ရုရှားနှင့် ဘီလာရုစ်တွင် မြန်မာစစ်တပ်က မြေကွက်နှင့်အဆောက်အအုံတချို့ ဝယ်ယူထားပြီး မင်းအောင်လှိုင်ကိုယ်တိုင် စိတ်ကြိုက် စိစစ်ဝယ်ယူခဲ့ဟုဆို

ရန်ကုန်၊ ဒီဇင်ဘာ ၁၅

ရုရှားနိုင်ငံနှင့် ဘီလာရုစ်နိုင်ငံတို့တွင် မြန်မာစစ်တပ်က မြေကွက်နှင့်အဆောက်အအုံတချို့ ဝယ်ယူထားပြီး အကြမ်းဖက် စစ်ခေါင်းဆောင် မင်းအောင်လှိုင်ကိုယ်တိုင် စိတ်ကြိုက် စိစစ်၍ မြေကွက်များကို ဝယ်ယူခဲ့ကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။

ရုရှားနိုင်ငံ၊ မော်စကိုမြို့နှင့် ဘီလာရုစ်နိုင်ငံ၊ Minsk မြို့တို့တွင် မြန်မာစစ်တပ်က မြေကွက်နှင့် အ ဆောက် အအုံတချို့ကို ဝယ်ယူခဲ့ပြီး နိုင်ငံတော်ဘတ်ဂျက်ဖြင့် ဝယ်ယူခဲ့ခြင်းဖြစ်ကြောင်း သိရှိရသည်။

“မြန်မာနိုင်ငံသံရုံးနဲ့ အစိုးရဧည့်ဂေဟာတွေ တိုးချဲ့ ဖို့လို့တော့ သိရတယ်။ ဒါပေမယ့် ထူးခြားတာက မြေ ကွက်နဲ့ အဆောက်အအုံတွေကို တပ်ချုပ်ကြီးကိုယ်တိုင် သွားကြည့်၊ သွားစိစစ်တယ်လို့ သိရတယ်။ တကယ်တော့ ရုရှားမှာရော ဘီလာရုစ်မှာရော မြန်မာသံရုံးတွေကလည်း ဖွင့်လှစ်ထားပြီးသား၊ ရှိပြီးသားပါ။ ဘာကြောင့် ထပ်ဝယ်တာလဲတော့ မသိရဘူး။ ဝယ်တာကလည်း နိုင်ငံတော်ဘတ်ဂျက်နဲ့ပဲ ဝယ်တာ” ဟု နေပြည်တော်စစ်ဘက်သတင်းရင်းမြစ်က ပြောဆိုသည်။

အကြမ်းဖက်စစ်ခေါင်းဆောင် မင်းအောင်လှိုင်က စစ်အာဏာသိမ်းပြီးနောက် ၎င်းနှင့်မိသားစုများ စီးနင်းရန် ယခုနှစ် ဖေဖော် ဝါရီလအတွင်း ပြည်ပမှ ငှားရမ်းထားသော လေယာဉ်ကို နိုင်ငံတော်ဘတ်ဂျက်ဖြင့် ဝယ်ယူခဲ့သည်။

မင်းအောင်လှိုင်က ယခုနှစ် ဖေဖော်ဝါရီလ ၁၁ ရက်နေ့ တွင် သူနှင့်သူ့မိသားစု သီးသန့် အသုံးပြုရန် အမေရိကန်နိုင်ငံ၊ AVIATION CAPITAL GROUP ထံမှ ငှားရမ်းတင်သွင်းထားသည့် Airbus အမျိုးအစား A319-115 (MSN 5193) လေယာဉ် XY-ALK ကို အပြီးအပြတ် ဝယ်ယူခဲ့ပြီး မင်းအောင်လှိုင်နှင့်မိသားစု၏ ပြည်ပခရီးစဉ်များတွင် အသုံးပြုရန် ယင်းလေယာဉ်ကို MAI က အမည်ခံပေးထားရသည်။

မင်းအောင်လှိုင်က နိုင်ငံတော်ဘတ်ဂျက်ဖြင့် ဝယ်ယူထားသော MAI အထူးလေယာဉ်၏ အတွင်းခန်းများကိုပါ ၎င်း၏ စိတ်ကြိုက်ဒီဇိုင်းဆွဲ ပြင်ဆင်ခိုင်းခဲ့ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar