ရပ်ဆိုင်းထားသော ဧရာ၀တီမြစ်ဆုံ ရေအားလျှပ်စစ်စီမံကိန်းအတွက် မင်းအောင်လှိုင်က ဦးဆောင် အဖွဲ့ ဖွဲ့စည်းလိုက်ပြီး တရုတ်ယူနန် SPICYN ကုမ္ပဏီနှင့်အတူ လုပ်ငန်းများ ပြန်လည်စတင်လိုက်ကြောင်း စစ်တပ်က ထုတ်ပြန်ထားသော ပြန်တမ်းအရ သိရှိရသည်။
အကြမ်းဖက် မင်းအောင်လှိုင်က ဧရာ၀တီမြစ်ဆုံ- မြစ်ညာမြစ်ဝှမ်းရေအားလျှပ်စစ်စီမံကိန်း ဦးဆောင်အဖွဲ့ ကို ယခုနှစ် ဩဂုတ်လ ၂၉ ရက်နေ့တွင် ဖွဲ့စည်းလိုက်ပြီး မြစ်ဆုံစီမံကိန်းအတွက် သုတေသနလုပ်ငန်းများ၊ နည်းပညာဆိုင်ရာ ဖြေရှင်းချက်များနှင့် ပြည်သူ့ဆက်ဆံရေး လုပ်ငန်းများကို စီမံဆောင်ရွက်နေကြောင်း သိရှိရသည်။
ဧရာ၀တီမြစ်ဆုံ-မြစ်ညာမြစ်ဝှမ်းရေအားလျှပ်စစ်စီမံကိန်းတွင် လျှပ်စစ်စွမ်းအားဝန်ကြီးဌာန ဒုဝန်ကြီးက ခေါင်းဆောင်အဖြစ် ပါဝင်ပြီး ကချင်ပြည်နယ်အစိုးရအဖွဲ့၏ သယံဇာတရေးရာဝန်ကြီးက ဒုတိယခေါင်းဆောင်အဖြစ် ပါဝင်ကာ အဖွဲ့ဝင် ၁၃ ဦးပါဝင်သည်။
ယင်းအဖွဲ့က တရုတ် ယူနန်ပြည်နယ်မှ SPIC Yunan International Power Investment Co.,Ltd (SPICYN) နှင့်အတူ ပူးပေါင်း၍ မြစ်ဆုံရေအားလျှပ်စစ်စီမံကိန်းအတွက် သုတေသနလုပ်ငန်းများ၊ နည်းပညာဆိုင်ရာ ဖြေရှင်းချက်များ၊ ပြည်သူ့ဆက်ဆံရေး လုပ်ငန်းများ၊ စီးပွားရေးနှင့်ဘဏ္ဍာရေးဆိုင်ရာ လုပ်ငန်းများ စီမံဆောင်ရွက်ရမည်ဖြစ်ကြောင်း၊ ယင်းအပြင် ဦးဆောင်အဖွဲ့က လမ်းညွှန်ချက် ပေးခြင်းနှင့် ဆုံးဖြတ်ချက်ချခြင်း အပါအဝင် လုပ်ငန်းများ ဆောင်ရွက်ရမည်ဖြစ်ကြောင်း သိရှိရသည်။
ယင်းအပြင် မြစ်ဆုံစီမံကိန်းအတွက် တရုတ်အစိုးရနှင့် မြန်မာစစ်တပ်အကြား ညှိနှိုင်းဆောင်ရွက်နိုင်ရေး ကိစ္စများကိုလည်း အဆိုပါ ဦးဆောင်အဖွဲ့က အထောက်အကူပြုပေးရမည်ဖြစ်ကြောင်း သိရှိရသည်။
” မြစ်ဆုံစီမံကိန်း ဦးဆောင်အဖွဲ့က တရုတ်ဘက်နဲ့ အစည်းအဝေး ၂ ကြိမ် ရှိခဲ့ပါပြီ ။ အခုက လုပ်ငန်းပြန်စပြီဆိုပေမယ့် On Paper တွေပဲ အဓိက သွားနေတုန်းပါပဲ” ဟု နေပြည်တော် သတင်းရင်းမြစ်က ပြောဆိုသည်။
အကြမ်းဖက်မင်းအောင်လှိုင်က မြစ်ဆုံရေအားလျှပ်စစ်စီမံကိန်းကို တရုတ်နှင့်ပူးပေါင်းဆောင်ရွက်နေကြောင်း ဩဂုတ်လ ၃၁ ရက်နေ့ တရုတ်နိုင်ငံ တီယန်ကျင်းမြို့တွင် မြန်မာ-တရုတ်စီးပွားရေး ပူးပေါင်းဆောင်ရွက်မှု မြှင့်တင်ရေးတွေ့ဆုံပွဲတွင် ထုတ်ဖော်ပြောဆိုခဲ့သည်။
ဧရာ၀တီမြစ်ဆုံစီမံကိန်းမှာ စစ်အာဏာရှင် သန်းရွှေ လက်ထက် ၂၀၀၂ ခုနှစ်ကတည်းက လေ့လာရေးစလုပ်ခဲ့ပြီး တရုတ် CPI ကုမ္ပဏီနှင့် အကျိုးတူ လုပ်ကိုင်ခဲ့ရာမှ ပြည်သူလူထု၏ ကန့်ကွက်မှုကြောင့် ၂၀၁၁ ခုနှစ်တွင် ဦးသိန်းစိန်အစိုးရအမိန့်ဖြင့် ယာယီရပ်ဆိုင်းထားခဲ့ခြင်းဖြစ်သည်။
