ရန်ကုန်၊ နိုဝင်ဘာ ၁၉
ထိုင်းသတင်းထောက်များကိုပါ ခေါ်ယူပြီး စစ်တပ်၊ ရဲနှင့်အတူ BGF နိုင်မော်ဇော် ဦးဆောင်သော တပ်ဖွဲ့များက ရွှေကုက္ကိုလ်အတွင်းမှ ကျားဖြန့် လုပ်နေသော တရုတ်များနှင့် နိုင်ငံခြားသား ၃၄၆ ဦးကို ဝင်ရောက် ဖမ်းဆီးခဲ့ခြင်းဖြစ်ပြီး ကွန်ပျူတာများ၊ ဖုန်းများကိုပါ ဖမ်းဆီးရရှိခဲ့ကြောင်း ထိုင်း The Reporters သတင်း၏ ဖော်ပြချက်အရ သိရှိရသည်။
ယမန်နေ့ညပိုင်း ရွှေကုက္ကိုလ်တွင် အဆောက်အအုံအများစုမှာ မည်းမှောင်နေပြီး မီးစက်သံများလည်း မကြားရတော့ ကြောင်း ထိုင်းသတင်းက ဆိုသည်။
ထိုင်းအစိုးရက မြဝတီမြို့သို့ လျှပ်စစ်၊ ရေနှင့် အင်တာနက် ဖြတ်တောက်ထားသည့် ကာလအတွင်းတွင်ပင် လင်းထိန်နေသော ရွှေကုက္ကိုလ်မှ အဆောက်အအုံကြီးများမှာ မီးစက်သံများနှင့် မီးများ လင်းထိန်မနေတော့ကြောင်း၊ စစ်တပ်၊ရဲနှင့် BGF က ကျားဖြန့်လိမ်လည်သူများကို နှိမ်နင်းရန် စစ်ဆင်ရေးတစ်ခု စတင်ခဲ့သည့် ပထမဆုံးညဖြစ်ကြောင်း ထိုင်းသတင်းက ဆက်လက်ရေးသားထားသည်။
“တကယ်အရေးကြီးတဲ့ ရထိုက် ကုမ္ပဏီ ထိပ်တန်း တာဝန်ရှိသူတွေနဲ့ ကျားဖြန့် တရုတ်သူဌေးတွေက နိုဝင်ဘာလ ၁၇ ရက်နေ့ ညကတည်းက BGF က သယ်ထုတ်သွားပြီ။ နိုဝင်ဘာလ ၁၈ ရက်နေ့ မှာ ကရင်နယ်လုံဝန်ကြီး ဗိုလ်မှူးကြီး မင်းကျော်သူ၊ ရဲမှုးနဲ့ ဗျူဟာမှုး တွေ ခေါ်လာပြပြီး ကျားဖြန့်ရုံတချို့ ဝင်ဖမ်းပြတယ်။ ကွန်ပျူတာတွေ ဖုန်းတွေ ရာနဲ့ ချီပြီး ရတယ်။ ကွန်ပျူတာ တွေ ကိုတော့ နေရာစီစဉ်ပြီး ဖျက်မယ်မီးရှို့ပြ မယ်။ ရွှေကုက္ကိုလ်ထဲက အရေးကြီးတဲ့ တရုတ်တချို့တွေကို အခြားနေရာတွေဆီ ရွှေ့ထားတယ်။ တကယ်တော့ ရွှေကုက္ကိုလ်ဆိုတာကို BGF ကပဲ ထူထောင်ပြီး သူတို့ဟာသူတို့ အဖမ်းပြတာ။ အဖမ်းပြတာကလည်း ကျားဖြန့် အလုပ်သမားတွေပဲ မိတာ။ အရေးကြီးတဲ့သူတွေ မဖမ်းဘူး” ဟု ရွှေကုက္ကိုလ်အခြေအနေကို စောင့်ကြည့်နေသော ကရင်စစ်ရေး သတင်းရင်းမြစ်က ဆိုသည်။
နိုဝင်ဘာလ ၁၇ ရက်နေ့ စစ်တပ်လက်အောက်ခံ BGF နိုင်မောင်ဇော်က ကျားဖြန့်များကို အပြီးသတ် နှိမ်နင်းတော့မည်ဟု ထုတ်ဖော်ပြောဆိုခဲ့သော်လည်း လက်တွေ့တွင် ကျားဖြန့် ထူထောင်ရာတွင် အဓိက ထိပ်တန်းတာဝန်ရှိသော ရထိုက် ကုမ္ပဏီတာဝန်ရှိသူများနှင့် ကျားဖြန့် တရုတ်သူဌေးများကို BGF က သယ်ထုတ်သွားမှုမှာ မေးခွန်းထုတ်စရာဖြစ်သည်ဟု ကရင်စစ်ရေး သတင်းရင်းမြစ်က ဆက်လက်ပြောဆိုသည်။
သို့ရာတွင် ရွှေကုက္ကိုလ်တွင် ဆက်လက် လည်ပတ်နေသော ကျားဖြန့် ကုမ္ပဏီများ ဆက်လက်ရှိနေဆဲဖြစ်ပြီး တချို့သော ကုမ္ပဏီများမှာ ရွှေကုက္ကိုလ်မြို့မှ ပြင်ပ နေရာသစ်တစ်ခုသို့ ကွန်ပျူတာများ၊ ဖုန်းများနှင့် ဆက်စပ်ပစ္စည်းများ ပြောင်းရွှေ့နေကြောင်း ကျားဖြန့် မြန်မာအလုပ်သမားများနှင့် အချိတ်အဆက်ရှိနေသော ကရင်သတင်းရင်းမြစ်တချို့က ပြောဆိုသည်။
နိုဝင်ဘာလ ၁၇ ရက်နေ့ ကရင်ပြည်နယ်၊ မြ၀တီမြို့နယ်၊ ရွှေကုက္ကိုလ်မြို့သစ်တွင် ကျားဖြန့်များကို အပြီးသတ်အပြတ် နှိမ်နင်းတော့မည်ဖြစ်ကြောင်း၊ ရွှေကုက္ကိုလ်တွင် ကျားဖြန့် ၁၀၀၀ နှင့် ၂၀၀၀ အကြားရှိပြီး ကျားဖြန့်များကို လုံး၀ မထားတော့ဘဲ အပြတ် အပြီး နှိမ်နင်းတော့မည်ဖြစ်ကြောင်း၊ ထိုသို့ နှိမ်နင်းရာတွင် စစ်တပ်နှင့်ပူးပေါင်း၍ နှိမ်နင်းမည်ဖြစ်ကြောင်း၊ အမေရိကန်နှင့် တရုတ်ဖိအားရှိလာ၍ မဟုတ်ဘဲ BGF က ကျားဖြန့် နှိမ်နင်းရန် ဆုံးဖြတ်သည့်အချိန်နှင့်တိုက်ဆိုင်နေခြင်းဖြစ်ကြောင်း BGF နိုင်မောင်ဇော်က ထုတ်ဖော်ပြောဆိုခဲ့သည်။
“ရွှေကုက္ကိုလ်မှာ ကျားဖြန့် သိန်းချီရှိတာ။ အခုက သူက ကျားဖြန့် ၁၀၀၀ နဲ့ ၂၀၀၀ အကြားရှိတယ်ဆိုတော့။ အဲဒီလောက်ပဲ အဖမ်းပြမယ့် သဘောမျိုးပြောသွားတာ။ ရွှေကုက္ကိုလ်ထဲမှာ ကျားဖြန့် မရှိဘူးဆိုရင် ၁ သိန်းကနေ ၂ သိန်းကြားရှိပါတယ်” ဟု ကရင်စစ်ရေး သတင်းရင်းမြစ်က ရှင်းပြသည်။
ရွှေကုက္ကိုလ် ထူထောင်သူ She Zhijiang ကို ကျားဖြန့်ငွေလိမ်မှု များ အပါအဝင် နိုင်ငံတကာရာဇ ဝတ်မှုများဖြင့် ထိုင်းနိုင်ငံက တရုတ်နိုင်ငံသို့ နိုဝင်ဘာလ ၁၂ ရက်နေ့တွင် လွှဲပြောင်းလိုက်ပြီး အမေရိကန်ကလည်း ကျားဖြန့် များကို အကာအကွယ်ပေးနေသော DKBA တပ်ဖွဲ့ နှင့် ခေါင်းဆောင် ၄ ဦးကို စီးပွားရေး ဒဏ်ခတ်ပိတ်ဆို့ကာ ကျားဖြန့်တိုက်ဖျက်ရေး အထူးတပ်ဖွဲ့ကိုလည်း ဖွဲ့စည်းခဲ့သည်။
မြ၀တီမြို့နယ်တွင် ကျားဖြန့် စင်တာများကို BGF စောချစ်သူ၊ DKBA အပါ အဝင် စစ်တပ်နှင့် အဆင်ပြေသော လက်နက်ကိုင်တပ်ဖွဲ့များက အကြီးအကျယ် လုပ်ကိုင်နေကြခြင်းဖြစ်သည်။
ဓာတ်ပုံ – The Reporters။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
