ-ထိုင်း စကားပြန်တချို့ထံမှ သိရှိရသည်။
KK Park မှာ BGF က အဓိက လုံခြုံရေးယူ တာဝန်ယူ တည်ဆောက်ထားသော အွန်လိုင်းကျားဖြန့်စင်တာတစ်ခုဖြစ်ပြီး မြ၀တီမြို့နယ်၊ မယ်ထော်သလေးကျေး ရွာအနီး ထိုင်း-မြန်မာနယ်စပ် သောင်ရင်းမြစ်ကမ်းဘေးတွင် တည်ရှိ သည်။
ဓာတ်ပုံ – မြန်မာအကြမ်းဖက် စစ်တပ် လက်အောက်ခံ BGF မှ စောချစ်သူနှင့် မုတ်သုန်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
