ရန်ကုန်၊ နိုဝင်ဘာ ၁၆
မြန်မာအကြမ်းဖက်စစ်အုပ်စုနှင့် လက်အောက်ခံ နယ်ခြားစောင့်တပ်များ၊ မဟာမိတ် ပြည်သူ့စစ်အဖွဲ့များက ဆိုက်ဘာလိမ်လည်မှုများမှ အကျိုး ခံစားခွင့်ရရှိနေပြီး အမျိုးသားညီညွတ်ရေးအစိုးရ-NUG အနေဖြင့် နိုင်ငံဖြတ်ကျော်ရာဇဝတ်မှုများကို နှိမ်နင်းအမြစ်ဖြတ်ရန် ပြည်တွင်းပြည်ပ ညှိနှိုင်းဆောင်ရွက်သွားမည်ဖြစ်ကြောင်း အမျိုးသားညီညွတ်ရေးအစိုးရက တရားဝင် သတင်းထုတ်ပြန်သည်။
အမျိုးသားညီညွတ်ရေး အစိုးရအနေနှင့် မြန်မာနိုင်ငံတွင် နိုင်ငံဖြတ်ကျော် ရာဇ၀တ်မှုများကို နှိမ်နင်းအမြစ်ဖြတ်ရန်နှင့် ထိခိုက်သူများကို ပံ့ပိုးကူညီနိုင်ရန် တိုင်းရင်းသားတော်လှန်ရေးအဖွဲ့များ (ERO)၊ ကြားဖြတ် မိတ်ဖက်အုပ်ချုပ်ရေး အဖွဲ့အစည်းများ၊ နိုင်ငံတကာ တရားဥပဒေ စိုးမိုးရေးအဖွဲ့များ၊ အခြားသက် ဆိုင်ရာ အဖွဲ့များနှင့်အတူ ညှိနှိုင်းဆောင်ရွက်သွားရန် ကတိကဝတ်ကို ဆက်လက်ကျင့်သုံး သွားဖြစ်ကြောင်း၊ မြန်မာနိုင်ငံအတွင်းမှ ကျူးလွန်နေသည့် နိုင်ငံဖြတ်ကျော် ရာဇ၀တ်မှုဆိုင်ရာ လုပ်ရပ်များအပေါ် မကြာသေးမီက နိုင်ငံတကာ၏အာရုံစိုက်၊ တိုးမြှင့်အရေးယူဆောင်ရွက်မှုများအတွက် မြန်မာနိုင်ငံ အမျိုးသား ညီညွတ်ရေးအစိုးရမှ ကြိုဆိုကြောင်း NUG က ကြေညာသည်။
အမျိုးသားညီညွတ်ရေးအစိုးရအနေဖြင့် ၂၀၂၃ ခုနှစ် အောက်တိုဘာလ ၁၇ ရက်နေ့ထုတ် လူကုန်ကူးမှု၊ ဖြားယောင်းလိမ်လည်မှု နှင့် နိုင်ငံဖြတ်ကျော်မှုခင်းဆိုင်ရာ ကြေညာချက်နှင့် အမျိုးသားညီညွတ်ရေးအစိုးရ၊ KNPP (ကရင်နီ အမျိုးသားတိုးတက်ရေးပါတီ)၊ KNU (ကရင်အမျိုးသားအစည်းအရုံး)၊ CNF (ချင်းအမျိုးသားတပ်ဦး)၊ ABSDF (မြန်မာနိုင်ငံလုံးဆိုင်ရာကျောင်းသား ဒီမိုကရက်တစ်တပ်ဦး)၊ မွန်ပြည်သစ်ပါတီ (NMSP)၊ WLB (Women League Burma) ၏ ၂၀၂၅ ခုနှစ် ဇန်န၀ါရီလ ၂၀ ရက်နေ့ မြန်မာနိုင်ငံတွင် ဆိုက်ဘာ ရာဇ၀တ်မှုများ ကြီးထွားလာနေသော အကျပ်အတည်း နှင့် ပတ်သက်၍ ပူးတွဲကြေညာချက်များ ထုတ်ပြန်ခဲ့ကြောင်း သိရှိရသည်။
အရှေ့တောင်အာရှတွင် အဓိကအားဖြင့် လှုပ်ရှား နေသော ဆိုက်ဘာ လိမ်လည်ဂိုဏ်းများသည် ကမ္ဘာတစ်ဝှမ်းရှိ အပြစ်မဲ့သူများထံမှ တစ်နှစ်လျှင် ဒေါ်လာ ၆၅ ဘီလီယံခန့် လိမ်လည်လှည့်ဖြားနေပြီး မြန်မာပြည်သူပေါင်း ၁၂၀,၀၀၀ မှာ အွန်လိုင်း လိမ်လည်မှုများ လုပ်ဆောင်ရန် ဖိအားပေး ထိန်းသိမ်းခံနေရကြောင်း၊ မြန်မာအကြမ်းဖက်စစ်အုပ်စုနှင့် ၎င်း၏ကွပ်ကဲမှုအောက်ရှိ နယ်ခြားစောင့်တပ်များ၊ မဟာမိတ် ပြည်သူ့စစ်အဖွဲ့များနှင့် နိုင်ငံဖြတ်ကျော် ရာဇ၀တ်ဂိုဏ်းများသည် အထက်ပါလိမ်လည်မှု စင်တာများ၏ အကျိုးခံစားခွင့်များကို