စစ်ကိုင်းတိုင်း၊ ခင်ဦးမြို့နယ်တွင် စစ်တပ်က ပစ်ခတ်မှုများဖြင့် စစ်ကြောင်းထိုးလာသဖြင့် ပြည်သူများ ထိခိုက်ဒဏ်ရာရရှိကာ သောင်းနှင့်ချီသော ပြည်သူများ စစ်ဘေးရှောင်ရန် ထွက်ပြေးနေရကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ နိုဝင်ဘာလ ၁၉ ရက်နေ့ စစ်တပ်က ခင်ဦး-ကန့်ဘလူ- ရေဦး အစပ်မှတစ်ဆင့် ခင်ဦးမြို့နယ်အတွင်းသို့ ဝင်ရောက်လာကြောင်း၊ စစ်ကြောင်းထိုးရာတွင် ပထမဦးစွာ လက်နက်ကြီးများ ဆက်တိုက်ပစ်ခတ်ပြီးမှ ဝင်ရောက် စစ်ကြောင်းထိုးလာခြင်းဖြစ်ကြောင်း၊ စစ်တပ်၏ ပစ်ခတ်မှုကြောင့် ပြည်သူ ၃ ဦးထက်မနည်း ထိခိုက်ဒဏ်ရာများရရှိထားကြောင်း သိရှိရသည်။
“ရေဦးနယ် ပင်စိမ်းကင်းရွာကနေ တစ်ဆင့် ခင်ဦးနယ် မုံလှစံပြကျေးရွာဆီကို စစ်ကြောင်းတွေ ရောက်လာတယ်။ ပြည်သူတွေကတော့ သောင်းချီ နေရပ်စွန့်ခွာထွက်ပြေးတိမ်းရှောင်နေကြရတယ်။ စစ်ရှောင် တွေ ထွက် ပြေး နေတဲ့အချိန် မနေ့ မွန်းလွဲ ၁၂ နာရီကျော်အချိန်မှာ အင်းပတ်ရွာကို စစ်တပ်က လက်နက်ကြီးနဲ့ ပစ်ခတ်လို့ ပြည်သူ ၃ ဦး ထိခိုက်ဒဏ်ရာရရှိခဲ့တယ်” ဟု စစ်ဘေးရှောင် ပြည်သူတစ်ဦးက ရှင်းပြသည်။
ခင်ဦးမြို့နယ်၊ အင်းပတ်ရွာကို စစ်တပ်က လက်နက်ကြီးဖြင့် ပစ်ခတ်ရာတွင် ရေဦးမြို့ပေါ် ဆည်မြောင်း ရုံးစခန်းအတွင်း အထိုင်ချထားသော စစ်သားများက လက်နက်ကြီးများဖြင့် ပစ်ခတ်ခြင်းဖြစ်ကြောင်း သိရှိရသည်။
” လက်နက်ကြီးနဲ့ ပစ်ခတ်လို့ ကိုထွန်းထွန်း အသက် ၄၇ နှစ်၊ ကိုကျော်ကိုကိုဦး အသက် ၃၈ နှစ်။ မောင်ထက်မြက်အောင် အသက် ၁၄ နှစ်တို့ ထိခိုက်ဒဏ်ရာရရှိခဲ့တယ်။ ဆေးကုသပေးနေပါတယ်” ခင်ဦးမြို့နယ် ပကဖအဖွဲ့ဝင်တစ်ဦးက ရှင်းပြသည်။
စစ်တပ်က စစ်ကြောင်းထိုးလာမှုကြောင့် ကန့်ဘလူမြို့နယ်နှင့် ခင်ဦးမြို့နယ်ရှိ ကျောက်တိုင်၊ကျီစု၊ဝက်တိုး၊အိုင်ပေါင်းချောင်၊ယင်းတိုက်၊ငါးရုံကြီး၊ရှားတော၊မုံလှ၊သာဝတ္ထိ၊မြင်းကျ၊သရက်ကုန်း၊ကျွန်းတောကြီး၊ကျွန်းတောလေး(ဥယျာဉ်)စသည့် ကျေးရွာပေါင်းများစွာ ပြည်သူ သောင်းချီ နေရပ်စွန့်ခွာထွက်ပြေးနေရကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
