အမျိုးသားညီညွတ်ရေးအစိုးရ အကြမ်းဖက်တိုက်ဖျက်ရေးဗဟိုအဖွဲ့သည် အကြမ်းဖက် တိုက်ဖျက်ရေး ဥပဒေ ပုဒ်မ ၆ ၊ ပုဒ်မခွဲ(င) နှင့်ပုဒ်မ ၇၂ ပုဒ်မခွဲ (ခ) ပါ လုပ်ပိုင်ခွင့်ကို ကျင့်သုံး၍ ပြည်ထောင်စုအစိုးရအဖွဲ့၏ သဘောတူညီချက်အရ အမျိုးသားကာကွယ်ရေးနှင့် လုံခြုံရေးကောင်စီအဖွဲ့ဝင် မင်းအောင်လှိုင်အပါအဝင် ၁၄ ဦးကို အကြမ်းဖက်သမားများအဖြစ် ထုတ်ပြန် ကြေညာခြင်းဖြစ်ကြောင်း သိရသည်။
၂၀၂၁ခုနှစ် ဖေဖော်ဝါရီလ ၁ ရက်နေ့ မှ ၂၀၂၅ခုနှစ် ဇူလိုင်လ ၃၁ ရက်အတွင်း အကြမ်းဖက် အုပ်စုဖြစ်သည့် နိုင်ငံတော်စီမံအုပ်ချုပ်ရေးကောင်စီက တာဝန်ပေး ဖွဲ့စည်း ခဲ့သော အစိုးရအဖွဲ့ အဆက်ဆက်၏ အမျိုးသားကာကွယ်ရေးနှင့် လုံခြုံရေးကောင်စီသည် လည်း အကြမ်းဖက်အဖွဲ့အစည်းဖြစ်သောကြောင့် အဆိုပါကောင်စီအဖွဲ့ဝင် များကို အကြမ်းဖက်သမားများအဖြစ် သတ်မှတ်ကြေညာခြင်းဖြစ်ကြောင်း သိရှိရသည်။
အကြမ်းဖက် စစ်အုပ်စု၏ အမျိုးသားကာကွယ်ရေးနှင့် လုံခြုံရေးကောင်စီတွင် မင်းအောင်လှိုင် ၊ ပြည်သူ့လွှတ်တော် ဥက္ကဌ တီခွန်မြတ် ၊ ဒုစစ်ခေါင်းဆောင် စိုးဝင်း၊မြထွန်းဦး ၊ထွန်းထွန်းနောင်၊ ဝဏ္ဏမောင်လွင်၊ သန်းဆွေ ၊ ဟင်နရီဗင်ထီးယူ ၊အောင်လင်းဒွေး၊ ရဲဝင်းဦး၊ သီတာဦး၊ တင်အောင်စန်း၊ မောင်မောင်အေး နှင့် ရာပြည့်တို့ ပါဝင်ကြောင်း သိရသည်။
အမျိုးသားညီညွတ်ရေးအစိုးရ၊ အကြမ်းဖက်မှုတိုက်ဖျက်ရေးဗဟိုအဖွဲ့အနေဖြင့် အထက်ပါ အကြမ်းဖက်သမားများကို ဥပဒေအရအရေးယူနိုင်ရေး ကြိုးပမ်းဆောင်ရွက်သွားမည်ဖြစ်ပြီး တော်လှန်ရေးအင်အားစုများနှင့် ပြည်သူများအနေဖြင့် ပူးပေါင်းဆောင်ရွက် ကြရန် တိုက်တွန်းထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