ရရှိနေသူများဖြစ်ကြောင်း၊ ထိုအကျိုးအမြတ်ငွေများဖြင့် အခြားရာဇ၀တ်မှုများနှင့် မြန်မာပြည်သူများအပေါ် ကျူးလွန်သည့် ရက်စက်ကြမ်းကြုတ်မှုများကို မီးလောင်ရာလေပင့် ဖြစ်စေကြောင်း၊ လိမ်လည်မှုနှင့် လူကုန်ကူးမှု နှစ်ခုလုံး၏ သားကောင်များတွင် မရေမတွက်နိုင်သော မြန်မာနိုင်ငံသားများနှင့် ကမ္ဘာတစ်ဝှမ်းမှ လူများစွာ ပါဝင်ကြောင်း NUG က ဆိုသည်။
ထိုင်းနိုင်ငံနှင့် တရုတ်နိုင်ငံတို့၏ မြန်မာပြည်တွင်းနှင့် ပြည်ပမှ လိမ်လည်ဂိုဏ်းခေါင်းဆောင်များကို ဖမ်းဆီးတရားစွဲဆိုရန် လုပ်ဆောင်ခြင်းများ၊ အမေရိကန်နိုင်ငံ မှ United States Scam Center Strike Force ဖွဲ့စည်းခြင်း၊ ရာဇ၀တ်အဖွဲ့အစည်းများအား စီးပွါးရေးဆိုင်ရာ ပိတ်ဆို့အရေးယူခြင်း နှင့် ပိုင်ဆိုင်မှုများကို သိမ်းဆည်းရန်အတွက် ဘဏ္ဍာရေးဌာန၏ ကြေညာခဲ့သော လုပ်ဆောင်ခြင်းများ အပါအဝင် အိမ်နီးချင်းနိုင်ငံများ၊ ဒေသတွင်းနိုင်ငံများ နှင့် နိုင်ငံတကာအဖွဲ့အစည်းများအားလုံး၏ ကြိုးပမ်းလုပ်ဆောင်မှုများကို ကျေးဇူးတင် အသိအမှတ်ပြုကြောင်း NUG က ထုတ်ပြန်ကြေညာသည်။
ရာဇဝတ်ဂိုဏ်းများ၏ အမြင့်ဆုံး ခေါင်းဆောင် အဆင့်ရှိသူများကို ပစ်မှတ်ထား တိုက်ခိုက်ရန်၊ ရာဇ၀တ်မှုများ ရပ်တန့်ရန်၊ လိမ်လည်ခံရသူများ၏ ငွေကြေးပြန်လည်ရရှိနိုင်ရန်နှင့် လူကုန်ကူး ခံရသူများကို ၎င်းတို့၏ လူ့အခွင့်အရေး အလေးထားပြီး နေရပ်သို့ ပြန်လည်ပို့ဆောင်နိုင်ရန် နိုင်ငံတကာမှ တိုးမြှင့်ကြိုးပမ်း မှုများလိုအပ်ကြောင်း၊ ဤလုပ်ဆောင်ချက်များက မြန်မာနိုင်ငံ ငြိမ်းချမ်းသော ဖက်ဒရယ်ဒီမိုကရေစီပြည် ထောင်စုတည်ဆောက်နိုင်ရန်နှင့် ဒေသတစ်ခုလုံးအတွက် လိုအပ်သော တည်ငြိမ်အေးချမ်းရန် အခြေအနေ ကောင်းများကို ပံ့ပိုးပေးမည်ဖြစ်ကြောင်း NUG က ပြောသည်။
အမျိုးသားညီညွတ်ရေးအစိုးရ၏ နိုင်ငံဖြတ်ကျော် ရာဇ၀တ်မှုဆိုင်ရာ အလုပ်အဖွဲ့နှင့် ပြည်သူ့ရဲ တပ် ဖွဲ့တို့က ကူညီပံ့ပိုးသည့်အပိုင်းတွင် ပါဝင်လျက်ရှိကြောင်း၊ စိန်ခေါ်မှုများကို ကိုင်တွယ်ဖြေရှင်းရာတွင် စစ်အာဏာရှင်များ ၏ ရာဇ၀တ်မှုဆိုင်ရာလုပ်ငန်းများကို နှိမ်နှင်းနေကြသော နိုင်ငံတကာနှင့် ပြည်တွင်းရှိ သက်ဆိုင်ရာအဖွဲ့များနှင့် မိမိတို့ ပူးပေါင်းဆောင်ရွက်မှုကို ကြိုဆိုကြောင်း၊ မြန်မာစစ်တပ်၏ ရာဇဝတ်မှုများမှ ရရှိနေသည့် တရားမဝင် ငွေကြေးစီးဆင်းမှုများကို ဖြတ်တောက်ကာ ထိုငွေများကို အသုံးပြုပြီး ကျုးလွန်ထားသော ရာဇဝတ်မှုများ အဆုံးသတ်နိုင်ရေး နှင့် လိမ်လည်ခံထား ရသူများ တရားမျှတမှု ရရှိစေရေး နိုင်ငံတကာအသိုင်းအဝိုင်းနှင့် အစဉ်တစိုက် လက်တွဲဆောင်ရွက်ရန် NUG က ကတိပြုသည်။
